Lim hilel e i ci ding hiam?

Lim hilel e i ci ding hiam?

Nitak sim in ih lupna tungah lumden hi hang. Tua ih lupna khansungah a lian mahmah dawi lim khat suangleng bang a ci tam? Ih mang a hoih tam? Tua ahihkei leh a lau i om tam? Tua ahihkeileh tuabang dawi lim a deihlo, a suangnuam lo vive i hi zaw tam?

Tua dawi lim, luguh a nei, ki a nei, a hapak a dawk viavua leh a lauhuai mahmah lim pen ih lupna khansungah suan dingin a deih i om ding hiam? Kua mah ki omlo khading hi. Tua ahihleh tua lim a taktak lah hisam loaa banglau dingom hiam ci in dotna om ding hi.

Tua leh tua lim a kihta maw? Lim in hongpet thei maw? Pasian um lo maw? Tua pen i muh lim in ih nuntakna sungah daitak in na hongsem a hihman ahihi.

A deih huai lim

Na lupna khansungah nupa ki it mahmah lim a hihkeileh naupangte ihmu hithiat in tualaitak in Pasian in thupha a pia lim khawng hileh e? Ihmut laitak in Pasian hong ompihna, vantungmite hongcin hongkepna laisiangtho kammalte laimal golpipi khawngtawh na ki at leh e, tua khansungah i lum nuam ding hiam?

A masalim tawh koipen cidam huai zaw ding hiam? Koi pen in hong lungnuamsak zaw ding hiam? Mikhempeuh phial in lim hoih mah deihzaw, tel zaw ding hi. Tua te lim hilel e ki ci thei lo hi. I muh limte in a ginglo in thu hong gengen ahihi. I et sim, i muh sim in thu khat hong gen hi. Tuabangin nisim in thu hong gengen ciangin ih sunglam pan in ki um hi.

Muh theih dingin lim bawl ni

Mittawh muhna thusim i zat theih nadingpen hamsa hetlo hi. A masa pen in i deih van le na, a hihkei leh i piannop dan kician takin theih masak ding ahihi. Tua khit ciangin a lim aa bawl ding hilel hi. Tua limpen i muhdentheih nading, i etloh hangin zongh i muh veve nading munte ah koih ding ahihi.

A neisa, a piangkhinsa bangin a lim bawlthei leng hoih penpen hi. I lim pen en napi, mu napi, ih sungtawng pan in i deihloh khat, i up vet loh khat hileh pen hoihlo hi. I suan lim pen i deih leh piangzo dinghi ci aa i up mah a hih ding kisam hi.

I gensa mahbangin na up vetloh khat a hiphial zongin na sungah hong tengin na theihloh kal in na hong sem veve lai ding ahihi. Hihthu pen a kikhel ngeilo thukhun kip (universal law) ahihi.

Ni sim in huntuam khat la in enzo den leng hoih pen hi ci in mipil te’n gen uh hi. Minute 15-20 cih bang en zo den leng hoih mahmah hi. Tuabangin i en zo kei zongin i phawkkhak loh kal aa i muhna in zongh nalianpi ih sunglam ah piangsak hi. Baihlamtak a Nalianpi Sepna/ Siamsin Library