London khuasung buaina pen IS te’n ko gamtatna hi ci’n pulak

London khuasung buaina pen IS te’n ko gamtatna hi ci’n pulak

IS te’n London khualaizang British Parliament geiah buaina apiangsak pen ko ii galkapte khat ii gamtatna hi ci’n pulakkhia uh cih AP News pan kiza hi.

IS migilo tetawh akizom Amaq News Agency te’n Thursday ni agenkhiatna ah London khuasung British Parliament mai ah buaina apiangsak papen kakipawlna uh Islamic State panin ka galkap khat uhhi ci’n genkhia uhhi.

Tuaban ah hih asipa ii nasepding in akisawlpen IS te lehdoding in akithawi Citizens of Coalition te muitum in Operation khatpeuh abawlding agamtangding in thu akipia ci uhhi.

U.S. ii makaih Coalition sungah akihel te ii agammi te pen Target in neiding, muitum in neiding hihang ci’n IS makaite’n anautangte uh hanthawn thapai uhhi.

Tuamah bangin leitung gamtuamtuam ah IS migilo te’n ngongtatna tuamtuam bawl uh a, mi tampitak in sihlawhkhin hi.

Tutung London khuasung buaina ah agamtangpa pen Britain’s Government in amin apuam genkhiatna bangmah akician in neinailo uhhi.

Zanni London khuasung buaina hangin Parliament Square, Westminster Bridge leh akiim apam aom lampite tunidong kikhakciplai a, Police te’n cingdimdiamlai uhhi.

Prime Minister Theresa May in agenkhiatna ah zanni London khuasung buaina hangin tuahsiatna athuakkha tepen gam 11 pan kihel cihi.

Tuate pen 12 Britons, 3 French, 2 Romanians, 4 South Koreans, 1 German, 1 Pole, 1 Irish, 1 Chinese, 1 Italian, 1 American, 2 Greeks cihbang hi a, tuate pen zato ah zatui zaha akisam bangin akibawl laitak cihi. Police te’n agenkhiat masakna ah zato alum mi 29 lakah mi 7 tepen gimmahmah uh, huaisia mahmah cihi.

More: London khuasung ah Terror Attack hangin mi 5 si, 40 liam

CNN Breaking News pan tumah in akizakna ah London Terror Attack vaitawh kizom in mi 8 kimankhin ta cih kiza hi. Zanni akizakna ah London khuasung buaina hangin migilopa tawh asi akigawm in avekpi mi 5 hi a, aliampen mi 40 bangpha cih kiza hi. ZD Sawltak #zomidaily