Lorry mawtawpi khatin palik numei khat denglum khadektak

Lorry mawtawpi khatin palik numei khat denglum khadektak

Malaysia, Kuala Lumpur khuasung ah tuni Monday zingsanglam in lei apua Lorry mawtawpi khatin palik numei khat denglum khadektak cih NST pan kiza hi. Tuni Monday zingsanglam 10am hunpawl in Jalan Bukit Jalil ah thupiang ahihi.

Lorry mawtawpi pen lei adimin apua hi a, Police Inspector Nur Syahirah Ahmad ii a mawtawhawl makhelhding in akithawi laitak in hoihtak hawlthei nawnlo in akipuksuk hiding kici hi.

Police numeinu ii ahawl mawtaw pen Honda Jazz hi a, Lorry apuksuk ciangin anunglam dengkha in zangawp hi. Ahi zongin Honda Jazz sungah ahawl in aom paliknu pen denglum khalodeuh in suaktathei bilbel hi.

Tua paliknu pen kum 28 aphakhin khat hi a, Serdang district police headquarters Commercial Crime Investigation Department ah investigating officer asem ahihi. Tuni zingsang in nasem kuandingin apai laitak in lamkal ah atuahsia ahihi.

Tua paliknu in agenna ah Accident apianmadeuh in tua Lorry in Left Lane panin hong makhelhsawm in Horn hongtum sansan hi. Lorry Driver in tamveipi Horn hongtumsan a, ahi zongin amun ottheihpak nading omlo hi.

Tuakawmkal ah themkhatkhit ciangin tua Lorry pen hongtuksuk a, ka mawtaw ii anunglam hongdengkha cih kaphawk hi. Ahi zongin ka mawtaw ahawl in katutna lamsangpen hongdengkhalo bilbel hi ci’n genkhia hi.

Ageinai ah aom Bystanders te’n ka pusuahtheih nadingin hong huhsawm uh a, ahi zongin mawtaw kongkhak pen awkcip hi. Anunung ah Car Window panin apualam ah ka pusuak khiathei cihi.

Ka mawtaw pen asiatzancip hangin, ami bangmah kaliamloh pen ka lungdam mahmah hi ci’n Jalan Bandar Traffic Police Station ah Police Report abawlkawm in genkhia hi.

More: Singapore pan Malaysia azuan Bus khatleh Lorry kiphukha, mi 14 liam

Tua Lorry pen lei apuasa in Bina Form Sdn Bhd Constrution panin apaikhia hi a, Puchong lam zuandingin apailaitak ahihi. Lorry Driver pen accident apiankhit ciangin taimangcip ahih manin, aki zonsan laitak hi ci’n City Traffic Enforcement and Investigation Department chief Assistant Commissioner Zulkefly Yahya in genkhia hi.

Lorry anei Company te kiangah Police te’n thu zasak in, tua Lorry Driver pa kantheih, mattheih nadingin ahanciam laitak uh ahihi. Sawltak #zomidaily