Jerusalem vai hangin UN General Assembly in Emergency Meeting sam

Jerusalem vai hangin UN General Assembly in Emergency Meeting sam

USA President Trump in Jerusalem pen Israel te khuapi Capital hi cih a pulak manin UN Security Council leh UN General Assembly in Emergency Meeting sam hi.

Leitung bup ah gam khempeuh in a gam sungah Capital a ut na mun peuh ah nei thei a, ahizong in tuni dong Israel in Jerusalem a khuapi/capital a ceptehna leh UN in zong a theihpihna ngah nai lo hi. Kum tul thum 3000 val paisa in Kumpi David in Jerusalem pen Israel khuapi ding in na phuan khin in Temple zong na lam khin zo hi (Solomon, atapa in lam hi). Ahizong in Israel ten Pasian langpan in pasian dangte a biak ciang un Vanglian Pasian heh in akim a kiang a nam neu te tha hat sak in sal ding in Jews mi te mansak zel hi. Saltang in kum tampi om uh a, kumpi tuam tuam khut nuai ah sal tang uh hi.

Ahizong in mun tuam tuam pan in ciah kik in 1948 kum in Israel in Suahtakna Independence na ngah hi. Akim a kiang a Muslim gam te in Israel pen suksiat sawm (annihilated) in beisak sawm in do uh a, 1967 June 5 pan a 10 kikal sung in tua lai a Muslim gam hat mah mah ahi Egypt, Jordan leh Syria leh Arab gam ki pawlkhawm ten do uh a, ahizong in Israel in ni 6 sung in tua gam thupi galkap tampi a nei a hat mah mah gam Arab Muslim gamte vat gawp in zo in gam lian pi la uh hi. Israel ten tua a kipan gam kician tak US state neu pen pen te lak a khat New Jersey cia khong bek nei phing uh hi.

Tua bang a gam a lak na uh a Muslim te tuni ciang in lungkim lo in, ‘Israel ten ka gam uh ong sut uh, ong lak sak uh, (occupy) uh’ ci in Palestine Arab te in UN ah khia den uh hi. UN in zawh thawh thu tawh a sawlna hang in West Bank, Bethlehem, Nazareth, Gaza cihte leitang golpi Israel in zong thumanna tawh Palestinian te khutsung ah pia kik uh hi. Palestinians te lungkim thei tuanlo in suicide bomb leh Hamas te Rocket tawh nisim phial in Gaza pan in do phei den hiamgam takin vat zel uh hi. Israel ten bel thuk nuam lo in, kidal ki defense bek uh hi. Ahih hang, leitung bup in Israel te mawhsak (condemned) ve ve mawk uh hi.

Hih zong na lamdang pi khat hi. Palestinians te lungkim tuan lo in Jerusalem zong ko mau neihsa hi ci in lak sawm sawm lai uh hi, tuni dong in. Israel ten bel, sawtpi, tang a tuan a kipan in thu a nget ciang un, “Jerusalem khuapi aw, nang kong mangngilh taak leh ka taklam khut buisum ta hen! Nang kong phawk kei a, kei’ lungdamna a lian pen sangin Jerusalem a sangzaw-in kong koih kei taak leh ka dang tawngah ka leii toncip ta hen!” Late 137:5-6 ah ci in tuni dong in thu na ngen lai lai uh hi. Jerusalem pen eternal capital city of Israel, kumtawn a ka pu ka pa te uh khuapi ahi, kumpi David in a sat sa ahi’ ci in Jews ten kuamah piak sawm dek lo uh hi. Hih pen Arab gamte leh UN in Jerusalem pen Israel te a hilo hi a cih cih uh pen cik mah ciang in lawhcing ngeilo ding uh a, Israel ten lah pia khia ngei lo ding uh ahih manin Leitung galpi 3na gim nam nam mawk ta hi.

