Zo vontawite laitual lenna Swe-tui vangkhua – 5

Zo vontawite laitual lenna Swe-tui vangkhua – 5

Swedese-te Ka Muhdan – Lungdamna Thu Nuntakpih (Witnessing the Gospel) Amaute in lungdamna thu kampi bek tawh gen sangin zuihna thupisak zaw ka sa hi. A nuntakzia uh Lai Siangtho hong hilhte tawh kituak mahmah hi. Amaute in lungdamna thu nuntakpih takpi uh hi. Bang hang hiam cih leh thuman uh hi. Citak uh hi. Hahkat uh hi. Biakinn pai a tam zuahzuah loh uh hangin Pasian’ deihna bangin gamta ka sa mahmah hi.

Thugen siam ih cihte pen a dangnalte ahi pah kei, a gen bangaa a nungtate hi zaw: lasa siam ih cihte zong a aw huang khempeuh hi pah sam kei, a sak bangaa a gamtate a hi zaw; tua bang mah in Khristian mihoih ih cihte zong a zak ciang bek tawh a khawlbawlte hi lo-in, a zak thute a hoih a hoihlo telkhehin a hoih-a gamtate na hi zaw.

Daihna Gam(Peaceful nation)

Nidangin Roman kumpite piak thei daihna pen Pax Romana kici aa, tei leh nam tawh a kiphut ahi hi. Khrih hong puak kilemna ahih leh itna tawh kidim daihna Pax Christie ahi hi. Sweden gam pen gal a do loh uh kum 200 val phata hi, ci uh hi. Daihna-lemna lamah leitung a makaih gam khat ahi hi. Kongzin-aa vak zuazua cih peuhmah omlo aa, a kisap keileh pusuak khollo uh hi. Dai ngait uh hi.

Gam Dumden Gam ( Enviromental Conservation)

Khuahun leh singkung lopate a hih theih zah un kem ahih manun a gam sung uha om luite, gunte, bualte nin cih peuhmah om ngei hetlo in, dum kilhkelh mawk hi. A singkungte uh leh paakte hing silsel ahih manin a dumden gam( the greenest country) cih min ngah uhhi. Gamlum siasua cih peuhmah omlo-in Kawlgam bangin motor pickle cih peuhmah omvetlo hi.

Khuahun hoih nading ma pang pha mahmah uh hi. A gam uh ah leisung sumpiang sik a kitawh aa, a bei leh a tote in a tawh ma-a singkunglopa a omsa bangin singkung suansakkik ding cih, gam thukham ah om ngiat hi. Ahi zongin a sik a cian laileh nusia theibek uh hi. VAXJO khuapi pen Europe gamah a hing pen leh a eng pen khuapi ahi hi.

Liangko Kikimna Thupisak( Human Dignity and Equality)

Mi khempeuh liangko kikimin Pasian in hong bawl hi , cih pom uh ahih manin mi khat ciat in manphatna nei uh hi. Kisimmawh kibawlsiat, pheisa liangsa, simta malta cih kideidanna nei khollo uh hi. Lam khatin gen ni cileng mihing ginatna( human dignity), leh mihing thupina ( human rights) nasia takin pibawl uh hi. Mun khempeuhah mitaw-khelbaite leng tawh a pai thei dingin lampi bawluh hi.

Kuhkal takin kum khat in kha 8 sung na a sep nak uh leh khali mangin, khasum sang thei veve ci hi. 1919-1921 pek in numeite in gam makai kiteelna ah mee (vote) pia thei khin zo hi. Innsung nasep hawm diamdiam uh hi.1979 kumin taupapen in nu leh pa’ zaluahna leh gamhluahna nei uh ahih manin Queen Victoria in Sweden kumpi’ gui luahsuk ding hi.

Sikan(discipline) Nei Mahmah (Ethics and Etiquette)

Sweden te pen a sepna a bawlna uh leh a gamtatna khat peuhpeuh uah sikan-discipline nei mahmah uh hi. Nin mawk paihlo uh hi. Cil mawk siatlo uh hi. Zun mawk thaklo uh hi. Hun man pha mahmah uh hi. Mite’ nawngkai sakkhak ding kidawm pha mahmah uh hi. Hopih masa kei leng hong thudon lo tawh kibang na pi: hopih lecin hong thunuam mahmah ding uh hi.

Lungsim Pha Nei (Good Morality)

Kumpi hoih aa, gammite zong kumpi tungah hoih hi. Kumpi in gam mite ading a hihthei tawpin na sem aa, gam mite in zong ahih theih zahun siah piak-aa kipan lungeiang hetlo-in kumpi huh uh hi. Lungsim pha( sense of civil society) neituak uh hi. Mipite in na sem masa phot uh aa, tua tungtawnin kumpi in panpih cidan tawh kalsuan zaw uh hi.

Thu Hialbawlna

Nitak simin ko a pai teng in ka sin uh thute, ka muh uh na tuamtuamte leh mun tuamtuamte’ thu kikupkikna leh etkikna(reflection) ka nei tawntung uhhi. Pasian’ thupha hangin a cina luna ka om het kei uh aa, annek tuidawnte leh khuahun tawh zong ka kilemtek uh hi. Banglo teng tawh hun hong cingziau ahih manin 17 May nitak 2:30 in TG 961 tawh Arlanda Airport pan kong ciah kik uh aa, Bangkok panin TG 303 tawh 18 May zing 9:30 pawlin Yangon cidam takin kong tungkik uh hi.

Sweden ah khual ka zinkhakna sungah Ljusdal-aa om mipihte Zomi Innkuan Sweden tawh ka kimuh khak mah hampha ka kisak penkhat ahi hi. Ka lawm Kayinte leh Khalkhate in a mipihte uh tawh a kimuhnop uh hangin a hunlapin thu geelkhollo ahih manun a hun cin ciangin ka siate un phalnawnlo hi. Suang Khen Pau