Biakna makai siate upate kithuah diamdiamin na semkhawm, vai hawmkhawm liailiai dihve ni ~ Hang Cin Hau

Biakna makai siate upate kithuah diamdiamin na semkhawm, vai hawmkhawm liailiai dihve ni ~ Hang Cin Hau

Tu hun pen biakna siate gamdang ah anak paitheih mahmah hun hiding hi. Ei gam ah pawl tuamtuam ihih hang in ih tun’na gamte ah siate pawlpi tuamtuam ah kisam in thu kihilhsak hi. Zomite lak ah paikawikawi-in Pasian thu hilhkha, apaina pawlpite’n zong tha ngahin lungdam uh hi. U.S a om pawlpite in siate na muaksiam uh hi. Mailam hunte ah siate’ zinna hang in pawlpi tuamtuamte kimaingapna sepkhopsiamna kipawlkophsiamna hong piangsak mahmah ding hi. Tu ciangciang cihphial ding Zogam ah siate in ei pawlpi sung mah bek ah thu kigenzaw hi. Siate mahmah zong KHA thu, pumpi taksa a ding khantohna tampi ngahding uh hi.

Pawlpi tuamtuamte kibatna kinaina tamzaw tham hi

Nipi, nilai, nitak biakinn kikhawm, thungen, sumpi khia, lasa, tu, Laisiangtho sim, antang, khukdin, din’sa, tutsa ih zatdan kibang hi. Siate in thu hilh, thapiakna, taina, hehnepna, huhna zatzia tamzaw kibang hi. Ahi zongin ei pawlpi ciat in adang te tawh doctrine kibatlohna hilhhilh in kisinsaksak hihang. Ih kibatnate kihilhhilh hetlo zaw hi. Ih kibatnate kihilhlo ihih man in pawldangte ih muhzia khat ompah hi. Muhna zakna theihna kawtoina munte ah, mundang ah va kikhop ding khamthei hi hang. Ih kibatlohna te ikihilh ciang ikibatnate zong kihilh huai kitheihsak huai hi.

Ih kibat hetlohna upna guipi neiciat hi hang

Kibat hetloh man in pawlpi tuamciat zong ihi pah hi. Ih tang kikhop tinten mah ding zong kisam hi.

Pasian upna thu hang-aa bawlsiatna gamte ah

Pawlpi vai hilo zawin, Pasian upna Topa Zeisu upna hang hi pen hi. Pawlpi tuamtuam pan thuakna, bawlsiatna, matna, a mimal in tam mahmah hi. Ih thuakna pen pawlpi hang hilo in, Pasian um in Zeisu honpa leh gumpa in ihsan hang ahi hi. Muhtheih pawlpi ih kibatloh hang in KHA gam sung ah ih tunkhoppih ding mi tampi om hi.

Christian kipawlkhop siam a kulna, akisapna om hi

Gambup a ding kisap hun in thu ngetkhopna, antanna, sepding thulian, laisiangtho teina, labu bawlna, deihna lahkhopna, deihlohna lahna, vailian thulian te ah mimal khat guak leh pawlpi khat guak in kisem kibawl kinialzo lo, sepkhop, nialkhop, dokhop akul hun omthei hi.

Tuhun in Khalkha ah Christian University kipan in phuat ding a hanciam uh ahi hi. Kipawlkhop aa sep ding ahi hi. Ngiimin sempeuh lehang piangpiang lel hi. Tedim lam Zomi Christian makaite in vailian ngiim bang peuhmah nei ihihiam?

Ikipawl siamlohna ahang

Paunak 14:20 Na ahoih a semte mite in muangin zahtak aa asia gamtatna in khialhna lianpi ahi hi.
Ei Tedim lam Zomite lak ah nautang mi tampi phattuampih ding akisem, kivaihawm, a thupi nalian ih gengen ding nei nailo ihi hi. Ih sepsate lak ah ei pawlpi sung ciang ding bek enin sem hi hang. Angsung ding huaihamna tamsaklua ihih man in Makai dingte muang zolo ihi hi. Kipawlkhawm aa akisemsate nekgukin beisak maimangsak dikdek hi hang. Na lian a thupi a haksa semding makai, a thuman, a thukhual, nautang lam ah pangin ahehpih adeihsak lutang Makai kisam ihihi.

