Mexican President in kulhbaang bawlna man US kipia loding hi ci

Mexican President in kulhbaang bawlna man US kipia loding hi ci

Jan. 26, 2017: Mexico President Enrique Pena Nieto in US President Donald Trump in US-Mexico gamgi ah kulhbaang (wall) lam ding a hanciamna a mawhpaihna thu gen a, tua bangin kulhbaang kibawl leh hong kipumkhat sak sangin hong khen zaw ding hi. Mexico in kulhbaang bawl ding kisam kisa lo a, ka gen sa bangin tua kulhbaang bawlna dinga sum beite kipia lo ding hi ci-in ka gen kikkik hi ci-in zan in Televised message tung panin gen hi.

Trump in kulhbaang bawl ding a geelna pen Latin America gam makai dang ten zong mawhpaih uh hi. Mexico pen suahtakna khempeuh a nei gam (sovereign nation) khat hi a, tua bang a kineihna hong kizahtakpihna ding kikalh hi ci-in mai kal ciangin White House ah Trump kimuhpih ding Pena Nieto in ci hi.

Mexico in kulhbaang lamna sum beite US a piak sawm loh hangin zan zingsang in hih bang kulhbaang bawlna dingin Trump in suai na kai ta hi. Trump in, “Gam khat in gamgi a neih kei leh gam (nation) hi thei lo a, tu ni a kipanin US in a gamgi ukna (contol) nei kik ta ding hi ci hi. President Trump in a vote zon lai-in a gen bangin kulhbaang bawl theihna ding suaikai ta ahih manin leitaw lamah mihing dalna ding (physical barrier) kibawl ta ding hi,” ci-in White House spokesman Sean Spicer in ci hi.

Zan in ABC News ten Trump a interview na-ah khatam lo sungin (within months) kulhbaang bawl kipan dinga, a sum beite 100% Mexico in US hong pia kik ding hi ci hi. Trump in a vote zon lai-in Mexico panin US a gambeelte pen mibuante leh guihtheih kamtheih zuakte (rapists and drug dealers) na ci hi. Reuters news agency in zong Trump in ni tam lo sungin Middle Eastern leh North African gamte (Syria, Sudan, Somalia, Iraq, Iran, Libya leh Yemen kihel in) galtaite (refugees) leh gambeelte (immigrants) visa dalna dingin executive orders suaikai ding hi ci-in gen hi.

Trump in Department of Homeland Security ah second executive order kici suai kai khin zo a, phalna nei lo tawh gambeelte (undocumented immigrants) state tuamtuam leh khuapi tuamtuam a Democrats party ten kumpi tung panin huhna sum a piakte uh (federal grant money) bei sakna dingin a suai a kaih ahi hi. Ahih hangin phalna nei lo a US ah gambeel hong lutte’ tate a lunghimawh luatna ding uh om lo hi. Bang hang hiam cih leh lungtang lianpi (big heart/itna lianpi ka nei hi a cih nopna) ka nei hi ci hi. #Zomite US gam-a phalna lai nei-a lute adingin lunghimawhna ding om lo hi. Source: Al Jazeera and news agencies/ Thang Khan Lian