Nekkhawm: Kei nongphawk nading un ~ Rev. Nang Sawm Piang

Nekkhawm: Kei nongphawk nading un ~ Rev. Nang Sawm Piang

Thupatna: Mihingte pen anne lo-in kinungta theilo hi. Pumpi ading bek hilo-in Kha nuntakna adingin zong anneek kul hi. Lai Siangtho sung leh Pawlpi tangthu sungah Pasian mite in an neekkhopna pen pumpi gilvah nading bek hilo-in Kha gilvah nadingin zong na zang uh hi. Thuciam Lui sungah Pu Abraham le Pi Sarah tungah tapa neih ding kamciamna a ngahna mun pen an neek-khopna mun nahi hi (Pian 18:1-15).

Sinai mual ah TOPA Pasian leh Israel mite in thuciamna a bawl lai-un zong an neek-khopna mah tawh na kipsak uh hi (Pai 24:9-11). Thuciam Thak sungah Topa Jesuh in Pasian’ ukna gam a taangko ciangin anneek pawi tawh a gentehna tampi om hi. Amahmah in zong mawhneite, numei gilote, siahdongte tawh an ne khawmin Pasian’ itna leh mawhmaisakna thu genna munin na zang hi. A thupipen-ah thuciamna thak a bawlna mun pen nungzuite tawh a nunungpen an neek-khopna mahah na bawl hi.

Hih a nunungpen anneek-khopna (the Last Supper) pen pawlpi in kizang to suak a, Topa’ ankuang (the Lord’s Supper), neekkhawm (Communion), lungdamkohna (Eucharist) cih bangin min kipia hi. Thuciam Thak sungah neekkhawm hong pianna thu le a kizatna munte i sim ciangin theih ding le zuih ding a tawmpen “kammal sagih” na om hi (sim ding Matt 26:26-30; Marka 14:22-26; Luka 22:14-20; Johan 6:35-58; Sawl 2:46-47; 1 Kor 10:16; 11:23-34).

Tuate in: neekkhawm i cih pen phawkna (Remembrance), neekkhopna/ kilawmtatna (Communion), mawhmaisakna (Forgiveness), thuciamna (Covenant), anvakna (Nourishment), Lametna (Anticipation), lungdam-kohna (Eucharist/Thanksgiving) ahi hi. Hih thului sungah tutung adingin kammal masapen “Phawkna” thu i gen ding hi.

Phawkna nam nih:

A nunungpen nitak-an neekkhopna ah Topa Jesuh in, “Kei nong phawk nadingun,” cih kammal a zatna pen Luka 22:19 le 1 Kor 11:24 sungah kimu thei hi. A thupi mahmah kam vaikhakna ahi hi. Tua ahih manin “phawk” cih kammal limtakin ngaihsut- huai hi. “Phawk/phawkna” (remember/remembrance) i cih pen a beisa hun-a thupiang, a bei-sa huna sepna, a beisa hun-a tuahkhak thute lungsim sungah hong “kilo-kik/kiphawng-kik” (recalling/recollection of the past) cihna ahi hi. Tua phawkna sungah phawk dan nam 2 om hi, kici hi. Tua nam 2-te a nuai-a kammal zatziate tungtawin kikhentel thei hi.

1. A beisa hun lungzuan-lawh phawkna:

Hih bang phawkna nam pen “nostalgia” kici hi. Greek kammal nih “nostos” (inn ciahnopna lungsim–longing to return home) le “algos” (nasa–pain) kigawm hi a, a kammal ahi bangin let leng “inn ciahnop luatna lungsim natna” cih ding ahi hi. Hih kammal pen “phawkna” tawh kisai-in a kizat ciangin “a beisa hun mah a nuampen hi, a hoihpen hi” ci-in tua bang hunte ah ciahkik-nopna ahi hi. Mimal nuntakna, innkuan nuntakna, pawlpi sung leh gam ki-ukna ah zong hih bang phawkna nam pen kimu thei hi.

A beisa hun khat lai pen a nuampen a hoihpen hun (golden age) hi, ci-in ngaihsutna ahih manin tuhun le mailam hun pen haksatna le buai-na bek tawh kidim lel ding hi, ci-in zong ngaihsun pah hi. Hih bang phawkna in tuni leh mailam hun adingin geelna le lametna omlo sak zo mawk hi. Thupha a kailo, kimanna a neilo phawkna nam ahi hi.

