Maikumsung Malaysia ah palik athak mi 6000 ki behlapding

Maikumsung Malaysia ah palik athak mi 6000 ki behlapding

Malaysia gamsung ah maikum sungin palik athak mi 6000 bang ki behlapding cih theSun pan kiza hi. 2018 January kha akipan Royal Malaysian Police te’n mithak behlap kipanding, Recruit bawlding uh cihi.

Hihvai tawh kisai in palik thunei Bukit Aman Deputy Director of Management (Training) DCP Datuk T. Narenasagaran in agenkhiatna ah maikumsung mithak aki behlapding pen panmun awng Vacancies te behlapnading, kumcing in Pension tawh akhawl leh amauthu in atawp te behlapkik nadingin Recruit akibawlding ahihi ci’n genkhia hi.

Tua aki lakbehding palik panmun tepen Inspector pawlkhat, Lower Ranks, Auxiliary Constable, Orang Asli Constable, Police Cadet cihbang ahihi.

Hihbang in palik athak aki behlapna hangin “Royal Malaysian Police” pen thakhauhsak in mipi te adingin akisapna ah panpih theiding hi ci’n Reporter te tungah genkhia hi.

Ulu Kinta GOF Northern Brigade ah akibawl “1/2017 series General Operations Force (GOF) Basic Training Course” ah agenkhiat hi a, tualai ahzong Officer leh Personnel akigawm in mi 658 bang Training kahin akihel uh ahihi.

Malaysia gamsung ah palik kisinna Police Training Center pen akigawm in 13 bang om a, tualak ah Kuching, Sarawak; Segamat, Johor; Langkawi, Kedah; Sabah, Kuala Lumpur cihtezong akihel ahihi.

Behlapna: Palik athak mi 6000 ki behlapding cihpen Malaysia gambup ahihi. Kuala Lumpur sungbek cihbang hilo hi. Nungdiak inzong Malaysia Immigration Department te’n khakhat in Operasi 1300 vei bawlsawm uh cih thuthang kiza hi.

More: Malaysia Immigration te makaihna tawh khasim in Operasi 1300 vei bawldending

Pawlkhat in khakhat sungin 1300 vei bangci kibawltheih dinghiam, nikhat in nai 24 bek om a, khakhat in nai 720 bek omhi. Nikhat in Operasi 43 vei abawl kulve cihbang in thu limtak angaihsun theilo pawlkhat in Comment khelkhel piasese uhhi. Malaysia cihpen khuaneu khuata cihbang hisamlo a, azaina Area 127,724 square mile bang apha hisam hi. Tuaban ah mi khatbek ii sepding hilo a, Malaysia Immigration Department bup ii khakhatsung asepding Key Performance Index (KPI) asehsakna ahihi.

Lamkhat ah aomsa tengzong tamkhin, cimtak huaikhin ihsak mahmahleh mi 6000 bang behlaplap sawmlai uhhi. Sawltak #zomidaily