Leitung a patausak Corona Virus ~ Cin Khaw Mung

Leitung a patausak Corona Virus ~ Cin Khaw Mung

Tu laitaka athang vangvang Coronavirus hangin ka om na S. Korea ah zong mi tampi in ngahta ahih manin kipatau thei mahmah hi. Nisimin a ngah mi ki beh laplap ahih manin lungnuam khollo in a ki om tek ahihi. Hih natna in leitung mite hong linglawngsak mahmah hi.

Khua sungah zong a vakkhia mi tawm mahmah pah in, a vakkhia sunsun ten zong muktuam (mask) bulhin vak tek uh hi. Mawtaw (bus) tungah ahi zong a munmun ah khutsilna (lotion) dan bung sungah zatui koih uh a tua tawh khut kisil tangtang hi. Muktuam leh hih khutsil pen kidal kholhna ahihi. Nasepna company pawlkhat ahi zongin, sai (mart) pawlkhat ahi zongin khak phot uh hi. Hi thei leh vakkhialoin innsung a om mah hoih pen hi.

Kumpi lam pan in zong lungmuanglo uh ahih manin March kha a visa bei ding te bang pen zum pan lai khak tekin na visa uh April kha ciang automatic in tettan kituu hi ci hi. Zum ah zong pai ding lau in om uh hi.

Biakinn pawlkhat bang Nipini kikhop ahi zong nitak kikhop ahi zong kikhawm nawnlo in om phot uh hi. Kou ZCF a om te zong ka kikhopna uh Biakinn pen hih natna hangin hong zangsak lo in ZCF Innpi ah nung nipini ka kikhawm uh hi. Biakinn ah zong den a ka gen khutsilna zatui mah koih in ih khut kizuut tek hi.

Nidangin kikhop khitciang khut kilenin ki om a tun kikhop tuah khit ciang zong khut kilet cih omlo in khut ki vansan lel hi. Kikhop khit ciang zong an kine khawm zel hi nap’n tun tua zong kizang nawnlo in an nekkhop cih zong om nawnlo hi. Kikhop khitciang pawlkhat bang ki ak gualkhen ih cih bang hi.

Sang (University) tuamtuam a zum nasem te zong patau mahmah uh hi. Ka sangkahna YGU bang pen sang hon ding kal Thum (3 weeks postpone) khaangto hi. Tu laitak dinmun a bat leh hih natna ngah mi khang semsem ahih manin hong tung ding Spring semester zong a khak ding zong lamet huai leh a patauh huai mahmah thu khat ahihi. Sang a te zong zum khakin sangah kua mah hong pai kei un. Theihnop leh vai a om leh email hong khak un ci zaw liang uh hi. Ka sang kahna huam tengah zong mi 2 bangin ngah hi ci in lai hong khak uh ahih manin sang a nasemte zong linglawng mahmah tek uh hi.

Tua ahih manin mun tuamtuam a om ka mipih (Zomi) te zong ih om na gam tekah kikem in pilvang tek ni. A diakdiakin Korea gam a om ih mipihte tungah hih natna hong tun khak loh nading thungetna ah hong phawk un. Hih natna leitung panin a bei siang nading inzong thu ngen tek ni. Topa angvanna a ngah mimal kim ih hih ding lunggulh hang. Topa khut kuak sung muanhuai hi. Laigelh: Cin Khaw Mung Tombing