Lai kihilhzia hoih ka sak penpen… ~ Zomi Quavadis

Lai kihilhzia hoih ka sak penpen… ~ Zomi Quavadis

Montesorri Method of Education hi. Hih Method a kizatna Harvest sangah Zomi tampi kah uh hi. Montesorri sangkah zia a tello pawl khat ten bel thupisa mel lo uh hi. Sangnaupangte a kimawl in nitum lel uh, laigelh dan leh laipai zong sim thei tak kei, naupangte suakta lua uh hi, hidan sangkah om ngei kei cimiau uh hi. Nulehpa a lungkia kik zong tampi om uh hi.

Montesorri sangkah zia pen en ih theih lohman hi in, ih pute naupang lai pek a kipan Europe leh gam thupite ah na kizangh khin hi. Ei sungah bel lai kihilhzia a thak khat hong suak kik bilbel hi.

Montesorri paizia pen naupangte tungah aana (force) kizangh lo hi. Ciang tawh saat gen loh awkhauh leh kamguh zong kizangh lo hi. Naupangte pen a kimawl uh hi den mai takpi mah hi. Ahizongin amau kimawlna pen ABCDE, Numbat, Lim tuamtuam, Ganhing, Leitung Vantung lim, Engineering leh a tuamtuam vive tawh a kimawl uh hi in, a kimawlna tungtawn un pilna tampi ngah uh hi. Eite lai kihilh danin lai kihilh lo uh hi. Suang laipi zangh lo uh hi. Ei dan in Sangsia khat in naupang 30 val bang uk lo uh hi. Sangnaupang 30 val a omna ah sangsia 5 bang om pah uh hi.

Naupangte pen amau siamna zuiin amau leh amau a kivaak zawh ding kihanciampih pen hi. Montesorri sang pan a khangkhia khat pen mi mawkmawk om lo uh hi. Ei lungsim sungah bel “Sum tampi beia ih naupangte sang ih kahsak buangin, lai hong pil uh hen la, zum ah hong tu pah gipgiap uh leh” cih thu ahihi. Tua zong thupi hi. Ahihangin tua sanga thupizaw pen “Ih naupangte sang ih kahsak buangin, zumah a tu gipgiap pah kei zong un amau ukna leh siamna tawh kizuiin picing takin amau leh amau hong nungta thei in hong nungta zo uh leh”cih thu hi.

Ei lai kihilhdan bel…..laipil, laisiam, laitaan sangpi nei napi nasep ngah zo lo leh a kivaak zo lo tampi om uh hi. Ei Zomi ten Montesorri lai kihilhzia zuih huai ta sa ingh. Zomi Quavadis