Leitung Lungdam Topa Hong Pai

Leitung Lungdam Topa Hong Pai

Luka 2:10-11: Ahi zongin vantung mi in, “Lau kei un. Mi khempeuh a lungdamsak ding thuthak hoih khat note’ ading ka hong puak hi. Tuni-in David khuapi sungah, note a hong honkhia ding Khris Topa a suak hi.

Bethlehem ah naungek khat suak hi. Tua naungek pen leitung Honpa ahi hi. Khris Topa ahi hi. Tua Honpa leh Topa a um a sangte’ ading in leitungah a lian mahmah lungdamna thu hong piang hi. Topa Jesu hong pianna hangin lungdam thu za a, um a, zong nuntakpih dingin Pasian in hong deih hi.

Tua a lian mahmah lungdamna thu pen Van pan ahi hi: Minthanna leh nopna tawh kidimna van panin tua a lian mahmah lungdamna thu hong kipan hi. Micah 5:2 in Honpa hong suah nading mun pen Bethlehem a hihna a gen khit ciangin, ‘Ama’ gui pen tangtawn pek tawh kizom hi,’ ci hi. Leitung mite honkhia dingin Pasian taktak mihing hong suahna ahi hi.

Tua a lian mahmah lungdamna thu pen mawhneite’ ading ahi hi: Pasian thangpaihna panin suahtak theih nading lampi a neilo mawh neite’ ading ahi hi. Mawhnei leitung mite in kisuangin, lau uh hi. Vantungmi in, ‘Lau kei un,’ ci hi. Hong suak naungek in mawhnei mite’ adingin lametna hong tun hi. Tua pen mawhnei mite’ adingin a lian mahmah lungdamna thu ahi hi.

Tua a lian mahmah lungdamna thu pen mi khempeuh ading ahi hi: Deidan om loin mi khempeuh ading Honpa hong suak zo hi. Vantungmi in, ‘Mi khempeuh adingin,’ ci hi. Mi khempeuh ading ahih manin hih thu pen a lian mahmah lungdamna thu ahi hi.

Tua a lian mahmah lungdamna pen hotkhiatna thu ahi hi: Hong suak naungek pen ‘Honpa’ ahi hi. A mite a honkhia dingpa ahih manin ama’ min ‘Jesu’ ahi hi. ‘Honpa’ hong pai ahih manin ‘hotkhiatna’ om pah hi. Ama’ hangin hotkhiatna I ngah hi. Hih sanga lianzaw lungdamna a dang om ding hiam? Mawhna hang a si ding kimlai hong honkhia hi. Mawhna’ vangliatna pan hong honkhia hi. Mawhna om nawnlohna ah hong honkhia lai ding hi. Lungdam loh theih loh ahi hi. Nuam loh theih loh ahi hi. Honpa’ hanga I ngah hizah a lian lungdamna na sang nai hiam? Tua a lian mahmah lungdamna na nei nai hiam? Tuni in Jesu na lungtang sungah hong suakta hiam? Na suaksak ta hiam? Tuni in nang a ding liauliau in Bethlehem ah hong suak hi. Nang bang na lawh a??

Fellowship News