Japan puteek kum 112 apha khinkhat leitung ah pasal kumtampen in ki ciamteh

Japan puteek kum 112 apha khinkhat leitung ah pasal kumtampen in ki ciamteh

Leitung ah pasal kum atampenpen in Japan gammi puteekkhat ciaptehna kipia cih AFP pan kiza hi. Tua Japanese puteekpa pen amin Masazo Nonaka kici a, kum 112 aphakhin khat ahihi.

Masazo Nonaka pen 25 July 1905 kumin asuak hi a, Guinness World Records te’n leitungah anungtalai pasal akum atampenpen cih pahtawina pia uhhi.

Tua Guinness World Records pahtawina, ciaptehna pen Tuesday ni in Hokkaido Island aom puteekpa innzang ah vapaithei uhhi.

Masazo Nonaka pen akum atam mahmahhang, Wheelchairs tuan akul hangin cidam mahmahlai, Good Condition hi ci’n atute khatin genkhia hi.

Masazo Nonaka pen hizah kumtampi anuntakna ahangpen akidot ciangin tuilum tawh kisil zelzel “hot baths” cihi.

Nisim in thuthang tuamtuam akigelh Newspapers simden a, tuaban ah Hot Springs tuilum lakah kidiah zelzel hi.

Masazo Nonaka in sanggam pasal 7 leh numei 1 nei a, tuatepen Hokkaido Island, Ashoro Town sungah teeng uhhi.

Guinness World Records te genkhiatna ah hih puteekpa pen 1931 in zi nei a, ta 5 nei uh cihi.

Abeisa in leitung ah pasal akum atampenpen in aki ciamtehpen Spain gamsung aom puteekkhat ahihi. Tua Spain gamsung aom puteek Francisco Nunez Olivera pen February khasung in sikhinta hi. Asih in tua puteekpa pen kum 113 phakhin a, amah asihzawh ciangin Guinness World Records in leitung ah pasal akum atam penpending azonzon laitak ahihi.

Japan gammi tepen leitung ah kumtampi anungta in akigendiak ahihi. Tuamah bangin leitungah kumtampen piteek puteek cih pahtawina zong tamveipi ngahngeikhin uhhi.

More: Lim Family khanggui mimal akigawm in 100 lakpan 45 te Doctor suakkhinta

Japan kumpi te ciaptehna ah nungkum sungin Japan gamsungah piteek puteek kum 100 avalkhin pen mi 68,000 valbang omhi ci’n pulakkhia uhhi. Zogam sungah piteek puteek kum 100 aval bangzah ih omlai mawktam, theihnop huai mahmah hi. Sawltak #zomidaily