Lungkham haksatna nathuak ngei hiam? ~ Job Cinpi

Lungkham haksatna nathuak ngei hiam? ~ Job Cinpi

Lungkham haksatna na thuak ciangin phawk ding thu pawlkhat om hi. Tua na phawk thute in na lungkham na haksatna pan hong nuamtuamsak ding hi.

Khat veivei ciangin muh kholh theih loh lungkham haksatnate in hong lunggimsak mahmah thei hi. A hang a kigen thei lo, mawhsak ding a om thei lo thu pawlkhatte hangin kilunggim mahmah thei hi. A zaw deuhin lamet loh kaal, lamet lohte tung pen ahi a, pamet lohna lam pan ahi zongin lungkham nading, buai nading thu tuamtuam hong tung thei hi.

Tua bang hun ciangin ei bek a genthei, ei lamah kua mah a pang lo, ei lo khempeuh a lungnuam ding bangin kimu thei hi. Midangte lungnopna in ei hong zahpih, hong eng bawl bang lai ding uh hi. Na lungkham mahmah lam hong thei lo mi khat in hong maitai ciangin na heh a suah hun om thei kha ding hi. Tua bang hunte na thuak ciangin phawk ding thu pawlkhat kisam hi.

1. Na biak a nungta Pasian in bang deihna nei hiam cih phawk masa in. Ahih hangin lungkham haksatna khempeuh Pasian in piangsak lo hi, cih zong phawk pah in. Lungkham haksatna pawlkhatte Pasian kigaeh kha ahih manin a bawl lo a piangsak lo Pa in hong sepsak lo ahih manin sawtpi sung kilungkham thei hi.

2. Lungkham haksatna na thuak ciangin picin ding kisinna hi, cih phawk den in. Lungkhamna pen lungkhamna hi ci-in na muh manin tua in na lung hong khamsak semsem hi. Hong lausak semsem ahih manin lungkhamna na tuah ciangin bangci cih ding na ngaihsut ding sangin lunhkham a na om ding na phawk masa zaw den hi. Haksatna lungkhamna cih pen nawk ding hi a, nawk ding na ngaihsutna, na gelna hangin thu na mu semsem dinga na picing semsem ding hi. Thuakna a om ciangin picinna om thei pan hi.

3. Lungkham haksatna na thuak ciangin na muitum bang a hiam cih phawk den in. Lungkhamna neucik khat na tuak ciangin na lung a kiat pah leh tupna nei lo na hi kha ding hi. Tua ahih manin lungkham haksatna na thuak ciangin na lungtup bang hiam cih phawk den in. A lungkua baih mi a tam zawte lungtup nei lo, muitum a nei lote ahi uh hi. Tha a lak nading uh on lo, tua mun tua ciang ka tun mateng ci-in a mailam uah a lamet ding uh, a thalawp nading uh om lo ahih manin lungkia-in puk pahpah uh hi.

4. Lungkham haksatna na thuak ciangin na kiangah hong thuakpih ding, tha hong pia ding, nang hong panpih ding na innkuanpihte, na lawm itte om hi, cih phawk in. Thuak hak na sakna a omte zong na lawm it taktakte le na innkuanpihte tungah na lungkhamna na sung khia thei hi. Khat veivei ciangin lungkhamna a om ciangin khat guak bek in tang thuak ding sangin mi khatpeuh tungah sung khia le’ng a nuam tuam tawh kibang thei hi. Mi khat bekbek in na thuakna hong theihpih kha phial zongin tua mi khat hangin tha na la kik zo lai veve ding hi.

5. Guallelhna hangin na lung a kham ciangin na lungsim sungah nang le nang a guallel bangin na kingaihsun kha ding hi. Tua bang hun ciangin na lungsim ngaihsutna thakhat thuin langdo sawm kei in. Khat veivei ciangin lungsim thuakna langdo luatna in lunggimna suak zaw thei hi. Guallel na hih manin na lungsim in guallel ci-in a ciamteh ahi hi. Tua ahih manin a guallel bangin kingaihsun phot inla ahi zongin lungkia kei in. Guallel cih pen lungkiat nading ahi kei hi. Na lungsim sungah guallel na kisak khit ciangin bangci cih leng gualzo kik thei ding cih ngaihsun kik inla thasan in. Guallel napi gualel kisak theih lohna zong hoih tuan lo hi.

6. Na guallelh ma, na lungkham ma, na lung kiat ma-in na lungnopna bang a hiam cih ngaihsun kik inla phawk den in. Gentehna, na sep na bawlna khatpeuh ah, lawhsam napi na lawhsap ma na nasepte sungah nuam nasak, lungkim taka na sep na bawl bang on a hiam, na pumpi gim mahmah napi nasem banga zong na kingaihsut khak loh, ngaihsut haksa mahmah hi napi na lung a kham luat loh, lungkham dinga zong na tuat khak loh bang om a hiam, ci-in na lungkham ma, na haksat hun ma na tuah lungnopna pawlkhat ngaihsun kik inla phawk kik in. Tuate in na haksatna na lungkhamna mun panin hong huh thei ding hi. Na lawhsak sa khat a kipan kim ding na hih leh zong tuate hangin tha na nei kik zo ding hi.

7. Bang hangin lungkham na hiam, bang hangin haksa a hiam cih pen nang le nang na kiphawk kik ding thupi hi. Hih na nasep pen nuam a sa ngiat lo na hiam, na sep cil a kipan na ut mel loh khat a hiam, na sep na kuan sim-in lawp ngai lo na hiam, cih na ngaihsut kik ding thupi hi. Thu khatpeuh hangin na lunggim ahih leh na lunggimna a hang bang a hiam, na lunggimna thu le nang bangci kisai na hiam cih zong na sittel ding thupi hi. Bangci cih ding cih na ngaihsutna hangin a lunggim na hiam, ahihkeh lunggimna ngaihsunsun a lungkim kik hi zaw na hiam?

8. Leitungah a kip khat zong om lo hi. Na khempeuh a kikhel kawikawi ahi hi, cih na phawk ding kisam hi. Nopna a kip loh mah bangin dahna, lungkhamna le haksatna cihte zong kip lo ding hi. Nop hun a on mah bangin dah hun zong om ding hi. Ahi zongin a koi zaw sawt ki-uksak ding cih pen nang tungah kinga ding hi.

Mihingte khuavak tang sungah sawt kiom nuam ahih manin meivak kitangsak a, ihmut hun sung bek khuamial sungah kiom zaw deuh hi. Ni tum a khua a mial a kipan khuamial sungah na om nop kei leh meivak na neih kul ding hi. Tua meivak pen cimna tawh a kithuah pilna ahi hi. Pilna cih pen paunak laigelh pa in, “TOPA zahtakna in pilna kipatna hi,” na ci hi. Job Cinpi (Zomi Laisim Nuamte)