Kua vaipuak hiam ~ Cin Lian Khai
Zomite ih kisap deuh pen Tui, Mei, Lampi, Lei, Sanginn, Zato etc te ahihi. Pawlkhatten MP kitelcing khin ahihman un amau vaipuak hi ci mah leh Pawl khat in Mipi vaipuak hizaw hi ci uh hi. Kua Vaipuak taktak hiam?
Mipi tangmi MP kitelcing khin ahihman in ih Zogam ih kisapnate amau hong van ding hi. Mee tang adeih lai un hong kamciamte uh hong tangtung sak ding hi. A laihawmte uh zong kum nga sung in muatlo ding hi.Mee zong lai in amau hong munuam a, mee angah khit uh teh zong muh zawhloh in om uh hi. Hluttaw kikhak sung in zong hong zin kawikawi ding uh hi. Mipi in bangmah kisem zolo ahihman un ih muanteng a kitelcing hipah hi.
Telcing khat ahih uh hang amau’ thu neihna tawm lai mahmah hilo maw. Tua hang in 2008 Constitution laih ding acici uh hiven. State Hluttawte khasum mahmah enve MMK 500000 bek hiven: tuatawh kua vakvak zo ding. A taktak in Upper leh Lower Hluttaw ah Development lam akikupkup uh zong ngeina om kei. Amaute Law Makerte hi. Union MP telah Naypaydaw ah Hluttaw kah cip uh a: Zomite kisap data Collection hong bawl man ta dihdih lo.
A khasum uh tawh micial ding hileh amau zong akhasum uh MMK 1000000 akhamlo. Tax leh tenth piak ban ah aparty tek vuah 20% bang apiak uh kul. Hong van zawh zahzah uh hihsam uh ee. USDP te Budget gelsa lopan zong Zogam ading honkhat mah hong kaikhia uh ee. Nakzang Lei leh Tedim-Cikha Metal Road bang Zomite sum tawh bawl zawh ding hisam kei. Galkap ukna dan a atung lampan hih kisam uhcei hih hong pia ning cih theihlo hiven. Document kisam hiven.
Thukhat leuleu ah khua tuamtuamten a kisapte uh amautawh kisai Myonee ah puak a: Myonee Zum pan Pyinee zum Hluttaw dong apuak ding uh hiveh aw. Ahihhang Khua pawlkhat ah Hausate nangawn in tuabang hih natang theilo ban ah bang department ah bangcin laigelh in bangci nget ding thei lo lailai hi ven.
INGO/ NGO ten e leh Zogam ah bangteng hongsem uh ahia leh. Khangtohna taktak ding in asem zo taktak INGO/ NGO lian tampi om nailo pi. United Nations Habitatten khua 50 ah Community Action Planning bulphuh in nasem tua in tampi honghuh veve ahihhang Zogam ah khua 200 val hiven.ZIUSA in zong ama sep zawh zahzah Lampi puah Leisia bawl etc hih mah ee.
Kumpi zong zawng mahmah in ei kisap khempeuh hong pia mengmeng theilo a hawm diamdiam uh hiven. USDP kumpi lai aa ih sumbat teng zong tawmlo pi. Tun ASSK sum leitawi in vakvak hiven NLD Budget 2017 akipan hong tam zaw sam lo dia.Budget bangzah in tawm a atam zong in State CM nangawn in ama’ thu tawh tengza bek zek thei tuasang atam zawk leh Union ah Document tawh apuak angen hiven. Tua ahih leh ih kisap ih ngah aa ih ngah kei zong Document neihkul aive maw. Data Collection bawl kul cihna aive maw. Kuan bawl ding? Kuan tuate kai khawm ding?
ZCD ten Tedim leh Tonzang ah Pyituh Hluttaw zo hiven amau vaipuak hi ee. Tua leh Tedim leh Tonzang Myonee khempeuh ZCD bek in zotuan kei. ZCD zong ki koko ki langh pangpang veh aw.Ki langpang hun 2016 Nov 8 ni-in beita tun Zogam khantoh nang kua party cih omlo in ih pang khop phot ding hi. 2020 ciang kidem in kilanpang kik pan ding hizaw hi.
Tua ahihciang a Leitungbup a om Zomi khempeuh kipawl khawm in Data Collection bawl in Document kim kai khawm in ih MP te puak ziahziah in MP ten akisai zum leh Hluttaw ah na puak limlim uh leh kam dimdim a mi nasep ding ih gen saksak sang in Zomite khangtoh gimnam zaw ding hihangh. Time for Global Zomi Action! Cin Lian Khai( Zogam Khaino) Tedim
Comment piaknop aomleh...