Kua aa ding sem, bangci sep – 3

Kua aa ding sem, bangci sep – 3

(Hih anuai aa thute khempeuh Kipawlna ii deihzia hikimlo thei aa, mimal lunggulhna pan cile’ng khiallo hi.) Kipawlna nasem mi khat ahih leh Kipawlna leh naseppihte tung cihtak kuhkalna tawh, nophun noploh hun cilo-in, a dingtang zo kisam ding hi.

Mipihte aa ding ki piakhia cihtak ciangin, a pilna zahzah leh a theihna zahzah pen itsiik hetlo ding cih theihsa hi.Ahi zongin, hun tuazah bek pianuam, tuadan nasepte ciang semkinlo, ahih kei leh team tawh na sem nuamlo cihte kidop huai ding hi.

A kip Thukhun leh Dante tawh masuanna kinei hi aa, khat veivei tua By Law bek hilo-in By Love mahmah tawh ih lungsim sawl kul zelzel hi. Banghang hiam cih leh, ih gensa mah bangin mihing khat leh khat ki panpihna nasep hi-in lungsim ngaihsut zia leh thu muh zia akibang hetlo nih ahih kei leh tampi kikal aa kipiakkhiatna tawh na kisem ahi hi. Ih seppihte zong mihing vive hi aa, ih panpihte zong mihing vive ahi hi.

Hih ka nasepna pen panpihna a piakhia ding hi’ng cih lungsim zong vom tawntung kisam ding hi. Tuamah bangin, Kipawlna pan ahi zong, mipi tung pan ahi zonginhamphatna khat peuhpeuh lamet khak loh ding zong thupi lai hi. Ngahkik ding khat peuhpeuh lametna tawh nasep hikei leh hoihzaw aa, ih ngahkik pen ih panpih ahih kei leh ih nasep ii a gah a kimuh teh, tua a gah pen ih ngahkik cih zahin ngaihsut zawh ding zong kisam ding hi.

Tuamah bangin, ei kihelna vaihawmna khat pen a tawpdong a tun’ ding, a kizawh dong a tun’ ding ei mawhpuak mah bangin ih ngaihsut zawh ding kisam hi. Tua mun ah, kei panmun tawh ka sepding tua ciang hikei, hiciang hikei cih lungsim neihkhak ding lauhuai mahmah hi.

Seppihte tawh ki etkak khak theihna ih zatsiam kul hi. A vai kizawh dong keima panmun pan ka sep tentan ding hi, cih khentatna kisam ding hi. Tuapa, tua nu-in sem leh semlo cih etkhakna tawh maban kinawt theilo ding hi.

Eimah tek veina takpi iki sawlsak, iki tawsawn sak nak leh, sepding a tam mahmah lam kimu hamtang hi. Sepding a mulo khat pen a veina ki ciangtan mahmah, ahih kei leh amah mahin a ciangtan khat ki cithei hi. Panmun kim ah sepdingte leh Kipawlna ii maban aneng-atawng a hikei zongin, koici ciangah bang dinmun tawh omta ih hiam cih pen, a vei den, a vei takpi khatin telden ding hi. A vot ngeilo veina, sepna kisam ding hi. Tg. Kham [iNFO]