Makai muanhuai ineih leh ikisap naliante kineizo ding

Tu hun in ih kumpite Democracy tawh akalsuan suan uh hita hi. Pawl makaite siam peuh leh isep ivaihawm theih ding vive hong hi pianta hi. Makaite in ih pawlpi mipite bang kisam hiam cih ngaihsutna ki kupkup kul hi. Kipawlsiam in vaihawm in semhuan thei hi lehang mipite kisapte-

(1) Biakna lam lokho lam sinna colleg. Bang hang? Zomite 70-80% bang lo khawh nasem hi in leitang awng tam mahmah lai hi.

(2) Biakna lam makaih Boarder ih kisam mahmah hi. Bang hang? Gamsung khuate pan sang kah naupangte innsap tamlua. Naupangte holimpih, kikuppih aa ngeina (discipline) tawh ukin makaih kul, hizo hi leh numei pasal boarder tuam neih ding hoih hi.

(3) Biakna zato, itna deihsakna a om zato Zomite kisam mahmah hi hang. US ah mipi’ ading zato te kicing hi napi in biakna zato akimawk ngahna, mizawngte kepzawh bawlzawh nading biakna zato nei uh aa kei nangawn ka va kibawlkha hi. Tavuan, vaipuak neihna bek tawh akisem te ah nautang a niamlam ki hehpih huai hi.

(4) Khutsiam sinna sang neih ding ikisam hi. Gtn. Nidang Mandalay a RC Laphon sang dan kisam mahmah hi hang. Sang man ciang ih sin siamna te zangh in nuntakna ding a zattheih pah namte.

(5) Biakna makaih pilna sinna sang (College) kisam mahmah hi. Nitumna lam gamte ah Christian University tam nei mahmah uh hi. Zotate pil ding ih ut leh phuat theih hun hita, Zogam ah sang gina taktak neilo hi hang.

Hun beisa ah sia upa makaite a ding bek genin kivaihawm aa, pawlpi mipite phattuampih ding te kisem kivaihawmlo hi. Ih septheih sepzawh ding kikum le hang tampi om hi. Pawlpi tuamtuamte kipawlhuan in naliante isepkulta hi. Kipawlsiamloh tawh na lian a thupite kinei zolo ding hi. Tangtat, aituam vaite zangh non kei ni. Pawlpi mite bulphuhin sem siamni!

Biakna sung ah Zopau, Zolai, Zongeina zatzia ikoihzia

Kawlgam Vaigam ituntunna ah itun’na a phual mitamte pau, lai bekbek zangh hi hang. Zogam pan ihpuaksuak Zo laisiangtho, Zo labu zangh nonlo in, namdangte pau zanghin pasianthu atheihna ding uh Kawlpau Kawl laisiangtho Kawl labu zangh mahmah hi hang. Zogam pan biakna thu kizakna laite siate upate mahmah in zong don khollo, simlo in koihdak uh hi. Zongeina theih leh zat nei nonlo uh hi. Innsung ah nute pate na ngawn in siamtumlo pipi Kawlpau mah zangh uh hi. Biakinn ah thuhilhna lasakna Kawl vive zanghzaw uh hi. Zogam pan a pai meltheihte tawh kamphen zangh in kiho tanghtangh bilbel hihang. Zoniik Zopuan azangh tawm mahmah hi. Ahi zelzel pian teng mah pilsa teisa in pakta zaw hi hang. Hihte pen namdang te in Pasian thu thei in a upna ding uh deihna ahi hi.

