Lai Siangtho – Pasian’ thubu

Lai Siangtho – Pasian’ thubu

Isaiah 55:10 & 11, Hebru 4:12 & 13, Late 119:105, Marka 13:31 || Thupatna: Leitungah Laibu a nam tuam tuam tampi om hi. Laibu saal(library) te ah pai leeng kimu thei hi. Laibu tuam tuam ten a huam uh kibang kimlo hi. Laibu khenkhat in mikim huam zolo hi. Gentehna in Gamlai Aksi cih thukizakna bang Gamlai khua ahi lo midangte adingin a manphatna tamlo hi. Bek thamlo in Laibu pawlkhat hun a sawt ciangin a manphatna bei thei hi. Laibu khempeuh lak pan mikim a huamkim pen leh a tangzai pen Lai Siangtho ahi hi. Lai Siangtho pen pau nam tampi tawh a kiletkhia hi. Laibu kikhenkhia lakah a tam pen leh a ki khawng pen zong ahi hi. Lai siangtho-a kigelh thuten lui hun nei ngeilo hi.

Lai Siangtho hong piankhiat dan: Lai Siangtho pen mi tuam tuam sawm thum leh guk kiim ten a gelh uh ahi hi. Hun tuam tuam leh mun tuam tuam ah kigelh hi. A kigelh hun sung kum 1500 kiim sawt hi. Lai Siangtho pen Greek thumal ‘Biblia’ pana kilasawn hi-in, ‘Laibuneu’ a cihna ahi hi. Latin pau in ‘Biblos’ kici hi. English ten ‘Bible’ ci uh a zomi ten ‘Lai Siangtho’ kici hi.

Pasian’ Khasiangtho makaihna tawh kigelh hi: Lai Siangtho pen mi tuam tuam ten Khasiangtho makaihna tawh gelh uh hi. Laibu dang a gelhte pen amau laibu gelh tawh kisai ah pilna nei vive ahi uh hi. Gentehna in Music tawh kisai a gelhte in music lam pilna nei uh hi. Lai Siangtho gelh te pen mipil lua om khollo uh hi. Ahi zongin Kha Siangtho in makaih ahihmanin a thute nungta in vanglian hi.

Bawlsiatna a naak thuak pen Laibu: Laibu khempeuh lak pan Lai Siangtho in bawlsiatna naak thuak pen hi. Nidanglai Rom kumpi leh tuhun Communist kumpi ten beisak nuam uh hi. Ahizongin kumpi te natawm in a bei sak zawh loh uh laibu ahi hi. Kaangmei nangawn in susia zolo hi. Inn khawng a kaat ciangin Lai Siangtho kangtum cih om ngeilo hi. Lamdang mah mah hi. Napoleon bangin, “Lai Siangtho pen laibu lamdang, laibu hing leh a vang lian, amah a dote khempeuh zawhloh a nei ngeilo laibu hi” ci-in gen hi. “Van leh lei a mangthang ding uh hi; ahi zongin ka thu a mangthang kei ding hi” (Marka 13:31) cih Pasian’ kammal Lai Siangtho ah om hi.

Lai Siangtho a manphatna: Lampi ah tangtakin i pai theih nangin khuavaak kitaangsam hi. Khuamial lakah lam i pai ciangin i khe khong peuh suikha thei zel hihang. Hih leitungah mihingte khualzin ihi hi. I khualzinna ah lamman i zuih theih nangin khuavaak kitaangsam hihang. Tua khuavaak pen bang dang hi loin Pasian’ thu ahi hi. Tua Pasian’ thu pen Lai siangtho sungah om hi. Late 119:105 ah “Na thu in kei lam hong lak ding meivak hi a, ka paina lampi-ah khuavak ahi hi” ci hi. Lai siangtho sim a hoihna tamlo a nuaiah na simsuk lai in.

Pasian’ kipulaakna: Lai Siangtho tungtawn in Pasian pen lei leh van leh a sunga om khempeuh a bawlpa leh tuate tunga thuneipa ahihna kimu thei hi. Lai Siangtho in Pasian deihbang a nuntak zia ding hong hilh hi. Tua mah bangin Pasian’ deihloh gamtatnate zong hong hilh hi. Pasian zia leh tong thei a Pasian lungsim i tuah theih nangin Lai Siangtho sim kuul hi.

