T – Tedim Pau eima Pau ~ Kung Za Mung

T – Tedim Pau eima Pau ~ Kung Za Mung

Ganhing leh mihing i kilamdanna alian penin kampau ahi hi. Husang thei khempeuh lakah mihingte bek kam pau thei hi. Laisiangtho hong genna bangin Biabel tausang pan pau tuam hong kipan hi. Mual leh guamin hong hal ciangin kampaute hong kilamdang semsem hi. Zogam ah mualpang khat leh alang khatah pau kithei nawnlo bang om liang hi.

Mi tampi in azat kampau pen pau thupi ahi hi. Kampau piang masa in, lai piang nunung zaw hi. Mihing zong ki pauthei masa a, lai kisin nunung zaw hi. Lai pen thupi a, kip mahmah napi, kampau in a kizat keileh tua lai pen laisi ahi hi. Nidang lai-in a kizangh mahmah kampau pawlkhatte, tuin laibu bekah omin apau mi om nawnlo hi. Mencim in minam khat hong vuknelh zolo hi. Midangte in hong nawmvalh leh minam kici mangthang ziau hi. Zomite citawm kawmkalah kithutuak lo, paunam tamlua in, sialek denkeek tawh kibang hi. Zomi hi-ing akici ciatciat eima pau ciat tawh kiho lehang kitello ahih manin Kawlpau peuh i kawm hi. Zomi bupin pau tang neih ding hoihsa hi hang. Tua pautang pen eima pau ahih ding utciat zel hi hang. Tua hi a, zomi pautaang pen i thukim kei zongin tu tadih Kawlpau hi lel hi.

Eimite i pau ciangin Kawlpau Vaipau tampi kihel khata hi. Tua hangin simlama zomite leh mallam a zomite i pau kitel nawnlo dekdek ta hi. Eipau ah aom pipi namdang pau zatsak se hi hang. Tua hi le hi kampau hong dai semsem ding hi. Tu nangawn in zomi khangnote Kawllai tawh zawllai kikhak ta uh hi. Hih thu in a dahhuai thu ahi hi. 1987-88 laisin kum in Yangon Education University ah sang ka kah hi. Zanggam zomi Salai Peter tawh ka ki-uitui bilbel hi. Ama hong genna ah Kawlgam suahtakna ngah khit hunin Ashio kici zanggam zomi tul 500 pha hi. Tu-in (1988 kumin) tul 150 bek om hi ci hi. Asi hi lo in, Zopau thei nawnlo uha, mi mangthang asuak uh ahi hi. 1988 leh tu kum 2006 kikalah Ashio Zopau athei nawnlo bangzah akhang lai tam? Zogam khanglam Kanpetlet khuapi uksung Hmuchimdim khua ah 1985 kumin sangsia ka vasep lai-in zaang leh khamcin khuate ah zan kataam zel hi. A khangham nupi papite Zomi vai lai mahmah uh hi. Ata atute uh bel ki-kawlsak mahmah ta uh hi. Zolai lah neilo, a nungta Pasian lah bialo uh ahih manin Zomi kicih ding bang maizum tuak uh hi. Tua dan hi leh mailam khangnih khangthum ciangin Zomi mel pipi minamdang kici ta ding uh hi.

Mualtunga zomite bel lai leh pau nei bek hilo, a nungta Pasian nei ihih manin i pau i lai bei pak lo ding hi. I puah i zuun kei leh bel, khangto zolo ding hi. Zomi i cih ciangin Kawlte in “Chin” hongcih mi khempeuh ahuam hi napi, tulai takin i zatdan ah kamphen kullo Tedim, Tonzang, Kawlpi, Tamu, Mizogam, Manipur leh leitung mun tuamtuam a zomite aci hihtuak hi hang. Gentehna in “Zomibup Pasian Phatna, Halleluijah Lapi Sakna”, icih ciangin i lawm zomi adangte i lungsim nangawn ah helkhak tuaklo hi hang. Zomi icihin koiciang huam cih pen dam ngaihsut ni-in, tu in Tedimpau atel zomi ciang huamin Tedimpau (Zopau) eima pau ahihna thu gen dih ni. Zomite nidang lai-in minam thupi hi a, lai zong nei napi, laigelhna savun ui-in hong neksak a kipan lai neilo minam suak hi hang i ci hi. Zomi bupin savun khatbek ah na gelh kei le uh hoih ngel ding hi ven. Lai thei buang, adang na gelhkik le uh ai ve. Tu in i tangthu kibansam keei hi ven. Bangbang hi taleh tu in Sangmang Cope topa in hong bawlsak Zolai nei-in kumza bang hita lel ahih teh hampha veve hang.

