Lungzuang inla, lungkia ken ~ Dong Mung

Lungzuang inla, lungkia ken ~ Dong Mung

Leitung icih pen kikhenna gam hi-a, leitung luah ding kuamah omlo hi. I lawm le gual, i it i ngaihte tawh sihna hanga kikhenna, khualzin gamvakna hanga kikhenna, damlohna hanga kikhenna le a tuamtuam hanga kikhenna tawh i kipaisan tek hi.

A paite adingin lungzuan’ lunglen’ phadawm thei-a, ahi zongin a omlai/akinusiate adingin lungzuan’na sang mahmah hi. Banghang in maw? Banghang cihleh a omlaite’n a paite tawh gamtatna, sulnungteng mumu ahih manin lungleng phadiak uh hi.

Ahang tuamtuam tawh i kikhen ciangin lungleng kisa in pawlkhatte bang lungzuan nepna zu dawn, zatep, khamtheih khat peuhpeuh ahihkeh kilungnopsak theihna khat peuhpeuh tawh amau le amau kihehnem in kilungnuamsak pong thei uh hi.

Thuakhak i sak leh i lelh mahmah pen i lawmngaihte tawh kikhenna, i pasal i zi-in hong sihsanna, i it mahmah i ngaih mahmah nu le pa ahihkeh mi khat peuh in sihna hangin hong khen, midang hangin hong khen, vaituamtuam hangin hong paisan ciang thuakhak kisa mahmah a, lungleng khua-ngai lungzuang in i om thei hi.

Tua bang hun ciang pawlkhatte lungzuan’ bek hi nawnlo in lungkiatna zong ngah lawh thei zanzan uh a, a nuntakna buppi uh siat lawh ngiingeii thei uh hi.

Sanggam aw, mihing i hihna tawh kizui-in lungzuang mah ni… Thanem kha mah ni… Lungleng kha mah ni… Dah kha mah ni… Ahi zongin tuate hangin lungkia kei ni.

Banghang hiam icih leh

1). Singteh zong a po/ a sel hun kibang himah taseleh a pulh hun kibang lo a, pawlkhat pulh masa zaw hi.

2). Singkung zong a paak khempeuh gah kimlo hi.

3). Singkung tungah vasa tuangte a hun cin ciang lengkhia hi.

Tua ahih manin

A pulh masa a tehte hangin lungzuan’na le lunglen’na i nei phial zongin lungkiat nadingin ngaihsun hetlo a, i nuntakna i maban hangsan takin i nawt ding kisam zaw hi.

A gah kimlo a paakte hangin i lungzuang ngaungau kha phial zongin lungkiatna in la lo zaw in, i mailam nuntak khuasak nading hanciam in kalsuan teitei zaw ni.

Tawmkha sung hong tuang pak vasate’n hong len’san manin lungzuang kha thei mah ni. Ahi zongin amau tomkha hong khawl pak, hong tawlnga pak ahihna uh phawk gige kawm sa in lungkiatna in ngaihsun lo-a, i mailam nuntak nading i hanciam ding hi.

Lungzuang inla, lungkia ken… Lungdam, Dong Mung