Kuala Lumpur khuasung ah Motorcycle khawlnading atuamin ki bawlsakta

Kuala Lumpur khuasung ah Motorcycle khawlnading atuamin ki bawlsakta

Kuala Lumpur City Hall (DBKL) te’n khuasung Traffic Light pawlkhat ah “Motorcycle Priority Zones” ci’n Motorcycle khawlnading atuam ngiatin bawlsakta uhhi. Tuni Friday (Mar 17) ni in “Motorcycle Priority Zones” bawl kipanta uh a, khuasung Motorcycle akilimzat nadiakna mun aom Traffic Light te ah tuambawl sakkhin uhhi.

Traffic Lights ngakna ii amailam ah asan leh akang (Red & White) tawh Painting zutsak uh a, Motorcycle tepen tuasung bekah khawltheiding, tua aza kizutna ii apualam ah khawlthei nawnloding ci’n tangko khia uhhi. Tuamah bangin mawtaw hawlte inzong tua Motorycle khawlnading in akibawlna azat kizutna sungah khawltheiloding cihi.

Kuala Lumpur Mayor Mohd Amin Nordin Abdul Aziz ii genkhiatna ah hihbangin Motorcycle khawlnading aki tuambawlsakna pen khetawh lamkan in apai mite adingin Safety ahih banah Motorcycle hawlte adinginzong Safety hoihzawding in aki geel hi ci’n genkhia hi.

Tuabek thamlo, Motorcycle tawh damiah ataihthei, Car Windows te sukham in van akaikhiaziau thei cihte zong phatuamding ci’n Friday ni Press Conference ah genkhia uhhi.

DBKL in tulaitak “Motorcycle Priority Zones” pen Jalan Raja Laut, Jalan Tunku Abdul Rahman, Jalan Tun Perak cihbangin mun 3 ah bawlkipan khinta uh cihi.

Jalan Tunku Abdul Rahman akipan adang Motorcycle aki limzat phadiakna munte ah akisam bangbang in kibawlbeh totolaiding cihzong genkhia uhhi.

Traffic Light ii amai ah “Motorcycle Priority Zones” ci’n khawlnading atuambawl tepen Pi 20 sungbang hi a, Motorcycle atawmpenpen 20 tabang khawlkhatin khawlkhawm theiding in ageel uh ahihi. Khasim in akisapna munte ah bawlbeh totoding uhhi.

More: Numei khat Motorcycle in nawkpai in athawhma mawtaw in taihbehsuk in si

Hih lampi thukhunthak pen kha 3 sung kisinna in kizangphotding “Trial Period” ci’n DBKL thunei te’n genkhia uhhi. Tuakhit ciangin Motorycle tuangte hih thukhun azuilo aomleh RM50 panin RM100 ciang ki liausak theiding cihzong genkhia uhhi. Malaysia gamsung aom Zomi te lakah Motorcycle azang omkawikawi ahih manin, hih thukhunthak pen theihhuai hi. ZD Sawltak #zomidaily