Tu laitak i zolai pen Mikangte’ Zawma laimal mah ahihna zong Pasian’ thu pha ahi hi. Manglai zatna mun khempeuh ah zolai kizang ziauthei hi. Tuabang hi kei leh zolai laikhetna, computer cihte khempeuh bawltawm kul ding hi. I kampaute tawmtawm kibang lo hi. Ahi zongin, kamphen kullo hi. Laigelhna ah bel i vekpi in kibang hi hang. Tedimpau tawh LST simin la is a hi. Tedimpau icih ciangin Pu Ngul Lang’ ciaptehna mah bangin Tedimah minam tuamtuam hong teenkhop ciangin hong piangkhia tua minam khempeuh in a neihkhop pautaang ahi hi. Tedim ah ateeng ngeilo zomi khatin Tedimpau alangpan vinven leh khial mahmah ding hi. Hih thu hangin Zolaibu sungah “T-Tedimpau eima pau,” a kici ahi hi. Kampau nam tampi kigawm ahihmah bangin Tedimpau pen kampau namkhat bek sangin kicing zaw, zat nuam zaw hi. Gentehna in “g” leh “ng”, “th” leh “s” cihte kikhen sitset hi. Ama khiatna ciattawh om linlian hi. “Thu gen” leh “thu ngen” kibang lo hi. “Sum” leh “thum” atuamtuak hi. Tedim pau ah akicing nailo kammal tepen pau tuam tuam pan behlap a, zat ding ahi hi. Pau tuam icih ciangin Tedimpau hong piankhiatna paute ahi Dim, Teizang, Saizang, etc….Zopau namsawm teng leh Mikang, Mivom, Sen cih bang paute a vekpi icih nopna ahi hi.

Gentehna in Tedim Labu sungah ST Hau Go in,
“Na tokhom maiah, tawlkhat sung bek mah Thungen in kong khukdin zong;
Lawmta bangin lungsim kumkhawm in ah ka lung hong nuam mahmah khong”

ci-in laigual nihna a nunung pen kammal “zong” tawh aw kihual dingin laigual tawpna ah Saizangkam ahi phadiak “khong” hong zang hi. Tedim pau in “khong” pen “mawk” ahi hi. Laphuah ngeina tawh a kituah ban ah “mawk” sangin “khong” in thupi suahsak zaw a, lasakdan zong nuam zaw hi. “Computer” pen Zopau suah in “set khuak nei” icih hangin kuamah in hong zatpih ngei kei leh a khiatna om lo hi. Leitungbup ah minam khempeuh in computer acih pen ei zong eipau suaksak a, computer cih sukpah ding hi lel hi. Mangpau ki cing hi , icih zong leitang bek buluah loin kampau tuamtuam abuluah hang uh hi kici hi. Ei zong kammal tampi buluah toto ding hi hang.

Tu-in adahhuai thu i gen ding hi. Tedimpau tawh labu tuam tuam bawlin, Tedim labu ci-in bukhat bek ineih lai hun pen, kipumkhat hun, lametna om hun ahi hi. Tuhun ciangin a kawcik lua minam itna hang maw, kipil saka, panmun deihna hang maw thei khang. Eima pau ahilua Tedimpau pen midang kampau in ngaihsun khial kha in, Tedimpau hong piankhiatna i paubulte khat peuh a paksak zaw i omta hi. Tua pen khantohna hilo in kiamsuk na hi. Kipum khatna hi lo in kikhen thangna hi zaw hi. I kampau khempeuh kigawmna ahi Tedimpau tawh laibu bawl le hang bu tulkhat ciang bek nangawn zuak zawh nading a baihloh kawmkal ah sehsat in nensuah lai lai ding ihi hiam? Laitan tam i neih, lai tam i theih pen minam phattuamna, khantohna hi zaw hen la, a sukham, a balkek lamah pang kei le hang hoih zaw ding hi.

