Makai ginalo ~ Lian Tuang

Makai ginalo ~ Lian Tuang

Makai cih pen mun khempeuh le hun khempeuh ah a kisam den dinmun khat ahi hi. Makai hoihte hangin nopna daihna lungdamna a om mah bangin makai ginalote hangin kisiatna lungkhamna lungzinna thangpaihna khasiathuaina tampi zong piang thei veve hi.

Makai ginalote pianzia

1- Hamsatna lauhuaina khat peuhpeuh uang gen in dipkuat gen mahmah hi.

2- A kician mello thu pawlkhat siksan in mipite lau-thawng sak patau sak den akl lawpgawp sak hi.

3- Amah tawh ngaihsutna muhna kibanglo khempeuh minam itlo, a citaklo, pawlpi langpang ci in ko pahpah hi.

4- Ko le no cih kideidanna lungsim nei in kampau hi.

Natna nam khat

Hih bang makai ginalote apian theihna pen amau mimal hang bek na hi khin lo leuleu hi. Amakaite le mipite mahmah in lungsim meima ( Trauma ) natna lianpi a neih man na hi gige hi.

Natna ngahzia

Hih lungsim meima pen mun khempeuh panin kingah thei hi. Innkuansung kipattah khialhna le nuntak hamsat luatna, gam ki ukzia hoihlo le khuahun kisiatna ( huihpi guahpi hang, 2015 kum khuahunsiatnate dan), kimlepam ginalo le tuahsiatna tuamtuam, patauh dipkuatna le lunglen khuangaihna, zawnna natna gal le sa tuahna…, cih thu tampite hangin a kingah thei ahi hi.

Natna lim le mel

Mi khempeuh hih lungsim natna ki nei ciat a, a suk le a suklo bek kilamdang hi.

Hih meima pen mimal in a vei pawl le minambup gambup in a kivei pawl na om leuleu hi.

Mimal natzia

Mimal lungsim meima neite om zia a huampi in nam nih om leuleu hi.

Khatna ah

• a-Zu le sa tawh kidiah in zatui zaha zang
• b-Lungkia den, lungsim neu
• c-Patau den, linglawng den
• d-Amah le amah kibawlsia
• e-Nasep hanciam tentan pong

Anihna

• a-Zi le tate vua, kitom
• b-Naupangte sat gawp
• c-Thusia lasia bawl mawhna khialhna piangsak
• d-Migilo mipalang suakin lamdungah vak
• e-Mi tawh kitawng kilai in ngongtat hi.

Gambup nambup lungsim meima veina

Gambup nambup in hih lungsim meima a vei ciangin mipite in

1 Na khempeuh kitheihmawh bawl, thuhoih thupha, gamvai tuamtuamte thudon zo nawnlo

2 Thuman kigen nawnlo, ahi bangbang thuak hithiat

3 Mi dangte khual lo, Kipawlpih ahih keileh lainat vetlo. Thudon sawmlo

4 Lum le lum vet, vot le vot vet, a siang sinsen bek deih

5 Lungmuanna neilo, midangte muang zo mahmah lo

6 Mun khempeuh ah siattatna hoihlohna tawh kidim

7 Nulepa vai thangtatna tam cih bangteng ahi hi.

Kideidanna

Hih bangin minambup lungsim meima vei ciangin minam sungah bitna lungmuanna thanem to pah hi. Mipi sungah bitna a thanem ciangin tua minamte in amau minam hihna ( Identity ) zong kik pah uh a, ko le no cih kideidanna aituam lungsim ultung sak semsem hi.

Kikhenna

Minamte in hih bang natna a vei ciangin thu le la khempeuh ah paulap ding om sak pah lianlian uh hi. Thusia thuginalo khat a om ciangin tua nu tua pa hang hi ci thei pah setset hi. Ama thanemna kimu loin midangte mawhna thanemna bekbek kawkziauziau hi. Mi hoihlo miginalo, angsung bek a thei mi ci in khentuam mi pawlkhat nei ziau hi.

Tua bangin mi khentuam a neih vilvel manin amau sungah thuman thutak om thei nawnlo hi.Ni a tum ciangin khuamial in mun a lak bangin thumanna paikhia a thuginalo le zuauthute panmun ngah hi.

Thuman tawm le zuathu gawmkhawm in ahi mahmah takpi bangin thu gengen uh hi. Tua thu kigente a nial peuhpeuh minam langpang mi ngawngkai ci in min vawh ziauziau uh hi.

Ginalote hun

Thuman thutak a om nawnloh ciangin thu khat peuhpeuh a baihlam in kikhensat ziauziau hi. Kibatpih lohte tawh kikawl lo ding, midang tawh kipawl se lo ding, a dongtangte khemkhia ziau ding, vat mang lel ding cih dan lungsim le thugennate lawhciang to semsem a, tua bang hun ciangin Makai ginalote in panmun ngah to pah hi.

Makai hoih

Makai hoih ngahna dingin mipite mimal lungsim a cidam photphot ding a kisam na gige hi. Sepna bawlna gelna khat peuhpeuh ah hehna thangpaihna khasiatna bek tawh a kitawsawn laiteng I lungsimte a cidam nailo ahi hi. Hih lungsim liamma pen a hun lapin kibawl kei leh a khang akhang in kilawh toto thei lai hi.

Mimal le minam sung lungsim meimate a damkik theihna dingin a huampi in a tunga i gen sa teng a lehlam in hanciam ding hi pah hi. Mipilte genna ah zatui nam nga a hi thubulpi 5 tawh kibawl kul hi. 1) Justice (thuman thudik). 2) spirituality (lungsim hoih neihna), 3) Human security (bitna), 4) Peace building, 5) Trauma healing cih thute siksan in nei leng kidamkik thei hi. (hih thubulpi 5 pen a thulu ciang bekmah hi a kanbeh theihna ding ahi hi)

Mimal lungsim cidam leh minam sung a cidam ding ahi hi. Democracy tawh kalsuanna mun le gamte diakdiak ah makai ding pen mipite tel ahih manin mipi lungsim cidam ding thupi zawlai hi.

Atawpna ah

Mimal lungsim le minam cidamna dung zui in makai hoih le makai ginalo piang kawikawi thei ahihna galmuh theihna ding leh hih dan thu muhzia zong na om gige ahihna a ki theisak nuam hi hang.

Hih thute kicingzaw le a hoihzaw in a tel tampi om ahih manin khat le khat kihawm sawn toto lai ni cih zong kithum nuam hang.

Saya KoThar gelh Liamma le gam cih thulu le Internet a om lai pawlkhat kigawm ahi hi. Lian Tuang