Leitung a numei thupi pawlkhat

Leitung a numei thupi pawlkhat

1. Queen Victoria (1819 – 1901)
England kumpite sung pan Queen Victoria in kum 63 sung vilvel, ni a tum ngei lo British Empire uk hi. Amah pen mak zondan siam se hi. A tanute Russia, Germany, Greece, Denmark le Romania gam uk kumpite’ zi dingin mo khak a, a makte pen kumpi vive ahi hi.

2. Fanny. J. Croby (1820 – 1915)

Mar.14, 1820 ni New Yorkah suak a, a suah zawh kha 6 a phak teh zatui zat-khialhna hangin a mit taw hi. Kum 9 a phak ciangin laphuah kipan a, hong minthang hi. La dawng 12 bang a phuah khit ciangin gelhkhiasak pan hi. La dawng 8000 val bang a phuah lakah a tamzaw pen Music siamte a aw (tune) bulhsak hi. Zomi Tapidawten i deih deuh, Ka gengen ding ka sasa ding, Keima kha hong liahsak, Hong paisan ke’n migi Topa; Hong naisak in; Singlamteh kiang ah; Lam tawntungah hong piapih hi, Kham khuapi; Zeisu’ tangthu kei hong gen in; Phat un, Phat un; Pasian’ min thang ta hen, Awnemin hong sam; Khia un; Hong gum thei hi; A sia ding honkhia in; cihte ama phuah vive hi. Feb.12, 1915 ni-in si hi.

3. Mother Teresa (1910 – 1997)

Aug 28, 1910 ni’n suak hi, Albanian minam hi a, mi hehpihna lungsim nei hi. 1929 a kipan India gamah RC nungak siangtho sem hi. 1950 kumin “Association of Charita-ble Missionaries” phuan a, tagah kepna 127, sum bei lo zato 213, phak zato 54 le sum bei lo sang 60 phuan hi. Mizawng daipamte lakah Pasian’ na sem hi. Veina le itna tak tawh Calcutta ah miphak 10,000 kem hi. “Pasian’ ading nahoih khat” (Something Beautiful for God) cih laibu khat gelh hi.

1972 kumin Nobel Prize le England kumpinu Queen Elizabeth’ II (1926-) piak “Order of Merit: pahtawinate ngah hi. Pope John Paul II (1920-2005) in zong “Blessed Teresa of Culcutta” cih minphatna pia hi. Sep 6,1997 ni-in si a, kumpite zahin thupi takin kivui hi. Gam tuamtuam pan gam ma-kaite le biakna makai tampin gal uh hi.

4. Helen Keller (1880 – 1968)

June 27, 1880 ni-in Tuscumbia, Alabama, USA ah suak hi. Kha 19 a phak ciang a cina-in tua pan a mit le a bil kizang thei nawn lo hi. A nu le a paten mittaw sangah kahsak a, a khutmedawn bek tawh lai sin hi. “Ka pianpih mit tawh ni 3 sung bekbek khua mu thei le’ng ut lua ing,” ci ngeungau hi. A nuntakna a niamkiat hangin a lungsim niamkiat lo hi. Manglai, Piantit lai, Latin lai, German lai le Greek laite sin a, siam mahmah hi. Kum 24 a phakin Radcliffe College pan B.A degree ngah a, mat sangpi tawh zo hi. Laibu hoih a sak piante a bu bupbupin lot-ngah hi. A piang bangbang a hoihlamin la thei ahih manin cidam loh kawmkalah gual-zawhna le pahtawina tampi ngah veve hi. Leitungah laigelh siam minthang khat hong suak hi.

A nuntak sungin gam 39 ah khualzin hi. US President 24na Mr Grover Cleverland pan US President 36na Mr Lyndon B John-son ciang tawh kithei uh hi. Mi minthang Mr Alexander Mr Graham Bell, Mr Charlie Chaplin le Mr Mark Twainte tawh kilawmta uh hi. Mr Mark Twain tawh a kinohset laiun Helen Keller in, Mark Twain’ mit tedeldel hi, cih a khut ka letna pan thei ing, ci-in mu lo napin gen thei hi. Hellen Keller in June 1, 1968 ni-in leitung nusia hi.

