Lai at ding, lai sim ding ~ Pau Khat Suan

Lai at ding, lai sim ding ~ Pau Khat Suan

Sia leh Makai pawlkhatte mipi in thu thei leh amau’ mun kip nawnlo ding patau uh ahihman in mipi’ simtheih ding a thu kigen, lai ki atat zadah in hemlam tawh lai-at thugen te phinphin khamkham uh hi.

Lai at pen a,b,c utbang a kigual suk mawk cihbang hilo hi. I at thu i theih i tel kul a, i up ban ah thutak ahih kul hi. Khut awngtah, key board omtah ci a meekmeek pong tawh simtheih ding lai ki-at theilo hi.

Ukcip netniamna pan i suahtakna ding in pilna leh theihna kisam ahihman in Mipi in lai sim semsem ding, thu ngaihsun semsem ding leh pilna theihna kihawm semsem, kihilh kigen semsem ding, lai atte’n zong simtheih ding leh pillawhna ding thu le late a tamzaw sem at semsem ding kisam hi.

Lai atna in gawl puakkham dek liang a thugenna leh otna sang saupi ban zaw a ginngaih zaw hi. Lai simna pan in thu kigen ngaihna sang thu theihna kicing kingah zaw hi. Sinlo, simlo, theilo, tello pi a nakpitak nasep hanciam phengphangna sang in, sin leh tel a sepna tawh nasepna agah limci zaw hi.

Sim in, sin in, thei in, tel mahmah in. Tua ciang semkhia in. Nang’ lawhcinna bek hilo in, na sepna na genna in midangte phattuamna pia ding hi. Simlo sinlo, theilo tello pi a na hammai leh phattuamna sang siatna piangsak zaw ding hi.

Mi pawlkhat in a theih sunsun leh a siamna sunsun tawh siapi semnuam den uh ahihman in midangte ong khangkhia a, khangthakte amau sang a pil a siamzawk man in siapi semthei nawnlo ding, a tutna a dinna kilok ding a patauh man in paulap tuamtuam tawh simna leh sina khaktan theihna ding in zahko in langbawl uh hi.

Theisiam tak a awlmawh loh ding kisam hi. Na simna, na sinna khawlsan tuan kei in. Telna tawh sepna agah limci zaw ahihna phawk gige den sa in sim in, sin in. Pau Khat Suan