Leitungbup Ekbuk Kipawlna “World Toilet Organization”
Leitung ah kipawlna tuamtuam aomlak ah ihzakngei pakpak khollohding khat ahi “World Toilet Organization” pen 2001 kum in Singapore gamah ana kiphut ahihi. Ei Zopau in “Leitungbup Ekbuk Kipawlna” akici zawzending ahi hih kipawlna te deihna lungtuppi pen thupi mahmah a, leitungbup ah cidamna tawh kituak in ekbung siangtho neihkimding cih ahihi.
2001 kum in Member 15 bektawh Singapore ah aki phuankhia ahih hangin tu’n leitungbup gam 53 ah kizel dikdek bekthamlo, Organizations Member zong 151 phatota hi. Hih kipawlna pen Global Non-profit Organization khat hi a, leitungbup in ekbuk siangtho neihkim nading nakpi takin hanciam mahmah uhhi.
Tuaban ah “World Toilet Day” ci’n November 19 nipen ciahtehna nei uh a, kumsim in November 19 ni atunsialsial in ekbuk pawi kibawl hi. Tuabek thamlo in kumsim in gamtuamtuam ah “World Toilet Summit” bawl kawikawi uh a, NGOs leh Government tuamtuam panin ulian tampi kihel den hi.
Hihbang in Ekbuk Summit abawl uhciang in leitung ah Ekbuk asiangtho leh nuamtak in zattheihding Ekbuk akicing neihnading aki kum uh ahihi. World Toilet Organization hongpankhia Founder Jack Sim in hihbang in Mangkam tawh Summit ah genkhiathei zel hi. “I hope people will join hands to create a better world with safe, comfortable and clean toilets.”
Abeisa kumte ah World Toilet Summit akibawl ngeina gamleh khuapi tengpen hih anuai abang ahihi.
- 2014 – New Delhi, India
- 2013 – Solo, Indonesia
- 2012 – Durban, South Africa
- 2011 – Hainan, China
- 2010 – Philadelphia, Pennsylvania
- 2009 – Singapore
- 2008 – Macau, China
- 2007 – New Delhi, India
- 2006 – Moscow, Russia
- 2005 – Belfast, Northern Ireland
- 2004 – Beijing, China
- 2003 – Taipei, Taiwan
- 2002 – Seoul, South Korea
- 2001 – Singapore
2011 kum ii World Toilet Summit pen China gamah kibawl a, tuapen a 11 veina ahihi. Leitungbup in lunglutna aneihtheih nading in hih World Toilet Summit ah ekbuk tutna atamman mahmahkhat kibawl in kilakkhia hi. Tua ekbuk tutna Commode pen kham (Gold) tawh akibawl hi a, sumtang £129,500 bei in tua ekbuk tutna akibawl cizawzen hi. Ih Zogam ah ekkawng zong kineilo a, innkadawn tungkhawng pan aki peksuk ziauziau hi a, hihzahzah atamman ekbukvai pen Zogam aom ih mipihte genkhaleng lamdang salua mahmahding uh a, umzolo phialding uhhi.
A lunglut te’n hih link http://worldtoilet.org ah ki simbeh theiding hi.
Leitungbup ah mihing 2.6 Billion bangin Ekbuk kician neinailo cihzong WTO Founder Jack Sim in genkhiazel hi. Mihing 2.6 Billion cihpen leitungbup mihing khempeuh ii 40% bang hi a, tuateng in ekbuk kician aneinailo himawk hi. Adiakdiak in mizawng gamte pan hiphadiak a, ei Zogam zong Ekbuk kician neizolo sazian ah kihellai kha ngelding hihang. ZD Sawltak #zomidaily
Comment piaknop aomleh...