5. Ruth Bell (1920 – 2007)

Siavuan missionary L.Nelson Bell (1894 – 1973) le Virginia Bell te sung pan June 10, 1920 ni Sengamah suak hi. N Korea ah kum 3 sung pilna a sin khit ciangin US gam Montreat, North Caolina le Wheaton College ah sin kawikawi a, degree ngah hi.

1943 kumin Billy Graham (1918-) tawh kiteengin tanu tapa 5 nei uh hi. 1959 pan laigelh kipan a, laibu tampi gelh hi. Sunday School ah zong hilh lai hi. 1966 kumin Ruth & Billy Graham Children’s Health Center hong a, a sih dong tua ah mapang hi.

Ruth Bell in Pasian nasep thupisa ngiat hi. Hun khat sung US President dingin a pasal a kizol niloh ciangin awi lo lua ahih manin a pasal kiangah, “President ding me-kuang nong lui leh kikhenna lai hong pia ding hi’ng,” cigiap hi. Billy Graham in, “Pasian’ na ka sepna ah hizahin ka lawhcin theihna pen ka zi hong thungetsakna hang le hong pan-pihna hang hi, ci hi. Ruth Bell in June 14, 2007 ni-in leitung nusia hi.

(6) Daw Khin Kyi (1912 – 1988)

April 16,1912 ni Myaungmya khua ah suak hi. Yangon, Kyimyindaing ABM nu-mei sangah pilna sin a, tua khit ciangin ama uuk ahi zato siama (Nurse) sin hi. Galpi nih lai-in thaman ngen loin cina pawlkhat Yangon pan India gam Calcutta ah tembaw tawh va puak hi. Kawl gamah 1942 kum zato hong masate lakah kihel hi. A nasepna zato ah General Aung San zato va lum a, aman na kemin tua pan hong kithei-in 1942 kumin kiteeng uh hi. Tapa 2 (AungSanOo&AungSan Lyin) le tanu 1 (AungSanSuuKyi) te nei uh hi.

1949 kum India New Delhi a WHO khawmpi ah Kawlgam taangmite’ makaipi le Chairman, 1950-1952 kum te ah Geneva a WHO khawmpi ah Kawlgam taangmi ma-kaipi cihte sem hi. Kumpi vai tawh USA, Japan, China, India, Thailand, Vietnam le Europe gamte ah zin kawikawi hi. 1960-67 sung India gam New Delhi ah Kawlgam palai (Ambassador) sem hi. 1950 kumin USA kumpi in Kawlgam’ nu (Mother of Burma) cih pah-tawina, Yugosalavia kumpi in 1951 kumin minphatna (Star) pia hi. 1955 kumin Thai kumpin zong pahtawina lianpi khat pia hi.

Dec.27, 1988 ni-in Yangonah si a, Tapidaw ngeina tawh kivui hi. A tanu Daw Aung San Suu Kyi in April 16, 2012 ni-in a nu Daw Khin Kyi’ kum 100 cin phawkna-in “Daw Khin Kyi Foundation” phuan a, tua pan khantoh nading nahoih tampi hong semkhia hi.

7. Aung San Suu Kyi (1945-)

Gen Aung San le Daw Khin Kyi-te sung pan 19-6-1945 ni Yangonah suak hi. Michael Aris tawh 1972 kumin kiteeng uh hi. Nobel Peace Prize a kipan degree le Award tampi ngah hi. Harvard University in Sep.17, 2016 ni-in “’2016 Hamanitarian of the year” pia hi.

1990 kiteelpi ah ama makaih NLD Party in zo napi, kumpi suak tuan lo hi. 2015 kiteelpi ah NLD in zo hi. 2016 kum ciangin State Counsellor of Myanmar le Foreign Minister panmun la a, gam khantoh nading na-lian tampi semkhia hi. Gam tuamtuamah zin kawikawi a, thupi takin kimuak ziahziah hi. Leitungbup numei minthangte sungah ki-hel hi. Nu Ngo Kang Cing’ laibu pan