Kua tenpihding kahiam? ~ Thiau Luah Pau

Kua tenpihding kahiam? ~ Thiau Luah Pau

Zomi khangno te a ding deihsakna tawh laibu khat Topan hong bawlsak zo ahihmanin Topa min ka phat hi. Laibu sungah ka gelh thubulpi nam nga tawh a tomkim cingin Zomi Daily lai sim te tungah kong hawm sawn nuam hi. Leitung ah Pasian in mihing khat in hong piansak khit nung sang a pung ding a khang ding leh ama min thangsak dingin a hong bawl ahi hi. Tua manin mihing te hong ki hanthawn lah hilo, hong ki pantah lah hilo a hun a cin ciangin lawm ki ngai in zi ki nei in pasal ki nei veve hi.

A hun cing ta a lawm i ngaih theih kei leh lah a thu tuampi khat hi ding hi. Tua ahih manin zi nei pasal nei veve zi hoih pasal hoih na neih khak ding a thupi mahmah ahi hi. A thupi pen ah bel zi hoih pasal hoih pen Topa kiang pan bek in ki ngah thei hi cih i mangngilh loh ding thupi hi. Topa kiang pan i lamet kawm mah in ei lam pan in zong i lungngaih ding nam nga kong behlap nuam hi.

1. Kum (Age)

Zi leh Pasal i zon ciangin muh bangbang, hoih sak bangbang cih tawh a kum a kha tel mel lo pi a pum neih suk mawk hi thei samlo hi. I ki ten khit ciang u aw nau aw ci a i ki sap ding dan a om melloh ciangin kua ma theih loh in ei leh ei ki sungsia cih bangin ki suan na khat leh suahtak loh na khat a om tawh ki bang hi. Tua te sangin a poi zaw bang hiam cih leh numei u zaw bang ahih leh i kum hong tam ciang buai loh ding teng tawh ki nung buai thei hi a ci nuam ka hihi.

I ki ten khit ciang khel kik theih hi nawnlo ahih manin i neih ma ahun lai in na lawmngaih pa/nu kum bang zah pha a kum bang zah ki khai na hi uh hiam cih ngaihsun masa in. I ki neih ma in i phawk khak loh hang i neih khit ciang hong thupi mahmah ding hi.Ahih theih nak leh pasal te mah u zaw henla numei te mah nau zaw ham tang leh hoih pen ding hi.

2. Biakna (Belief)

Zi leh Pasal i zon ciangin a mel hoihna bek en loin bang biakna bang pawlpi hiam cih kan tel masa leng hoih pen ding hi. Zi leh pasal a i ki neih khit ciangin i mel te hong thupi nawn loin i biakpiakna mun hong thupi mahmah hi. Minam kibanglo sangin pawlpi upna ki bang lo pen i nupa kal bek hi loin i inn kuan a dingin zong hoih het lo hi. I biakpiakna i pawlpi hong ki bang kei leh i nupa vai, i tate vai zong hong lemlo mang khin hi.

I ki ngaih lai in zong i biakna kin khol lo napi hangin i ki ten khit ciangin a kin mahmah dan peuh ki bang san thei lai hi.Biakna ki bat loh manin nupa a buai tam mahmah hi. I ki teng suak zongin i ta te maban ah nu lam maw pa lam maw koi zui zaw ding cih tel om mel loin om thei uh hi.Tua bang nupa sung pan a piang ta te pen a tam zaw a gol uh ciang zuihna ki cian mel nei loin om thei uh hi. A hih theih nak leh pasal te upna khial lo hi man mah hi cih i tel nak leh zi te in pasal a mah i zuih zawh ding hoih pen ding hi.

3. Minam (Clan)

Zi leh Pasal i zong ciangin kua mi kua nam kua beh kua phung kua khua kua tui hiam cih i tel ding thupi mahmah hi. Minam dang zi leh pasal neih khak pen khialhna ahih pah sam loh hang zong masa kei leng hoih zaw hi. I ki ngaih khit ciangin ngai khin i hih manin kua mi kua sa cih te ki awlmawh lo kha thei hi. I neih ma in bel a nopna a noplohna ki thei nai lo a, i neih khit a ki khel theih nawn loh ciang ki tel pan hi.

Na neih ma in na theih nop leh a nei sa te dong le cin ong gen nop leh gen theih ding tampi nei kha din g uh hi.Minam dang gen loh i beh i phung i khua i tui cih te nangawn limtak et kul lai hi. I mi i sa sung bek ah zong a gina nam leh a ginalo nam cih bangin i khua i beh zui in pilvang huai tampi om lai hi. Zi leh pasal na zon laitak in i mi i sa kua mah om het lo mi dang neihloh phamawh cih bang ahih kei buang leh minam ki bang mah zong in nei leng hoih pen ding hi.

4. Gamtatna (Discipline)

Zi leh Pasal i zon ciangin a mel a sa hoih sakna ciang bek tawh nei suk mawk kei in. Zi melhoih pasal mel hoih bel ki deih ciat kha mah ding a, ahi zongin i ki ten ni a ki pan a mel te hong thupi masa nawn hetlo hi cih phawk huai mahmah hi. Na zi na pasal a mel hoih mahmah napi a ut ut in hong gamta in hong kam pau zaizai mawk leh na lung kim zosam lo ding hi.

Mel hoih ningtui ki dawn thei lo mah cih kul ding hi. Ni dang lai in bel mel ki khel thei loin, gamtatna ki khel thei hi ki ci a, tu hun ciangin mel te ut bangbang in ki khel thei zaw ta a gamtatna khel ding haksa ki sa zaw ta hi.I ki ten khit ciangin i bawl phat kikkik ding zi leh pasal i neih sangin bawl phatphat puah phatphat a kul nawnlo ding zi leh pasal mah zong thei pah leng hoih pen ding hi.

5. Pilna (Education)

Zi leh Pasal i zon ciangin mi khempeuh in a pil a siam mah ki deih ciat ding hi.Leitung pilna zong nei hen la, ciim in tei lai leh hoih zaw kan lai ding hi.Ahi zongin Laisiangtho in numei khempeuh lak ah a pil khat zong a om loh na leh pasal tul khat bang ah a pil khat bang om thei hi na ci ahih teh a pil ki om lo cih na hi pah hi. Hih tak ah pil na i cih pen leitung pilna a gen nuam zaw ihi hi.

Zi leh pasal i zon ciangin ei tawh ki level pian te mah i zon theih ding thupi hi. Pasal pilna neipi khat hi in zi ten bang mah theih nei mel lo cih bang pen lem khin tak sam lo hi. Pasal in pilna nei mel loin a zi pil siasua keii mawk cih zong hong ki lawm khin tuan lo ding hi. Leitung pilna ahi zongin kha lam pilna ahi zongin numei te sang pasal te hong hai zaw sam kei henla, numei te zong pasal te sangin hong kipil sak zaw sam kei leh hoih pen ding hi.

Hih a tung a teng pen kei muh na dan a tom a kong at hi in laisim te muh dan tawh a ki tuak lo a om leh i ngaihsutna ki bang lo hi na cih sak unla, no a tawh ki tuak kha a om leh i ngaighsut na ki bang ai ve maw na cih sak un cih kong thum nuam hi. A ki cing zaw a theihnop, kuppihnop a om leh a laibu zong a munmun ah ki zuak hi. Mi mal mah in zong nong kuppih thei uh hi. Laisim nungak tangval lai te khempeuh zi hoih pasal hoih a mu dingin Topan thupha hong pia hen. Lungdam, Thiau Luah Pau