Laitan pilna sangin akisam masazaw thu pawlkhat

Laitan pilna sangin akisam masazaw thu pawlkhat

Nulepate in naupangte sangkah ding le laitan pilna neih ding pen athupi pen dingin ngaihsun kha thei hi hang. Tua manin naupamgte thuhilhna khatpeuh i neih ciangin lai hahkat un! lai hahkat le uh cin mipil nasuak ding uh hi. Laipil lo te pen mihai in ki ciamteh hi, cih bangin naupangte thuhilh hi hang. Laitan pilna pen kisam mah hi. Hi mah leh tua sangin a kisam zaw thu tampi om lai ahih lam i theih ding kisam mahmah hi. Laitan sang ,pilna sang pipi asin, degrees ngah khin liang napin , midangte muhna ah mi mawk mawk khat tawh a kibang , mi tampi tak om hi. Tua bang mite pen sanginn panin a kisin laitan pilna bek a theite hi uh a, tua bang mite pen mite tawh kizopna khat peuh ah, a degrees uh mindaisak thei uh hi. Laitungah pilna lam tawh kisai sittel te in agenna ah laitan pilna sangin a kisam zaw thu tampi om a tuate pen sangkahna sanginn panin kisinthei lo hi, ci uh hi.

Naupang khatin a neutunga kipanin a lungtang sungah a tensak ding a kisam thu tampi om hi. Tua thute pen a neutunga kipanin thei kei leh agol ciangin a zuih ding haksa sa uh a, tua manin nulepa thuhilhna mang lo in, mite muhna ah migamtatsia le nulepa deihsakna athei lo tanu tapa suak thei uh hi. A sangkah nadingun nulepate in nasem uh a, a zing amial ci loin , tate adingin guahzu meikai nuaiah nasemin tate sang kahsak hi hang. Hi mah leh tate in pilna hong sinsin in , pilna sang pipi angah uh ciangin nulepate hong thusim lo uh a nulepate hong phawk nawn lo thei uh hi.

Pasal nei uh a, nulepa a nai nawn lo tawh kibang thei uh hi. zi nei in inntuan uh a, a nulapate tawh kizom nawn lo uh hi. Tua bang ciangin mite in a pilna sinsin uh bangin mangding uh ahiam, anu apa te uh phawk nawn lo liang dingin , hai na lawmlawm uh ee, ci ding uh hi. Hi mah leh a maute in laitan pilna bek thei uh ahih manin , adang pilna tuam tuamte pen sin kha lo uh a, thei lo uh hi. Tua ahih manin nulepate in zong tate tungah laitan pilna a neih ding uh thupisa masa lo zaw in , mihing khat ading a neih huai , a kisam pilnate i theihsak , i sinsak ding pan kisam mah mah hi.

MITE TAWH KIZOPNA

Naupangte pen aneulai mahin midangte tawh kizopdan asiam ding uh kisam ahih manin nulepate in i sinsak ding kisam mahmah hi. Mihingte khat le khat kizopna ah a sepa bawlna le a gualzawlna pen 20% bek ki hel a, mite tawh kizop a siamna pen 80% ki hel hi. Midangte tawh a kizomthei lo mi khat pen, gualzo cih om ngei lo hi. Mihau tampite in agenna ah nasepna khatpeuh ah kinop nading khatpeuh aom ciangin a laitanpilna le a neih alam sangin , a kizop siamna tawh thukimna lai kibawlzaw hi ci uh hi. Tua ahih manin naupangte pen aneu a kipanin mite tawh kizopdan pen sinsak ding akisam mahmah khat ahi hi.

SUM LE PAI ZEKDAN

Zomite sungah a theih tampi om ta hi. Nulepa pawlkhatte in atate tungah naupangte in sum tawi lo ding , sum khoih lo ding ci uh hi. Tua pan kipattahna man lo khat ahi hi. Naupangte pen sum zatdan sinsak ding. Tua mah bangin sum ngahna a haksat dan zong sinsak ding hi hang.

Van khat na lei ding ciangin ngaihsut masak ding a kisam mahmah thu khat om hi, hih van lei leng ka lung akim zo diam, cih pen ngaihsun hamtang ding. Kisam khol lo a hih hang tawmman ahih teh lei mai ning cih te , hong nakzuak lua , aa na lua kahih cianga ka laisak hi, cihte pen kisam lo hi. Mihau khat in agenna ah , vanmanpha khat ka lei ding ciangin, a kizatna ding namthum ka theih kei leh ka lei ngam kei , ci liang hi. [ A tamman te a genna ahi hi.] Sen nupi pawlkhatte in van alei uh ciangin a tate uh ton pih uu a, a sumbeizah ding atate uh tuatsak ciatciat in, a tate uh sum lensak uh hi. hamu , pia’khat na leng a valkhongin mawkpaih lo uh a, aneng atawngin tuat sitset sak uh hi. Tua pen naupangte adingin khuakmuat dektak liang-in tinchia natuatsak kullo a, tua sangin zong kimanna nei zaw lai hi.