Leitung ah nisim naisim in pau kitamzat kampau liante in a kitawmzat kampau neu te nawmvalh in mi omlai napi, kampau mangthang ziau hi. Pau anei nawnlo minam pen kampau azatte minam asuak hi pahpah hi. Tedimpau pen pau tampi kigawmna pan hong piang, khantoh a manawh kampau kimlai, ipuah izun kei a, i balnen leh sawt hong thuak zolo ding a, Zomi mel gemgam pipi, itu itate in minamdang kampau zangh guapguap thei ding hi. No.(1) BEHS, Kalaymyo ah sangsia kasep lai-in Kawlmi S.A.T khatpa in “atak takin kapu pen zomi hi” ci hi. Ciimnuai Pilna Sawm ah anhuan ukpi asem Kawlpi khuanawl Kanpale pan Daw Kyi Htay in zong tuabang mah ci hi. Amau bel Zomi ki ci lo uh hi. Ngaihsut huai mahmah hi. Tu a kampau neuzaw i puah pen i neihtaang Tedim pau, Zolai sangin lametna a omzaw ahihhhh leh puah khawm huai ding hi. Kampau nam sawm kigawmna sangin namkhat bek hong hoih zawk ding, hong kicin zawk nading bel mualmong lungngaih bang ahi hi.

Hun masa lai-in TEDIM LABU i-in pawlpi tuamtuam in labu khat bek kizang hi. Nopna dahna khempeuh ah la kisa khawm thei hi. Kipum khatna om hi. Tu-in thu tuamtuam hangin pawlpi kikhen khen in labu tuam neih pawlpi tam simsim ta hi. Kipilsak, lai kisiamsak in a teikhia masate hawmthawh in puah nemnum, khel neknuk hi hang. Nopna dahna ah mipi in la kisakhawm thei nawnlo hi. Vantung tuna ding hong kipelhsak liang ahih leh khel huai mah hi. Tuabamg hi lo pi, “in” mun ah “a” peuh taw hi laihsuk i laihtoh pen min deihna, kiphat sakna, minam kipumkhat kimlai khenkhapna ahih lam theih tuak khol lo hi hang. Judahte zong Pasian umlua kisa in Pasian ahi Topa Zeisu bang singlamteh tungah na that khakiang uh hi. Ei zong lai siam lua, Zomi it lua in i pau i la ii sukmang khak ding lauhuai hi. Pilna khangto mahmah a, mailam hunah zong tu laitak in a kipilsak eimah sangin a kipilsak zawlai mi tampi hong piang lai ding hi. Tua mipilte in eima khekhap hong zui leh pawlpi khat sung nangawn ah Laisiangtho leh labu namkhat hong ki zang thei nawnlo ding hi.

Tua hileh i kampau zui-in pawlpi phuat hong kul ding hi. Tua kampau kibang pawlpi sungah ahau, unau kicing upa khatin, kumcin upa kiteelna ah hong ngah nawnkei leh thu khat paulam in pawlpi hong phuan dinga, Laisiangtho leh labu atuam hong bawlzel ding hi. Tua “beh pawlpi” sungah lungdambawl ankhing hangin abawng akhil in pawlpi hong piang leuleu leh Laisiangtho leh labu thak hong kulzel ding hi. Beh khilkhat pawlpi ah anpal kituhna hangin innkuan khat ciat pawlpi in hong ding leh Laisiangtho leh labu pen Zokam veve version hau ngel ding hi hang. Tuabang in ii khenkhap zawk man in, i kampau hong kinawmvalh sak khin zo zawlai ding hi. Labu puah loh phamawh ahih leh zong, i minam leh pawlpi khempeuh ahuam zo kipawlna min tawh nasep huai hi.

Hih thu amu minamte in apau alai uh aman thanlohna dingin kipawl khawmin nasem uh hi. Indonesia ah pauneu nono 250 bang om hi. Zumlai dingin BAHASA kithukim in zangh uh hi. Eima pau pen kamphen akul lah hilo, bang hangin itlo ihi hiam? A kawcik lua minam veina leh “KEI” cihnate nusia in kikhen thangna pan kigawm kik ni. Hun khem peuh ah i zatsiam nai kei zongin laigelhna leh mihon mai thugenna peuhmah ah i vekpi neihsa ahi Tedimpau zatna tawh minam itna kal masa suan ciat ni.

Siapi Kung Za Mung
B.A (Eco); B.Ed.(Credit); M.A (Theo.Magna Cum Laude)