Myanmar panin Malaysia gamsung ah nasemding ki puakkik tading

Myanmar panin Malaysia gamsung ah nasemding ki puakkik tading

Myanmar gampanin Malaysia gamsungah nasemding pen aki paisaklohzawh kumkhat valkhinta a, tu’n kumpi te’n nasemding puakkik tading uh cih MMTimes pan kizak hi. Myanmar Ministry of Labour Immigration and Population te’nzong hihvaitawh kisai in Wednesday ni in genkhia uh cihi.

Myanmar Labour, Migration and Immigration Union Minister U Thein Swe in agenna ah Malaysia gamsungah nasemnuam “Workers” te hoihtak sitcianna aki neihkhit ciangin thukhuntawh kituak in nasem ki puakkik tading hi.

Malaysia gamsung ah nasemnuam tepen maikhasung in kipuakthei dingin aki vaihawmsan laitak ahihi ci’n genkhia hi. Tuabang in Malaysia gamsung ah nasem akipuak ciangin avaihawm Agency te’n nasem te kisapna khempeuh avekin mawhpuak alakding uh ahihi ci’n genbeh hi.

Malaysia gamsung ah nasep apuakding Agency te’n nasem te ii kisapna vaihawm sakding, Legal takin naseptheih nadingin akisam vaikhempeuh banah nasep apuakman Service Fee zong atawmthei penpenin akhiap nadingin Ministry in ngetna nei uhhi.

Tua “Mininistry of Labour, Migration and Immigration” te ii ngetna pen nasep apuakding ahi “Myanmar Oversea Employment Agencies Federations (MOEAF)” te’nzong limtak in kazuiding uhhi ci’n kamciam piakhin uhhi.

MOEAF panin General Secretary asem laitak ahi U Kyaw Htin Kyaw in agenna ah Malaysia gamsungah Myanmar gammi nasemte puaktheih kikdingpen amanlang theithei in ki lunggulh mahmah hi. Tuabangin nasem te ki puakkikthei hileh avaihawm Agency te leh nasemding Workers te’n ahamphat pihding uh banah kumpi mahmah inzong metna omding hi ci’n genkhia hi.

Tulaitak in Malaysia gamsung ah Myanmar gammi nasemding in kumpi phalna tawh ki puaktheilo ahih manin, pawlkhat Agency te’n Tourist Visa tawh puaksim veve uh a, buaina tampi piangsak uhhi. Kumpi te’n phalna tawh vaihawm hileh buaina tawmtuamding in ki lamen cih kiza hi.

Malaysia gamsung aom nasepnei Boss (Employer) te leh Agencies tuamtuam te’nzong Myanmar kumpi in nasemding in agammi te apuak kikding ngaklah mahmah uhhi. Myanmar gammi nasem tepen nasep hanciam in, nasepzia zong manlangtak in sinthei ziauziau uh ahih manin, adang gamtuamtuam te sangin Myanmar Workers tepen Boss te’n deihzaw uhhi ci’n MOEAF ah General Secretary asempa in genkhia hi.

More: Malaysia Myanmar Embassy mai ah Rohingya te’n lungphona nei

Myanmar leh Malaysia gamnih kikal gamvai buaina “political tensions” hangin, Myanmar Workers tepen abeisa 06 December 2016 akipan Malaysia gamsung ah aki puaksak nawnlo ahihi. Northern Rakhine State sung aom Rohingya te vaitawh buaina hangin gamnih kitelkhial uh a, kizopna aki khakcip ahihi.

Mininistry of Labour, Migration and Immigration te ciaptehna ah Malaysia gamsung ah Myanmar gammi nasem “Myanmar Workers” pen akigawm in 400,000 panin 500,000 peuhmah omding ci uhhi. Tualak ah nasem mi 200,000 khawngbek Permit kician tawh Legal takin asem uh hiding ci uhhi. Sawltak #zomidaily