Makai khat ih hih leh
Mihingte atam zaw’ ih lunggulh leh ih lungtup lianpen in makai hih ding ahihi. Makai hinuam ngiat zong kiom a, amah ut keita phial leh zong muanna tawh makai dingin a kitel zong om hi. Makai khat pen ih muan theih dinga ong om uh zong akul veve ahihi. Pasian in zong Israelte makai dingin ahai natel samlo a muan taak dingin pilna anei Egypt gam pilna kum 40 bang asin Moses natel hi.
Ei Zomi sungah zong ki enpha leng a lunggulh huai mahmah ahihi. Ei leh ei makai a ih kikoih sangin Pasian hong
koih hileh sawt kikhawm zaw hi. Zomi mipil tampi tak ih omta a lungdam huai kasa mahmah hi. Pasian’ phalna tawh makai ih hih leh kuakua in hong langpan zongin ih puk ngei kei ding hi. Ahizongin makai hihna ih kisak theihpih a ih om leh sawt ih mangkei ding hi. Makai khat ih hih leh itna,lungduaina leh veina ih neih ding a thupi mahmah ahihi. Lungduai zolo in ih om leh Vangtung thupha, Leitung thupha ih tan ding hi. Makai pen aheh masa a om cih khawng pen gualzawhna ding hong khak tan mahmah hi.
Nungzuite adingin zong muan taklo belh taklo suan taklo ih hihi. Makai khat mi muan khat in ih om ciang ih thanemna hong en 
honkhat na omden hi cih ih phawk ding thupi hi. Pasian nasem(pastor) khat, makai khat ih hih leh azi atate bangci gamtat cih hong kien gige hi. Bangbang ahizongin Leitung hi’n kikhial thei kimawh thei hi ahizongin makai khat hihna tawh gamtat luhek, zi leh pasal, tate leh nulepa kikal cih bangte ahoih pen dinga ih hanciam tantan ding thupi mahmah hi. Makai khat hilenlan dingin mi thu hilhhilh ding ahihhang lah ih ziletate lah thu mang mello ut bangbangin gamta cih danin hong om mawk leh makai ih hih hang kuaman hong zahtaklo ding hi.
“Makai khat ih hih leh” ei innkuan sung nuntakna mahmah hoih photphot leh midangten hong zahtak theipan ding hi. Tua ahih manin kei makai hing ci’n pum ciakciaklo in kei nuntakna, ka innkuan sung nuntakna e bangci mite zahtak baangin ka om mah hiam? ci a ih ki sittel ding thupi mahmah hi. “Makai khat ih hih leh” ih neih ngiat ding a thupi deuh ah thu 5 om a tuate in itna,lungduaina,veina, geelna leh ngimna ih neih ngiat ding thupi mahmah hi. Lunggulh man leh deih sak luat mana gelh khialh at khialh a om leh ki ngaidam ni maw.
Zomi ka hi hi.
Suanno
Malay
HP:017-6402338
http://semkhawm.blogspot.com/
Nothing is impossible
Comment piaknop aomleh...