Dahna Pulakna: Nu Niang Sian Muang’ pasal Ko Okkar Aung in hong nusia

Zomi Innkuan USA

Executive Committee

Dahna Pulakna: Mangpha Ko Okkar Aung

Maryland Gamkee, Baltimore khuapi a teng, Noe Noe kici Nu Niang Sian Muang’ pasal, Ko Okkar Aung in Dec. 17, 2014 ni in damlohna hang tawh John Hopkins Zatopi panin a leitung nuntakna hong nusia hi. Ko Okkar Aung in a hong nusiat laitak in kum (23) a cingpan hi a, khangno lai mahmah hinapi, a it mahmah a zi leh kum nih apha pan a tanu khat ahong nusiatsan ahih manin khasiat huai kisa mahmah hi.

Ko Okkar Aung zi, Nu Niang Sian Muang pen Rev. Lian Khan Kap (Pastor, Zomi Mission Church) leh Sianu Dephany-te tanu ahi hi. Ko Okkar Aung pen nasep hanciam mahmah mi thunuam khat ahih ban-ah, tu kum sung a Tapidaw asuak thu-um mi khat ahi hi.

Ko Okkar Aung hong nusiatna hangin adah akap a om, a zi, ih laizom sanggamnu, Nu Niang Sian Muang leh a tanu a kipan, a sung a pute, meeltheih tanaute, khuapih tuipihte, pawlpi mipihte leh Zomi Innkuan DC kipawlna tawh a kibang in, Zomi Innkuan USA Executive Committee pawlzong nakpi takin kidah hi.

Ko Okkar Aung tawh hun nunung pen Dec. 20, 2014 (Saturday) ni in Baltimore khuapi sung a om March Funeral Home ah Gospel Baptist Church (Rockville) pawlpi innteekna tawh kibawl ding a, hanmual ah kikha ding hi.

Ko Okkar Aung hong nusiatna hangin adah akap, lungleng khuangai a om a zi leh a tanu a kipan, laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin hong khansuah in, nisim mabante ah thupha leh thathak tawh a kalsuankik zo dingin ahong siamna dingin thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
December 19, 2014