Lungngaih kikna ~ Pu Thangboi

Lungngaih kikna ~ Pu Thangboi

Zan ni ICC biakinn ah ka kikhawm hi. Zangkong katun zawh kha 1 phakhin in ka kikhop zawh cilna hipan hi. Hunzang pen Sia Hau Lian Kham(L)’ tanu Siama Ciin Kham ahi hi. Piancil 16:1-13 tung tawn in “Ei hongmu Pasian” cih thulu tawh thu manpha tampi hong gen a tha kangah mahmah hi. Ama’ genna tungpan ka lungngaih kikkik ciang in hih mun in hong sukha deuh hi

Aneu 9: Topa’ vantungmi in ama kiangah, “Na tonu’ kiangah ciahkik in la, ama’ tungah ki-ap in,” ci hi. A tonu thuak zolo a taikhianu’ kiang ah “Na tonu’ kiangah ciahkik in la ki-ap in” cih mawk pen thangah huai hetlo hi. Good news hetlo hi

Hih dan dinmun ih nuntakna sung ah ki tuak thei gige hi. Lengtong Pauno in zong na tuak kha mahmah hiding hiven ala sung khat bang ah “Sep noploh pen sem ing; duhloh pen ne ing” ci ngeungau hi

Ih utlohna mun penpen kitung thei a, ih sepnop loh pen kisem khathei mawk hi. Tulaitak bang Kawlgambup “A ciahkik” dinmun ih hi hi. Kum tampi ih sinsa, ih theihsa, noploh cihtak a noplo lam ah aciahkik ih hi hi.

Hagar’ dihmun zong baih hetlo ding hi. Sila hi sawnsawn lai mawk hi. Amah kia hileh thukhat hi in naupaai sawnsawn lai mawk hi. Numei te’n nau apaai uh teh vai tam mahmah hi. Azun khawng uh suak thethu lai tasawnsawn hi. Sila khat zuntha a nitum det bekbek zong maimial huai mahmah khin hi. Api in pakta leh aphadawm ding hi a, tu’n pakta lo lua kisa ahawlkhiat liang ahi hi

Tua apaikhiatna mun zuankik ding cih mawk pen thubaih diam? Pasian in sawl lel mawk hi. Pasian in sawlna hong neih ciang in anung ah tavuan lakna zong na nei veve hi.

Aneu 10 ah; Topa’ vantungmi in ama’ kiangah, “Na suan-le-khakte nakpi takin tamsak ding ka hih manin amaute kisim zo lo ding hi,” zong ci lai hi. Ci hi. Pasian in asawlna leh kamciam tonkhawm sak hi

Tuni in ih utloh penpenna mun apai ding ih hi phial zong in Pasian’ Sawl hipeuh leh lem veve ding cihna hi. Hagar in Pasian’ hopihna zakha ahih man in numeisan khat in angah khak ngeiloh Pasian’ kamciam tampi ngah pah hi. Tuni in athupi penpen Pasian’ hopihna ih zak ding athupi hi a ama’ hong sawl pen asem ih hih ding thupi masa pen hi

More: Zavom Update ~ Pu Thangboi

Ih sep nop ih bawlnop tam mahmah tase leh tuate Pasian’ hong sawllohpi ahih khak leh nusiat ngam ding hi a, ut takei leng Pasian’ hong sawl ahih nak leh ih sepngam ding athupi ahi hi. Shalom to you all! Mung Laan Thang (Zangkong)