2. A beisa hun nuntak-lawh phawkna:

Hih in a beisa hun phawkna tungtawnin tuni-in sep dinga kilawmte seplawhna phawkna nam ahi hi. Hih bang phawkna nam pen Greek kamin “anamnesis” kici-a, Hebrew kamin “zekher” kici hi. Topa Jesuh in a nunungpen nitak-an neekna ah “kei nong phawk nadingun” a cihna mun ah anamnesis na kizang hi (1 Kor 11:24). Nungzuite in Jesuh tawh a kikholhkhop hunte le anneekkhop hunte a phawk uh ciangin lungzuan-lawh ding ciang lel hilo-in Jesuh’ kam vaikhakte bangin seemin nuntakpih ding, cih deihna ahi hi.

Tua bangmahin, Thuciam Lui sungah Hebrew kammal “zekher” a kizat ciangin zong phawkna le sepna (remembrance in action) na kizom hamtang hi. Gentehna-in, Paikhiatna 2:24-25 sungah, TOPA Pasian in Israel mite’ thuumna za-in Abraham, Isaac le Jacob tawh a thuciamna “phawk” (zekher) a, Egypt gam saltanna panin amaute suahtakna piangsak hi. Tua bangmahin a beisa phawkna hangin Israel mite mawhna kisikna pianga Pasian phawklawh uh hi (Ezekiel 6:9). Pasian in Hezekiah kumpipa’ thuman cihtakna a phawk manin a natna panin damna pia hi (2 Kum 20:3).

Tu-in hih numbat 2-na ah i gennop bulpi ahih leh a beisa hun/thu phawkna hangin tuni nuntakna ah kilamdanna, sepkhiatna khat teitei a piangsak thei phawkna nam om hi, cih ahi hi. Topa Jesuh in “kei nong phawk nadingun” a cih ciangin hih bang phawkna nam a gen ahi hi. Amah i phawkna hangin tuni-in eite in daihna, nopna leh lametna ngahin tuate in Jesuh deihna bangin nuntak zawh nading tha thak hong guan ahi hi.

Neekkhawm pen Phawkna:

Neekkhawm sungah i lut ciangin “khomun” pen eite adingin a kipia Jesuh pumpi phawkna hi-a, hai sunga lenggahzu ahih leh eite adinga a kibua Jesuh sisan phawkna ahi hi. Tua khomun leh hai i san’ ciangin Jesuh pen eite adingin singlamteh tungah hong kipiakna le a sihna pen phawkloh phamawh hi. Ahi zongin tua Singlamteh le Kalvary mual phawkin a lunglen-lawh ding ihi het kei hi. Pastor khat in Good Friday nitakin neekkhawm pia a, “tu nitak Topa Jesuh hong nusiatna tawh kisai-in,” ci miau hi. Topa Jesuh pen a beisa kum 2000 val lai-in si-in hong nusia hilo hi.

Amah thokik-in Pasian’ ziatlam ah tu-in eite adingin thu hong ngetsak hizaw hi. A Kha Siangtho tawh eite lakah hong ompih gige ahih lam i phawk ding ahi hi. Tua bek hilo a, neekkhawm a hong pia, an hong vak innteek pen Topa Jesuh mahmah ahi hi. Pastor-te pen neekkhawm a pia hilo-in a makaih hibek hi. Tua ahih manin neekkhawm pen a sisa makai khat mi hoih khatpeuh phawkna pawi (memorial service) hilo hi. Si-in a thokik Topa, eite lakah Kha Siangtho tawh hong ompih Jesuh Khrih phawkna ahi hi.

Tua banah, khomun le lenggah zu i san’ ciangin Jesuh pen hong honpa, hong tanpa, hong suaktasakpa, i nuntakna tha hong dimpa, le sih khit nungah vantung innpi i ciah ciangin hong dawn ding i Pa ahih lamtak i phawk ding ahi hi.

A beisa i nuntakna, tuhun le mailam hunte ama’ khutsungah om ahihlam i phawk ding ahi hi. Tua hileh i nuntakna sungah a beisa hunte lungzuan-lawhlo, khakham vei-lawhlo ding hang a, amah i phawkna hangin tuni tuhun nuntakna ah thathak tawh hong kidimsak, Ama’ deih bang sepnopna hong piangsakin mailam i nuntakna pen Lametna tawh hong kidimsak ding ahi hi.  Kammal 6 a omlaite mailamah i zop lai ding ahi hi- Rev. Nang Sawm Piang