Leitung kipei zel ding ah ~ Hau Za Cin

Leitung kipei zel ding ah ~ Hau Za Cin

Cidamna hoih deuhdeuh ahih manin mi sawt nungta semsem dinga, sawtpi nuntak zawh ciang natna thuaklo a nuntak ding ut ding uh hi. Tua manin cidamna lam leh pilna sinna lam kiuangbawl semsem ding hi. Tuma kum 20 hun pen IT hun, thukizakna hun hi a, mailam kum 20 sung zong tua mah kizomto lai ding hi.

Mite in siangtho sinsen a nutak ut ding uh a, leivui leh meikhu omna munte phiatsiang, mutsiang nuam ding uh hi. Tua manin plastics tawm zat ding, van zat siangtho zaw deihna khang ding hi.

Asia gam ah tuma kum 20 hun sungin vanthak bawlna leh vanzuakna ah nakpi takin khanga, mailam kum 20 hun sungah van lei lam ah Asia khauh pai mahmah ding hi. Van hoih, van manpha a leizo ding mi kibehlap dinga, tua in leitung sum luanzia kilamdangsak ding hi. Tua ahih manin USA leh Europe gamte nidang sangin sum leh pai zatna ah kiazaw dinga, Asia mite sum leh pai zat ah khangto zaw ding hi.

Tua ahih manin Asia gam ah a kizuak thei ding van bawl kisam a, Asia mite van deih a bawllo gamte sumbawlna kia ding hi. India leh China gam ah mite hau deuhdeuh dinga, mite neih leh lam kibehlap ding hi.

Tua manin leitung pilna, siamna, thukizakna cihte ah khangnote a hanciam semsem uh kisam a, laipilna leh siamna namkhat a neih kip mahmah kisam ding hi. Internet zang tam deuhdeuh dinga, naupang sangkah kibehlap napi gam zawngte ah naupang sangkah zolo kibehlap ding hi. Hau Za Cin (Phuitong Liim)