Laibu thak Tangko’na: Pil Sinna leh Hilh Pilna ~ Pau Lam Dal

Laibu thak Tangko’na: Pil Sinna leh Hilh Pilna ~ Pau Lam Dal

“Pil Sinna leh Hilh Pilna” laibu in, adiak diak in Zogam sunga sang siapi, sang sia sem te leh sangkah sang naupang te tungah hamphatna tampi hongpia dingin lametna ka nei hi.

Hih laibu sungah Pilna, Pil Sinna, Lailam Pilna, Khuak Pilna, Suahpih Thu Theihna, Ciimna (navaak sitset), Hilh Pilna, Kawlgam Education System, Philippine Education System, Tansang Pil Sinna, Naupang Pantahna, Lungsim Pii Cinna (Maturity), Nang Leh Nang Kithei In (Know Thyself), Makaihna Leh Makai, Theih Huai Thu Tuamtuam (General Knowledge), Tha Laakna, Cimphawng, Thu Manpha Pawlkhat, Mi Pilte’n Banggen uh, cihte akipan tulai leitungpilna tuamtuam te kigelh hi.

Hih laibu ahih leh laigelh pa in, a sangkah hun sungaa, asin thute leh a master’s thesis (Educational Management) laigelh na pan amuh khiat thute; asim laibu/ laihawm tuam tuam te; leh a sang pan un kibawl, workshops, seminar, training, conference, symposium, forum, graduate seminar; cihte pan angah thu manpha tuamtuamte aa kipan, Zomi laigelh siamte’ online (Zomi Daily) article tuamtuam, adiak in ah, Sang Sia/ Sang Naupangte leh Kawlgam Pil Sinna tawh kisai thupawlkhat, amau’te laikung pan zong ngaihsutna ka na la/ ka na ngah hi. Hih Laibu asawtlo-in, Kawlgam sungah kingah ta ding hi. Pau Lam Dal (Tawmging/Tawmbing)

THU MASA (C. Thang Z. Tuan, Ph.D.)

Pilna ii deihna genciatna, Pilsinna zia leh Hilh Pilna sandan tuamtuamte hong gelhkhia in eimau san leh dinmun ciat ah sim theih dingin hong bawlkhia zenzen Pau Lam Dal kapakta masa hi.

Tulai in Pilna ih zong ciat hi. Eimau thutheihna leh upmawh sansatciat pan in i phuteta tek hi. Ahizongin Pilna ii deihna, a zondan leh kihilh theih leh kihilh theihloh Pilna te a om gige ahihlam telhuai hi. Tu in hih laibu sungah tuate atelgen ban ah ei tawh akipelh theilo atheihhuai Kawlgam ah Pilna kisinsakzia leh kipantahzia zong hong helthei ahihman hampha hang. Hih bangin Kawlgam ah kimakaihna thu a telhuai mahmah thu khat zong hi.

Tua thamlo in Thalakna ding atuamtuam, Cimphawng pawlkhat banah tuhun a thuthang ahi theihhuai tuamtuamte leh ahang telkan in Thumanpha tampitak hong hawmsawtna laibu zong ahi gige hi.

Pilna i cih pen mipil tuamtuamte in amuhdan uhleh asandan tuamtuamte, akhiatdan tuamtuamte in apulakciat uh banah, atatak in LST Paunak sungah akhiatna, adeihna, a zondan, azatdan leh amanphatnate a na telgen mah bangin Thumuhsiamna ahihi. Tua thumuhsiamna tawh cidamna, khansauna leh lungnopna banah lawhcinna i ngah behna zong hi (Pau3:13,16-18). Mailam nuntak nading thukhualkholh siamna zong hi. Hongsiam Pasian i zahtaak siamna ding zong higige hi.

Tu in Sia Pau Lam Dal in Pilna thu Philippines ah vasin in, Thesis ah at in, amuhnate lak ah aciikmahmah teng imlo leh deihsakna tawh “PILNA, PILSINNA, HILH PILNA” ci-in hong gelhkhiat pen akuamah peuh aadingin go/gamh (heritage) manpha pen ong guan hihman in apakta hihang.

Related: Zomi Thulela Laibu ~ Pu Zokhai

A simkha khempeuh in phattuam pih hamtang ding in kamuangpha mahmah hi. Topa in thupha tawh telsiamna leh zatsiamna hong piaciat tahen!

Prof. C. THANG ZA TUAN, Ph.D.
National Consultant
UNESCO Education Planning and Management Project in Myanmar
Yangon, Myanmar