Biakna sung ah makaite

Zomite omna tenna mah ah makai sem in khasum sang in Pasian nasem ihihi. Namdangte lak ah sem in kha sum sang Zomite 5% ih om hetkei ding hi. Ih khasum sanna ih nuntakna pen eimite omna hang hilua hi. Ih mai a paisa makaite in Zogam makaih in kipawlna lian pen ZBC Zomi Baptist Convention na phuan uh hi. A nungthuap makaite in dal zolo, hu zolo, kem zolo, in beisak hi hang. Nung le mai theisa te in na sa in pammaih sa mahmah hi hang. Makaite in lah gam dang ah hong lalsan hong taisanta uh hi.

Makai sia upate Zopau Zolai thupisa gumzo na kisa uh hiam

Pawlpimi te in Zo laisaingtho Zo labu zangh nonlo Zopau innsung nangawn ah kizanghlo mai ta hi. Abeisa kum 100 lai in Dr. Cope Tedim sangmangpa hong bawlsak Zolai, Zo laisiangtho, Zo labu, biakna thu kizakna akihawm laite siate upate in manpha salo, zanghlo, dakkoih khin hilo ihi hiam? Kuama suksiat hetloh pi in beisak leuleu ding himai ihi hiam? Pasian in Zomi ding a hong piansak teltuamte ihihna mangngilh kha ihi tam? Pasian thu itheihsak ihilhnopna thupi sa mahmah ing. Ahi zong in ei a te ibeisak liang ding pen pammaihlua, ngaihsut huailua thupisim huailua sa ingh.

US a om pawlpite’ zatzia

Pawlpi sung ah Zo labu kizanghlo cihtheih hita hi. Zo laisiangtho kizanghtei a mikang Laisiangtho tawh simkakkak uh h. Atun’ zawh uh kum 7 – 10 sung in a tate uh Zopau pauthei nonlo uh hi. Nu leh pa te mikang pau theilo 90% hiding hi. Nu leh pa mikang pau theite in mikang pau tawh hopih uh a inn sung na ngawn ah Zopau ki gumh hetlo hi. La tomno te Zo la kisa bilbel hi. Thu hilhna ah mikang pau helhel zanghzangh uh hi. Siate makaite theih kholloh pau zangh ziahziahte thupi sa in pakta zaw hi hang.

Pil tektek le hang ih mi, ih gam, ih lai, ihpau, ih ngeina mah ki-it kici napi

Pil taktak sam napi hang in Tedimlam Zomite tuaci hetlo ihi diam? Zopau ciktak, cingtakin a genthei sia tawm mahmah hang. Kei ma batkhak ka zakkhak thugente lak ah sia Kam Khaw Thang, Sia ST Hau Go, Sia Gin En Cin, Sia Hau Lian Kham, sia Pau Lian Mang te in Zopau ciktak cingtak in namdang pau helhetlo in thu genthei uh hi. Thugente, atamzaw in, a taktak in a gennop uh namdang pau hel kei leh a genthei nonlo ihi hi.

Biakna makaite kikum khawm diamdiam, kithuah khawm liailiai in isepkhop theih dingte sem ve ni. Biakna sung ah Pasian nasep khasum sanna nei in Zopau Zolai tawh thugen biakna siate in ih Zopau ih Zolai ih it diak ding hi na sa uh hiam? Zo laisiangtho Zo labu ih neih man in Pasian thu 70-80% bang in a umthei ihi hi. Zo laisiangtho Zo labu biakna lai Zolai te beisak le hang Pasian thu ih upna ih theihna nak kiam mahmah zo ding hi. Ih Zopau Zolai a it ding biakna pawlpite hihang. Dr. Cope hong bawlsak Zolai pammaih isa hiam? Puahkhawm, zuunkhawm, hukhawm, dalkhawm, kemkhawm ve ni. Kumpite in zong thupi sa ahih man in Sagaing Ywathitkyi Theihpan Kyang ah sinsak kemsak in hilh uh hi. Diamdiam ve ni liailiai ve ni. Ih kibatna te zong zatsiam theihsiam na ding in hilhhilh gengen ve ni!

Liailiai diamdiam thei le hang iseptheih ding ineih zawh ding tamlua. Zang ni hong suah ding bek a ngak hi.

Hang Cin Hau B.Min.
195 Myoma, Tedim
(1/8/2018,4:00 PM @ Tulsa)