Laisiangtho sung a Jerusalem vai akigenna pen a tung tung hi ta mawk hi. President Trump in ‘Israel te khuapi pen Jerusalem hi a, US Embassy zong Jerusalem ah Tel Aviv pan in kituah ding hi’ cih ong pulak na hang in zan zek Dec 18, 2017 in UN Security Council gam 14 te thukimlo in mawhpaih ding in Emergency Meeting sam uh a, mawhpaihna resolution pen USA in a veto power tawh nial zo hi.

Video: 128 UN member states call for USA to withdraw Jerusalem move

Ahizong in tuni Dec 21, 2017 in General Assembly Emergency in sam uh a, tua lai ah gam 128 in “USA in Jerusalem pen Israel te khuapi ahihman in Embassy zong tuah ding” cih thu mawhpaih na pen thukim in vote a, gam 8 in USA gum in vote khia hi. Gam 35 in bel mawhpaihna na vote pia lo, gupna lah vote pia lo in hici om, neutral uh hi.

US Ambassador to UN ahi Nikki Haley in, “Gam 128 te mawhpaihna vote hang in Israel te khuapi Jerusalem hi a, ka embassy uh ka suan ding uh ong kham zo tuan lo ding hi, na mee khiat uh lamdang lo hi, ahizong in mawhpaihna vote a khia gamte ong kiciamteh ding a, huhna ong ki pia nawn lo ding hi, USA pen piakkhiatna a tam pen pen pia ding in nong ngen den uh a, themkhat zong zahtakna ong nei lo na hih uh leh ko zong kong huhna uh ka en kik ding uh a, a mannei zaw (productive) ding mun ah ka huhna sum uh ka na zang zaw ding uh hi” ci hi. Zanni in President Trump in zong ‘Jerusalem vai a ong vote lo gamte sum pia nawn lo ding, sum kikhol hi zaw ding in, hoih zaw phet ve’ cih san hiau mawk hi.

Laisiangtho in zong hih Jerusalem pen nak gen mah mah hi. Jerusalem pen OT Laisiangtho sung ah zong 660 vei pen Jerusalem pen Israel te ahih lam na gen hi. Kamsang Ezekiel , Zachariah, Daniel ten zong na gen a, Mangmuhna sung ah zong Jerusalem pen Leitung bei kuan a mipi khempeuh in Jerusalem mitsuan in Jerusalem kituh ding vai tamvei pi na gen khinzo hi. Daniel 11:40 ah “”A bei ding hun ciangin Leitaw-lam kumpipa in kisim dingin thu zasak dinga, Leilu-lam kumpipa a sakol galkapte, sakolleng le gal tembaw tampi tawh a kuankhia ding hi. Gam tampi sim dinga tuikhang bangin a nawtmai ding hi” (ZIV) ci in na gen hi.

Leitung bup in Israel leh USA bang ong do ek thei maw!!! Tulai thupiang te I ngaihsut ciang in Laisiangtho gen a tung tung ta hi a, Political, Historical, Prophetical leh Biblical fulfillment a tangtun na na hi mawk hi. Hizah a Jerusalem Leitung bup in haipih lunghimawh pih a UN Emergency General Meeting bang ong sap zezen pen lamdang lua hi. Pasian deihna ahi hi. Ezekiel 5:5 ah “Hih in Thupipen TOPA thugen ahi hi: Hih Jerusalem ahi hi, minamte laizangah ka omsak a, a kimkotah gamdangte a om uh hi” na ci mawk hi.

More: Jerusalem vai hangin Kuala Lumpur aom US Embassy maiah lungphona kinei

Mi khempeuh laizang tak a a koih pen Pasian hi mawk hi. Leitungbup in Israel te mawhpaih in Israel te a hu den ahi USA zong tun mawhsak mah mah uh hi. Pasian deihna om hi mawk hi. Gam hizah a neu, gam keu gam dai pen pen hizahta a aki lunghihmawh pen Pasian thu laigil om hi. Late 122:6 ah “Jerusalem lungmuan nadingin thu ngen unla: Nang hong itte galmuang uh hen” (ZIV) na ci mawk hi. Thungetna ah phok mah mah ding hi mawk hi. Jerusalem Israel leh USA Trump Administration te a ding in nisim thungetna ah phawk den ni.! Muana Khuptong