Kyaw Thu in “Ramon Magsaysay Award” ngah

Kyaw Thu in “Ramon Magsaysay Award” ngah

Kawlgam sungah Film Actor minthangkhat banah misivui nasep tawh akithei mahmah Kyaw Thu in “Ramon Magsaysay Award” akici pahtawina minthang mahmahkhat ngah cih kiza hi.

Kyaw Thu pen Kawlgam sungah Free Funeral Service Society (FFSS) cih mintawh misi vui kawikawi in, mipi adingin nahoih tampi semkhia ahih manin, Ramon Magsaysay Award akipia ahihi. Hih pahtawina piakpawipen August 31 ni in Philippines gam ii khuapi ahi Manila ah nopcitak in kibawlding a, Kyaw Thu zong hih pahtawina asangding in August khasung in Philippines ah paiding hi.

Ramon Magsaysay Award pen 1957 kumin aki pankhia hi a, Philippine President ii amin apuasuak ahihi. Kumsim in hih pahtawi piakna kinei a, leitung muntuamtuam panin mipi ading nahoih asemte pahtawina in akipia ahihi.

Minam, biakna, upna, numei pasal cihbang deidan omlo in, nahoihsem ahihnakleh hih pahtawina kipiathei a, Asian gamsung ii Nobel Prize akiciphial ahihi.

Kawlgam panin Kyaw Thu bek akihel hi a, adang gamtuamtuam ahi Kommaly Chanthavong (Laos), Sanjiv Chathurvedi (India), Ligaya Fernando-Amilbangsa (Philippines), Anshu Gupta (India) cihte paninzong pahtawina sangding in vapaiding uhhi.

Kyaw Thu pen Kawlgam sungah Film Actor minthang khat ahih mahbang in Actor, Actress khempeuh in alunggulh mahmah uh ahi Myanmar Academy Award zong angahkhinsa khat ahihi. ZD Sawltak