LUNGDAMKOH DING

Naupangte pen van khatpeuh , moh khatpeuh na piak ciangin lungdam kosak hamtang in. Sen nupi pawlkhat a tate moh khawng pia le hang ei gen kul lo in anute in lungdam kosak uh hi, pawlkhatte pen a maizum ahiam thei keng lungdam hongkol lo uh hi. Tua bang ciangin anute in akhut penin tua amoh lakhia in, kei hong pia kik a, a lungdam lo ahih leh piak lul kei ci mawk uh hi. Tua pen a deihna telcianl lo ka hih manin , lungdam hong koh loh hangin pha mawh kei nesak lel in ka cih leh kulkei, pia nawn kei o, nidang teh zongsang in teh , a lungdam lo a hih nungsang a nek loh hang pha mawh kei ci ziau uh hi. Hih pen a ngaihsut kikik ciangin naupang pattahna ahoih mah mah khat a hih lam ka thei kikkik hi. Lungdamna aom ciangin lungnopna om a , lungnopna a om ciangin thupitsak nopna lungsim omthei pan hi.

LUNGTUP LIAN PIPI NEI SAK DING

Naupang khat pen aneu-a kipanin a lungtup khatpeuh hoihtakin a septheih ding le , a lungtup pen atangtut theih na dingin nulepate in i hanciampih ding , tha i piak ding kisam hi. Lam khat a lungtup leh tong khat tangtun a tangtun dingin lametsak na hih leh, lam sawm bang lungtup in nei le lam khat bang tangtun ding hi. A piangthei lo ding a kiummawh huih laka inn lam ding angaihsun na om kei leh vanleng khawng pen om lo kha ding hi. Phong khawng om lo kha ding hi. Hih vanhoih te a bawlte in hih ciang ciang bek a lungtup uh hi zenzen lo a, a lungtupna uh pen , hih sangin a zah tampi in a sang zaw ahi hi. Tua manin naupangte pen lungtup lian pipi neihsak ding kisam hi.

SITTEL DING

Naupangte pen aneu a kipan a lungsim uh a kikepcing zawh nadingun sittel ding kisam hi. Ka minam kua ahiam , a pu kapa te a bangcih mi hiam, ka khanggui uh abang cih hiam, cih oen theihsak ding kisam hi. Hong dawnkikna uh tawh kizui in a lungsim uh kepsak zawh ding kisam hi. A khamggui uh a hoih loh manin lungneu sak ding hi lo a, nampi ahih manin ki liansak ding hi lo hi. A nulepa api apute siatna hangin a kibawlsia , a kineumuh pawlkhat om thei a, tuate pan thapiak siamding kisam hi. Khanggui in mihing mailam hong gelsak lo a, namailam ding nama gelna tawh kizuiin Pasian in hong tangtungsak ding hi zaw hi., cih ding ahi hi.

A PUMPI KIKEMCINGSAK DING

A neulai mahin mihoih mihoihlo a khen theih nadingin nulepate in thu i hilh ding kisam hi. Nulepate thukham ahih manin a sepkhak leh siatna a bawl hi sak lo ding hi hang. Siatna a bawlmanin a sia hi sak zaw ding hi hang. Tate in nulepate om lohna munah tuate asep uh ciangin siatna bawlin kingaihsun lo thei uh hi. [ Gentehna , zatep pen nulepate in a kham manin , atepte a mawh hi zen zen lo hi. Za a tep ciangin a pumpi susia ahih manin zatep pen siatna a hi zaw hi. Tua pen nulepate in i hilh cian theih ding kisam mahmah hi. Naupang pawlkhatte in a nulepate in zatep leh asat ding lau ahih manin a nulepate muh lohna ah tepsim uh hi, tua pen siatna abawl in kingaihsun lo uh hi. Tua ban ah, deihloh pen in ,inn kang hi leh bamg cih om ding , zin lin ciangin bangcih om ding, cih te zon theihsak ding leh a kiciantak in gem ding kisam mahmah hi.

HAKSATNA A THUAKZAWH NADING

Naupangte zakna ah haksatna cih kammal pen tamgen loh ding kisam mahmah hi. Haksatna cih sangin, ( challenge ) cih dingin hoih zaw hi. Challenge cih ciangin khat le khat kitona hi a, haksatna khat in hongto hi cih ding hi zaw hi. Naupangte pen a guallel ut lo uh a, a tawntungin a gualzo den nuamte ahi uh hi . Kitona cih oen khatvei lel mah le hang hanciamkik in kitokikthei a hih manin , a guallelh na munte panin tha lalkik thei uh hi. Haksatna cih pen a min mahmah zong maingap huai lo lua mahmah ahih manin challenge cih kammal zang zaw ding hi hang. Tua hi leh naupangte adingin zong hanciam nopna le lungkhauhna tanpi piangsak zaw ding a, a lungsimuh hangsan zaw ding hi.

Ka laigelhte pen atom cih bang tam khol lo a hih manin laisim hat mel lo te adingin asim thadah huai mah mah khat hi ding hi. Ahi zongin laisim cih pen thadahte ading lawm hoih khat suak ngei lo ding ahih manin , tua laisim na panin a kingah thuphate zong ngah lo pah ding uh hi. Job Cinpi (Zomi Laisim nuam te)