Ka muhpak US Gamthu pawlkhat (6) ~ Awn Za Pau

Ka muhpak US Gamthu pawlkhat (6) ~ Awn Za Pau

Ka Upmawh Zah Hi Lo

A hi zongin Kawlgam pek aa ka huat penpen meikhuam tung a, meikhau leh telephone khau a kai neunau pen ka hua mahmah hi. A khangto nai lo a hong kiciamteh ei lam Zangkong khuasung mun khatkhat na-ngawn ah, meikhau kikhungte zang nawn lo in cable khau leisung ah kiphum in meikhuam omnana ah kahto sak kik hi. Lamgei ah khaukai neunau omlo banah a sing a suang tawh kisukkhak ding bangmah lungbuaina leh lauhuaina om nawnlo hi. Hun khatteh Yangon khuasung buppi ah tua bang dan vive a zang dingin zong ka upmawh gige khat ahihi.

Kei upthu mawkmawkah zong ka ngaihsun kholkha ngei a, a khangto mahmah gamte ah leinuai vive ah meikhaute paisak ding ka sak leh US ka tun ciangin khuasung tengah meikhuam vive mah na po ngelhngalh veve hi. Tua meikhuamte tungah meikhau leh telephone khaute na kaisak neunau veve hi.

Tua bek thamlohin a meikhuamte bang RCC (Reinforced Cement Concrete) khuam ahih keh siikkhuam bangdan a, amuanhuai vive fibre tawh kibawl khuam khawng zang inteh ka cih leh kei upmawhna bang ahi nuam ei leh, taaksing ding aa kilawm singkhuam vive na zang zaw lai uhhi. A singkhuamte pen upmawh sangin kum tampi akimang ding a, a bawl bel hi bilbel leuleu hi.

Tua hi a, meikhuam leh meikhau pen ka upmawhna sangin thupi kasa kei zaw hi. Khuasung hotel leh zum lianpite omna lobuang akim a paam meitang ziaizuai tuan khollo hi. Lammei bang zong kicing takin mun khempeuhah kivaak khin tuanlo a mun khatkhatte ah zing sim khialkhual veve hi. Tua mahmah semm zong ka upmawh zah na hi taktak lo hi.

A innte a tam zaw meikhuk (chimney) omna teng leh kisilna buk omna tengah 4.5 inches a sah leisek peuh tawh um niangnuang uhhi. Adangteng sing vive tawh um uhhi. Pawlkhatte a kimkot pangteng zong leisek tawh a um uh hangin 4.5 inches bek sahsak niangnuang bek a, taih inn cih dingin cihtaak hetlo hi. Huihpi guahpi a dalna ding bek mah a, a pua lam tungtham teng leisek a ciang uh ahihi.

A inn bulcin (foundation) zong kician meello in, muanhuai khollo hi. A khuam bulte leisung thukpi kito a kiphut hilo a, singkuang bang a aki-nga a kibulh dan vive ahihi. A taktak a umnate sing ka cih pong mawk hangin sing taktak zong hilo in sing tawh kibang dia bawltawm vive ahihi. A sual dawh singmeel suunte bang zong singtaktak hilo lailai hi.

A hih hangin a innlam dan uh pen a geel siam in a zatdan a nuam theithei dingin bawl uhhi. A innlam dan uh zong ei a’tawh kibang lo hi. A inn uh apua lam kawmpeek leh a sunglam deinate aman khit phitphetteh atung khuh pan uhhi. Ei kiangah a khuam phut masa in tua zawhteh liangzawl, kawmzawl, sualkal a manlang theithei in bulhin a tung ih khuh pah cingteng hi.

Bangzahta in guah tam tase leh innsung pan kilimzak meello in guahzuk lam zong kitheilo phial zah dongin a inn uh bitsak hi. Ei lam a siikkangte inntung khuhna dingin zang peuhmah lo uhhi. Bawngbuk sakolbuk khawng bek ah zang uhhi. Guahzuk ciang a agin ngeih lo ding metal sheet ahih kei leh wood shingle vive naak zat hi. Akhanglui innte ah kongkhak vang lian bawllo ahih manin a innsung uh mei kihong kei leh khuavak tam ngah lo pawl khat om hi.

Bangbang ka cih hangin ei lam aa taih inn sah mahmahte leh RCC kici siik tawn leh cement, suangsi, sehneel leh tui ih gawm ciang aa a khauh mahmahte tawh a khuam ih phut leh a sual zawl (RCC Girder) te tawh ka tuatna ka tehkakna hi bek aa, a mau lamh innte pen zinling leh guahtui bangzah in zu ta leh a kho lo ding cih bel hi lo leuleu hi. Ahi zongin Tornado kici sumpei hat mahmah ahi aa, huihpi 100 – 120 MPH bang in nung zenzen leh a thuak zo ding akilam inn tawm mahmah ding hi. Tua bang a thuak zo ding inn khat pen sum tampi tak bei kul a hih manin kua mah’n kilam kim zo peuhmah lo ding hi leuleu hi.

