Khuahun Dongtuakna Pasian in thei
Mite’ theihna le a gen thute uh kibang lo-a, ahi zongin Pasian in hong theih khat omin tua pen ih mawhna, Mawhna (Sin) hang ahi hi. Ih kibatna thu ih gen ciangin Mawhna ah kipawl hi, kibang hi.
Kawlgam ah tutung guahtui tam luatna hangin a diakin Rakhine State, Sagaing Division, Chin State le Magui Division te ah tui khang pha deuh hi. Chin State ah lei tolh le mencim om a, tua pen zinling namkhat heuh hiam cih nop huai phial ka sa hi. Hakha khuapi kisia mahmah a, mundang ah kituah ding ci phial hi. Tedim khuapi bel to mahmah lai bilbel napi in, Tedim gam khuate nak siat mahmah ahih manin, Tedim khuapi ah kituah ding khua honkhat hong om hi. A khat kizuanin, a khat kinusia ding cih bangin ih tuahsiat daan zong kibang lo hi. Guahtui tamluatna hangin dongtuakna mun pen Rakhine nasia pen kici a, tua zom ah Sagaing hileh kilawm hi. Ahi zong Zogam a dongtuakna pen ei’ gam ahih manin siahuai ka sapen hi.
Hih dong tuakna hangin zuau thei kamsang thuhilh maan lo pawlkhat in zong hunhoih pha phet ei a cici zong om ding uh hi. Pawlkhat in, hih bang dong tuakna hong piang ding a kigen khin hi, ka gen khit sa hi, ka mangmat sa hi, ci ding uh hi. Topa’n ong hopih sa hi ci lai ding hi. Pawlkhat in Kawl phonggyite in a genkholh sa uh hi ci ding uh hi. Pawlkhat in hih tungtawnin mailam thu gen kholhna nei nuam lai ding uh hi. Pawlkhat in na tua cih kei vua leh hih sangin a lauhuai zaw hong tung lai ding hi, ci ding uh hi. Pawlkhat in ka kamsanna uh, ka thusuak uh, ka seide uh, ka kamtuam uh, ka kha thugen uh a kinial manin hih bang a piang hi a ci zong om ding hi. Pawlkhat in a tuahsiate in tutung taktakteh antang in thu hong ngen ta uh hi, a cih san khawng zong om lai ding hi. Pawlkhat in ih sanggamte’ tuahsiat laitak gen ding kilawm lo hi keileh hih tuahsiatna tungtawnin ih gennop thu tam mahmah hi ci kha ding uh hi. Pawlkhat in hih bang hun ciangin van le na le antang manh a khang sak pen Christian te hi pha deuh uh, ci-in kigen hi.
Kumpipa U Thein Sein Kalaymyo ah ong pai masa pen-a, pawlkhat in U Thein Sein pen Zomi Vangtehte nupa khat in amui-sa hi a, tua manin Zomi omna Khuapi ong pai masa hi ci uh hi. Pawlkhat in Yazagyo Damp a kitap ding lau ahih manun tui hong khah uh a, tua manin Kawlpi pen tui hih zahin a khang hi ci uh ahih manin tua bang a cite Mongzua ah mi giat bang kiman hi a ci khawng zong om hi. Kawlpi ah OG Syavuan nupa khat in U Tein Sein tungah Zomi (0r Chin) te in hong huh vet kei uh ci-in gen a, U Tein Sein in tua bangin gen kei in, Chin te’ thukhualzia ka theih sa hi, Kawlpi ah sawtveipi galkap sem in om ngei ing cih san hi kici hi. Kawlpi galkap bu u Lian khat in Taungphila-a dongtuak camp a omte kiangah hong huh zo kei nung ci ahih manin, Tein Sein Taungphila a pai ciangin mipi in zong kopah a, Tein Sein in Ta Aye tungah na mipa thuhilh in ci-in hopih ziau a, Ta Aye in zong ek kha tui nam zenin thuhilh hi, kici hi. Pawlkhat in Zomite omna munpiteng tui in hong bat ding ciangin Pasian in tuikhang khawl sak hi ci-uh a, pawlkhat in tuikhang kiam khit ciangin, vanleng kuan nungah datsi sai khat mei kang in laihuai mahmah a, tua in tui khit ah mei tawh leitung sawpsiangna om ding cihna lim khat hi cih bang nengnengin thutampi tak a om lak panin, —-
