Laklawhna lauhuai ~ Tdkhen

Laklawhna lauhuai ~ Tdkhen

ETTEHTE:
1. Konggei-ah ding… lut lah lut lo… a lutnuamte kham… gimna thuak ding… Mt 23:13… (Angsung a en makai).

2. Vot lah votlo, sa lah sa lo, laklawh… kam sung pan siakhia ding… Mang 3:16… (A nuam khop beka omna).

3. Za khin napi-a um lo… na mitin na mu dinga na ne kei ding… 2Kum 7:2. (Ngawngkhauh sihpih).

4. Khuavakna tungin, vantung hehpihna ciam khinin a tawpkikte maisak nading om lo… mei khulna thuak ding… Heb 6:4-8. (Nungtolh paisuak).

5. Farisaite gimna thuak ding… biakpiakna thei mahmah napi’n a ut teng bek uh hih… a utlohte nusia… Lk 11:42-44. (Ut dandan-a biakpiakna).

6. Thukham siate gimna thuak ding… sep ding mu napi-a sem lo… midangte vangik suan… Lk 11:45-46. (Mi’khut-a gul man nuam).

7. Kihilhhilh khinin thei mahmah napi-a mang nuam lote bawlphat kik zawh nawnloh zahin kisia ding… Pau 29:1. (Ut bangbanga tatna… ‘Langbawm a ekah awk’).

8. I deihteelna pen Pasian in hong pia…ahi zongin i siat nading na hizaw. Late 16:15. (Pasian hungaih lo, i deih khat bulphuh).

9. Judah Iskariot in Jesu leh sum mukakin, sum na teel laklawh a, kisikin guiawk lum… Mt 27:3-6. (Jesu maw, a thupha, koi teel ding).

10. I ngim, i tup, i sep khat tawh lungkim lo-a, lunghiangin na dang tawh i buai’leh Lot’zi bangin kikung’din thei… Pian 19:17,26. (A lunghiang mi in tawntun lo).

EITE:
1. Mite’ munah om napi a, i kihihsak pianleh mival kisuak ding hi. (Kimavang theilo ding).

2. A kigen khempeuh, “He he” i cihkhit liangleh mathak kila ngamlo ding hi. (Kitualniam ding).

3. A hoih khempeuh bawh kei ni; i siamna mun san bekah kihel ni; pahtakna in mihing’ maban hi. (NaTalent theisiam in).

4. I phun theih nading munte pe’l ni; phunna in thupha gal ahi hi. (I gial a kituaklo mun om thei).

5. Bak in vasa lakah gal omleh, ‘zusa ka hi’ ci-in, zusa lakah gal omleh, vasa ka hi’ a ci hi. Ganhing lakah a vang neilo pen ahi hi. Tua mah bangin kikholhpih a laih kawikawite a vang bei hi. (Ngim leh tup mel neilo, kikhualna om lo, mi’tunga kingakna).

6. Thei napi-in a theilo kipang leh a ihmu kipang mi kibang hi. Phot hakin, kiphong veve-leh a maa sangin sia zaw thei hi. (Kilukhuh nuntak, biing nuntak, a ki-awnghon nuamte, ‘Humpi zahlak piaunel baak’ a cih om thei, photphot kul lo).

7. Na Talent lopi panmun hong kipiakleh nolh ngam in. Mite’ lamet na bat keileh a maa sangin na sia zaw ding hi. (Pualam en kha; a sungthu en lo; David kumpi’n a kiteelna ngaihsun in).

8. Kineihna tawh kipholakin kilang laklawh kei in. A taksang mite bek na pawl hiding a, na pawl kip lo ding hi.(Sehnel tunga inn lam a cih kibang ding hi).

9. Na lawmte in a unau kisiatna thu na tungah hong gen’leh, kuppih lua kei in; hunkhat ciangin hong kilem kik ding uh a, lawm na taan kha ding hi.(Mawhphelh molhtum thuak om thei).

10. Mi khat in na tungah thusim hong gen’leh, na ippih zawhzah ding bek gen sak in. (Pilvang taka thuhilhna no khat higige hi).

11. Mi gensiasia nuam khat in na tungah midangte hong gen’siatleh, na kuppih zahzah tawh midangte’ tung mah-ah nang hong gensia kik leuleu ding cih kithei in.(Gul banga pilna leh vakhu banga migitna zat ding).

12. Na hihna thu hong theinuam mite’ tungah na hihna zah sawm-a khat val gen kei in. Veng ankholh a bung a belin kipuak ngeilo hi. (Mipilte in ka pil ci ngeilo a, mipicingte in ka picing ci ngei lo hi).

13. Simmawhna, gensiatna, mawhsakna, langpanna, zawhthawhna, kam kibawl’tawm saknate na thuakleh, hong kipiak bangbang sang ziahziah lel in. Mi cidamte in a kilui’bangbang a ne miatmiat lel hi. (A vot a sa a thuakzo mi a cidam hi a, kam malkhat leh guah malkhat i huatleh, a cidamlo i hiding hi. Meiinim cianglel-a i khua a dam’leh ki-etphat huai kha ding hi).

14. Makai pawlkhat in a nuai-a mite hawmthawhin, a makaihna lawhcing pian lelah nengniam nuam leuleu in, amah bat tuakleh lawnkhia hi. (A kicial tuucing).

15. Makai pawlkhatte leuleu a hatlo pente tawh tonkhawmin, a hatlohna thu theihpihin, ahihtheih sun uh thupisan sakin, suangpi suangneu a kithek kim sak thei hi. (Tuu neipa). Tdkhen