Mikangte leh ei nisuahna lam ate khuavak ih deih dan zong kibang peuhmah lo hi. Mikangte lamh inn a hih nak leh kisilna buk leh maiphiatna santak tengah mei a taang mahmah lela dingin bawl uhhi. Ahih hangin lengla khan ah ei lam bangin a taang theithei dingin bawl lo zaw mawk uhhi. A meel tuamtuam tawh kikhuh sabuai tung aa ngak a hih kei leh sualtung aa, a saang a ngiam deihzah aa koih theih ding meikhuat ih ci mai diam table lamp vive zang zaw mawk uhhi. Ei lamah a taang mahmah (bright light) vive ih deih zaw aa, nitumna lam a te in, a taang milmial (dim light) vive deih zaw uhhi. Tua huhau mah a hi tam.. ni taang sesa hun bang ciangin a mit un thuaklah pha diakin mitlimlang vom vive a tam zaw in bulh pah tek mawk uhhi.

Ahuang umnate zong a tamzaw in sing vive tawh um uhhi. Ahuang umnate pen taaksing vive hi leh kilawm zaw lai a, ahih hangin seasoning a bawl kawmin chemical khat peuh tawh gawmkhawm hamtang ahi tam.. muat baih tuak peuhmah het lo leuleu hi. Tua dai umna tawh kisai in Americante buang din ka ngaihsut kholhna sangin gina ka sa het kei zaw tham hi. A tamzaw in leisek ahih kei leh suangsek vive mah ciang linlian dingin ka upmawh hi a, tua bang na hi hethet lo leuleu hi.

Ka inn gei lampi ah furlong khat zong a sau lo ding lampi hong bawl uh a, Kawlte pau leh nylon kattaya hong phah uhhi. A nasepna ding uh a kisam set leh vanzat (equipment) te kicing mahmah napi’n bangteng hang ahi tam, a sep uh sangin a khawl ni uh tamzaw in man zok thei mahmah lo hi. Ka innkuanpihte kiangah America ah Kawlgam bang a, a sing a suang akisap loh banah a sepna ding uh a set a bang kicing mahmah napi’n sawt vei sem sa lua ing. Yangon City Development Committee (YCDC) te zong sang’ zekai zaw lai sa ing kaci hi.

A nasemte pen a uk lamah mikangte kihelin a sem taktakah Mexican te vive tam a mivomte tawmciik bek mah kihel hi. Pawl khatten hong genna ah nitha tawh sem ahih manin a sawt theithei dia cilbawl a sem hinteh a ci zong lah om in khatkhatte’ leuleu in a nasep zawhsa uh a siate in en photin hoih hi acih bekteh sem pai suak thei bek hi aci zong om hi. Bangbang ahi zongin Americate buang dingin tua zong zekai lua deuh peuhmah kasa hi.

Adang khat leuleu ah inn pan cina khat peuh gim mahmah in emergency takpi mahin a nuntakna a bei ding leh agim a thuakluat ding lung patau lunghimawh in zato kilak leh zato a tun ciangin siavuan siamate’n don vat hetlo in a ngeina mah bangin a min sazian akisam teng dong phot bawl phot phitphet in cina pen nai lang pan nai khat sung bang kiveel vetlo in ki-hici koih phot tadih hi.

Hih thu tawh kisai pen eimite tuah mun mahmah thu ahihi. Tua mun santak ah USA buang dingin deih bang saisai ka sa kei hi. Ahi zongin a sum a paai bei ding lunghimawh lo in 911 samin cina pua ambulance te tawh ahih leh bel thakhat thu in bawl in don pah uhhi.

Tua mahmah zong First Aid tawh kisai hi ding a, old patient a natna a theihsate lobuang test bawl huaiteng gtn. Sii etna (blood test) khawng zun etna (urine test) khawng bawl masa phot a, acina sak lungnote amuh photloh in upmawh sansat bek tawh zatui zaha pia pahpah lo zaw uhhi. Siavuante’tungah zong thu kibawlthei ahih manin a natna lungno ciantheih photloh in upmawh thu tawh zatui piak ding seh mawkmawk masa ngam lo uhhi.

Ka innsaapna huang uh leisek tawh ki-um pen, abul kip lo kho lo in kicim ding a kithawi pen phelkhia kikin a thak hong bawl uhhi. Leisek hong cian ciangin a motar zatte a tha khauh tuak khol hetlo hi. Kawlgamah kumpi sung a, cement ka zatdan uh pen Mangkangte ciangtansa (British Standard) vive tawh kituat a kizang hi a, amuanhuai mahmah akician mahmah na hi mawk hi.

British te in a sem abawlte gitnat loh ding leh bilatmi hoihna (cement quality) khawng deihzah a bat loh khak ding kigin kholhna tawh tampi tak a val in a muanhuaina zah ding (safety factor) tawh kisai in akul zah ding bek sangin a muanhuai zaw tham in na bawl uh a, kician mahmah uhhi. Thu maan thu tang tawh kisem peuh leh Kawlgamah Public Works te in muanhuai in teh ci aa a khuam a zawl a sahna a golna a sehnate (structural design) pen a muanhuai thei mahmah na hi kik bilbel hi. (azom omlai hi…) Agelh: Awn Za Pau