Indonesia gamsung ah lokuan numeikhat gulpi in valhlum

Indonesia gamsung ah lokuan numeikhat gulpi in valhlum

Indonesia gamsung ah numeikhat mehhuan bawlin akuankhia hi a, inn ciahkik nawnlo in mangcip hi. Tuaciangin tua numeinu ii mehhuan bawlna geinaiteng akizon kawikawi ciangin Python thampi khat kimu a, tua thampi in numeinu avalhlum ahihlam kitheikhia cih AFP pan kiza hi.

Indonesia, Sulawesi, Muna Island tung aom Persiapan Lawela akicihna khuasungah zanni Friday ni in thupiang ahihi. Numeinu pen amin Wa Tiba kici a, kum 54 aphakhin khat ahihi.

Tua numeinu pen alokuanna, nasepna panin mangcip ahih manin, akizonzon ciangin Python agilvah mahmahkhat kimu hi. Tua thampi in valhhi ngelngelding cihtawh tua thampi kiman in, agil aki kheikhiat ciangin tua nupinu pen gulpi ii agilsung ah asisa in akimukhia ahihi.

Numeinu avalhlum thampi pen saumahmah a, asauna Pi 23 Feet (7 meter) tak ahihi.

Local Police Chief Hamka kici in agenkhiatna ah khuasung mipi te’n tua numeinu pen aciahloh ciangin zonghuanpah ngeingai uhhi. Gulpi agilvah mahmahkhat amuh uhciangin numeinu valhlum hiding cih ummawhpah uh a, tua gulpi thatlum in, agil akheikhiat uhciangin numeinu akimukhia ahihi ci’n genkhia hi.

Numeinu pen lokuan aciahtheihloh ciangin ameltheih tanaute leh khuasung mipi akigawm in mi 100 val bangin zonghuanpah ngeingai uh cihi.

Video: An Indonesian woman has been found in the belly of a giant python after the swollen snake was captured near where she vanished while tending her vegetable garden, police said Saturday. The body of 54-year-old Wa Tiba was found Friday when villagers cut open the seven-meter (23-foot) python.

https://www.youtube.com/watch?v=sKSQ2I95DJU

Police Chief in agenbehna ah amangcip numeinu ii akhedap leh atamta puakte akimuhna panin 30 Meter aki gamlakna munah tua gulpi pen aki mukhia cihi. Gulpi pen agil aki kheikhiat ciangin numeinu pen alulam panin avalhsuk masa ahihlam kimukhia hi. Apumpi avekin akizomsa mahin gulpi sungah kimukhia hi.

Indonesia leh Philippines gamsung ah Giant Python akici thampi agol phadiak, atawmpen asauna 6 Meter val aphapen kimuthei zelzel hi. Hih thampi te’n gamsung gamsa tebek nezaw, nomvalhzaw uh a, mihing taktak ane gulpi pen kitamtheih luatlozaw hi.

More: Bangkok khuapisung pan kumkhat sungin gul 4612 kimankhia

Nungkum March khasung inzong Indonesia, Sulawesi Island aom Salubiro khuasung ah Python gulpi khatin lokho pasal khat valhlum ngeihi. Adiakdiak in Indonesia gamsung ah gulpi in valhlum cih thuthang omthei phadiak hi. Sawltak #zomidaily