Paikhialh theihna pan hong keem thei: Khristian ten Lai Siangtho pen Pasian hu mawp-a kigelh Pasian thubu ci-in ki ngaihsun hi. Khristian te adingin i zuih ding thukhun omna Danbu zong ahi hi. Upna leh gamtatna a dik leh a diklo Lai Siangtho tawh etkak zel ding hoih hi. Tuhun ciangin Khristiante lakah paikhialhna tampi om ta hi. Kha Siangtho paulap a ut thu tat mi pawlkhat om thei hi. Kha hopihna khempeuh Lai Siangtho tawh kituak khin khollo hi. Tua ahihmanin thu khat peuhpeuh; Lai Siangtho ah a om hiam? Lai Siangtho in bangci gen ci-a Lai siangtho tawh etkak zel kuul hi. Tua in paikhialhna pan hong keem ding hi.

Kha ann ahi hi: I taksa hat in sep leh bawl dingte i zawh theih nangin nikhat in ann thumvei bang neek kuul zel hi. Ne kei leeng gimin na kisem zolo ding hi. Tuamah bangin kha a thahat theih nangin kha ann kitaangsam hi. Tua kha ann pen buh leh baal hi lo in Pasian thu ahi hi. Tua Pasian thu Lai Siangtho ah om hi. Lai Siangtho simna tawh tha la zel ni.

Galvan hoih pen hi: Lai siangtho pen Khristian te adingin galvan hoih pen kht ahi hi. Lai siangtho kigelh hun lai in Namsau pen galvan hoih pen khat ahi hi. Tua manin Lai Siangtho pen langnih hiam namsau tawh kigenteh hi. Dawi hawlkhiat nangin comics bu leh Cartoon but e zat taaklo a, Lai siangtho bu bek kizang hi. Lai Siangtho a sim ngeilo thu-um mi pen a galvan hoih pen a zang ngeilo hi mawk hi. Tua manin Satan khemna do zolo thei zel uh hi. Lai Siangtho simna in Pasian tawh hong ki naisak hi.

Pasian in mihingte hopihna hi: Nidang lai in Pasian in mihingte a kamsangte tungtawn in hopih hi. Tuhun ciangin tua banga kam tawh hopihna om lua nawnlo ahihmanin Lai Siangtho pen Pasian in mihingte a hopihna danin kingaihsun thei hi. Lai siangtho pen kicing mah mah hi. A dah a kap mi khatin Lai siangtho simna tawh hehnepna ngah thei hi. Lam-et bei mi khat in zong lam-etna thak nei thei uh hi.

Lai siangtho thupina leh manphatna pen genkhit zawh ding hi lo hi. Lai siangtho sunga kumpite tangthu i kan ciang; Pasian deihna tawh kituak a vaihawm ten kumpi tokhom sawtvei luah zaw uh hi. Lai Siangtho manphatna it el sem sem theih nangin lai siangtho sim hahkat ni. Nidangin mikim in Lai siangtho sim theilo himahleh tuhun ciang Lai siangtho bu mikim sim theih in kingahta hi. Tua bek thamlo in smartphone khawngah a softcopy sim theih in om lai hi. Lai siangtho kingak nanga a zang siam te mi hampha hi mai hi.

Lai Siangtho tawh kisai mi minthangte kammal pawlkhat:

Gladstone, “Ka khangno hun sunga leitung mi thupi 95 ka theihte laka 87 te Lai Siangtho –a kinga mi ahi uh hi”.

Zhiang Zhemim, “Thau leh galvan dang tawh hong kuante sangin Lai Siangtho tawh hong kuan Missionary te lauhuai zaw uh hi”.

Queen Elizabeth, “England gamin ki-ngakna lamdang diak nei a, tua pen mansuah huai lo hi. Kumpi tokhom luah ding khempeuh in England gam lawhcinna thuguk Lai Siangtho ahihna thei ta hen”.

George Washington, “Leitungah Lai Siangtho lo tawh vai kihawm thei tak tak lo ding hi. Lai Siangtho in dikna a gen um in America kalsuan hi. Lai siangtho a a kingak laisiah kisia lo ding hi”. Pau Tun Thang