Tutung guahtui tam luatna hanga, tui tam lua pen tuicin hi loin, tuikhang hi a, hih banga, kammal zatna pen Zolai khansuahna hi pah hi. Tuikhang a lauhuai hangin Zolai khan ding lau huai loin nuam huai zaw hi. Tuicin cih pen mun cin tengah tui in tumin, leitung mual khat zong a kidawk nawn lo dongin a omna pen Noah tuicin ahi hi. Tutunga pen tuicin hi loin tuikhang hi. Leitungah tuicin tung kik nawn lo ding Pasian’ kammal in ong kha muang sak hi. Tua Pasian’ ong kamciamna hangin tuikhang pen a hun ciangin a kiam kik hi zaw hi. Pasian in thu-um lo mite a thuhilhna hi, thu-ummite mahmah zong hong thuhilhna hi cih ding sangin, hih bang dong ih tuah ciangin Pasian’ kammal sungah ka khamuang hiam cih thupi zaw hi. Khamuangte in zong a kituak lai ding mah hih leitung hi. Dongtuakna hanga sihna pen thu-umlo mite bekin tuak loin thu-ummite in zong tuak hi. Hih bangin catatrophy kici khua hun hamsatna ih tuahna pen kuama mawhna hi tuam loin ih vekpi’ Mawhna hangin hih leitungah hih bang thu hong piang hizaw hi. Hih bang kimlepaam hamsatna pen a ngeina mah hi lozawin Mawhna hang ahi hi. It is not natural. It is not a biological event. It is because of Sin. Nang le kei’ Mawhna hang hi.
Tua ahih manin a kuama ciat in Mawhna ii a thanghuaina thu ah ih kiphawk ciat ding leh, midangte in a tuahsiat laitakin khut zepsa in nuihsan ngam ding hi lo a, ih mawhna hang hi, hih mawhna hang hi ci-a mukhawm a, ih kihuh ih kipanpih ding a thupi ahi hi. Pasian in amaute bek a thuhilhna hi loin eite khempeuh hong thuhilhna hi a, amaute bek mimawh hi loin eite zong mimawhte ih uh hi. Eite pen mawhna hong kimai sak mimawhte ih hi a, amaute pen a ki maisak lo mawhneite ahi uh hi. Hih leitung pen nausuak nuam bangin thumin tau-in a omna pen Mawhna hang, nang le kei’ mawhna hang ahi hi, cih phawk ni. Ahi zongin tua a “hang” pen Pasian in kisam a sakna mun le kisam a sak hun in piang sak thei hi. Bangmah khempeuh Pasian’ khut sungah om hi. God is in control. Khua hun hong hoih kik mawkmawk hi lo a, Pasian in khua hun hoih sak kik hizaw hi. God is sovereign.
Nate pen a piang zanzan hi lo-a a piang sak khat om hi. Tutung tuikhang hong daih kikna pen thusuak kamsang kineite’ siansuahna hang hi zaw loin, a khua hun a kem pa in hun a sak ciangin a khawl sak hi a, Lai Siangtho sunga leitung bup tuicin tungnawn lo ding a cihna kammal tawh kituakin khua hun sia a khawl kik hi zaw hi. A taktak in cilehang thusuak a kineihte’ siansuahna sangin Pawlpite’ thungetna le thu-um mimal in in thungetna vanglian zaw pek hi. Mihingte in hih bang khuahun dongtuakna pen a hang tuamtuam genin, khat le khat bang kinial liang uh a, ahi zongin Pasian in ahang khat bek mu-a tua pen Mawhna hang ahi hi.
Evan. Suang Dal
Comment piaknop aomleh...