India ah pasal khat leisek, suang leh leivui bek ne in nungta

India ah pasal khat leisek, suang leh leivui bek ne in nungta

India gamah pasal khatin an sangin leisek, suang leh buan khawng limsazaw, tuatawh nungta cimawk hi. Tuapa minpen Pakkirappa Hunagundi kici a, kum 30 bang aphakhin khat ahihi. Amahpen Karnataka khuapan hi a, Pica Condition akici nektheihloh vante neknopna aneisak natnakhat ngahkha hiding in ki ummawh hi.

Tua ahih manin nisim in leisek, suangtum leh buan “bricks, stones, gravel, mud” cihte Kilo 3 tabang neden cimawk hi.

Aneulai kum 10 khawng aphak akipan nekding in ahoihlo ninnengneng duhnakhat neicitciat in tuapan damdam in akipan cih India Times pan kiza hi. Leivui leh suangtum khawng anek hangin bangmah cinatlawh cihte omlo cihi.

Hibangdan natna, mi batlohna tepen Pica kici a, pumpi adingin phattuamna “Nutritional Value” aomlo te neknopna, duhna nei citciat uhhi. Pakkirappa Hunagundi pen kum 20 sungbang tuabangin leivui leh leisek khawng aneknek hangin acidamna bangmah sukhalo in, cidam mahmahlel sawnsawn hi.

Hihbangdan te nekpen hoihlo hi ci’n ki hilhbawl, ki genpihmah taleh thudonlo in, anek ngeingei tengmah nisim in neden hi.

“Leisek leh suangkhawng kanek pen kum 20 banghita hi. Tuate kanek ciangin lim kasa mahmah hi. Hihbang kanekna pen kei adingin nuntakna in akisamkhat suakta hi” ci’n genkhia hi.

Tuaban ah “Hihte kanek hangin kei adingin nawngkaina Side Effects bangmah omlo hi. Ka ha tezong siatna omlo, to mahmah hi. Atakmahmah akici suangtum tezong kapetzo lel hi” ci’n genbeh hi.

Ahi zongin hihbangdan aneknek pen anu in diksa hetlo a, neklohding zolbawlbawl himahleh zolzo tuanlo hi. Kum 20 sungbangmah neklohding ahanciam, a zolbawl hangin zolzolo in, anekngei bangmah in neden veve cimawk hi.

Man Addicted To Eating Bricks, Mud and Gravel

“Kanu in tua suangtum leisek te neklohding hong genpihden hi. Aksa kan khawng hongpiak hangin kaduhtha suaklo ahih manin ka nekei hi. Kei adingin leisek leh buang, leivui cihte omleh phazo hi. Kaduhna pen khawltheilo hi” ci’n Pakkirappa Hunagundi in genkhia hi.

Tua ahihleh leisek, suangtum te bangci bangin nekding in hongki pialeh naduhdiak hiam cih akidot ciangin tui haikhat tawh suangtum, leisek, leivui te ahibang lianin hongkipialeh lim kasa mahmah ci’n dawngkik hi. Adang nektheih alimlim nongpia uhzong in duhlo hi’ng cibikbek mawk hi.

Akhuapih tuipih te’nzong lamdang samahmah uh himahleh kuamah in khamzolo in, nisim in anekngei tengmah nene in nungtalel cimawk hi. ZD Sawltak #zomidaily