Kong a neilo Hong Kong – 4 ~ Hau Za Cin

Kong a neilo Hong Kong – 4 ~ Hau Za Cin

“Zingciang kimu kik diamdiam” cih ahih hang, pawlkhat in class nei in, pawlkhat in library work nei in, pawlkhat kitchen duty nei ahih manun, nitak annkham zawh mateng kimu kik diamdiam cih pen ahi theilo ding hong suak hi. Monday hi a, working day hita ahih man hi. Nitak ciang “Hong Night View” hawh ding cih zanitak a Sia Pau Lian Mang ciah ding ciang amah khakna lampi ah akithukim pen bek kikholh khopna hun ding hong hita a, kei bek in ‘lonely’ ka kisa pian hi. Khual ka zin sim in hih banga ‘khattang’ ka kisak ciang, Lengtong Pauno in,

• Khattang sawlbang heina ah,
• Sinlai ah vabang phawng den
• Mimbang pianna tuunnu aw,
• Na min theibang lo ing,
• Ka lawh hang mel ah mulo,
• Koi ah sawlbang na hei hiam,
• Zuangtho dihve tuunnu aw,
• Na tong sang nuam lai ve’ng….

a cih la ka phawk zel hi. Tan 9 ka simlai in India gam hawl dingin kumpi in hong teel ciangin July 20, 1989 in Kolkatta ka tung uh a, gam lah kidang, mi lah kidang, khua lah lum, ‘khattang’ kisa in, ka inntual uh ka mitkha ah hong kilang a, nitak khuamui kuan ciangin…. Lengtong Pauno mah in,

• Ka neulai in khuamui kuanin
• Ka lawmte tawh ka kimawl thei zel a,
• Huih nung in the te hong khuan ciang
• Inn pan ka tuunnu’n aw nem in hong sam ciaiciai zel !
• Ka ta aw inn ah hong ciahta in hong ci
• Ngilh ngei kei ning e, ka tuun aw khum
• Ka bil sungah ka tuun aw nem in hong samsam lai
• Ka mangngilh zawh loh hong it ka tuun nu.
• Gamlapi ah khualzin in
• Gentheih haksatna namcin ka thuak ciangin
• Belh ding neilo ka lungzuan ciang,
• Ka nu aw nem ka bil kha’n zaza ing e….

a cih la ka bil ah hong ging ciaiciai hi. Life, mihing nuntakna i cih pen zanni a nuamsa mahmah kimlai, tuni ciang hawm kisak mahmah, khattang kisak mahmah theih a, ahi zongin zingciangin nithak hong suak ding hi cih in lametna hong neisak a, tua lametna in i nuntakna hong thahatsak hi. The best is yet to be!

Lawmte sangkah kal in kei zong keibek in Hong Kong khuasung hawl dingin ka diangkhia a, LTS pan Shatin paina ciang ka thei lai a, KCR mat dan, MTR matdan leh Mongkok, Tsim Sha Tsui teng bel ka theilai hi. Ahi zongin tuateng bek tawh hunsak dingka ut kei a, a baan, a gamla zaw sem, tua tembaw khawlna gallam innsangpipi te ka mu nuam lai hi.

MTR One Day Unlimited Ride Card kici HKD 50 tawh ka lei a, ka lutsuk pah hi. MTR Guide ah map en kawm in, ka tuanga, lawmte hong vaikhak MP3/MP4 player lei ding leh Wii video games lei ding bek HK ka taam sunga hong kivaikhak ‘duty’ ka neih hi. A dang teng sight seeing, khuadak ding bek hi mai hi.

Mongkok ah ka kumkik a, MP3/MP4 lei dingin ka zonga, ka mu pak kei hi. Puan leh khedap khawng tamzaw ahih manin ka taisan a MTR ah ka dianglut leuleu hi. Kowloon Bay ah kum in khua ka dak a, shopping mall thupi khat Telford Plaza kici na om a, ka lutsuk leh electronics van na tam mahmah hi. Ahi zongin ka deih bang ka mu kei a, ka khualzin ka zom kik hi. [HK MTR pen a kiimkot a tai, HK khua sung kiimvial ahih manin tua tuansuak man ka sawm hi. Tan 9 ka sim pan traveling pen nuam kasak ahih manin khualzin a, khuadak kawikawi nuam kasak khat hi, mind you, I hate shopping!]. Tai kik in Tiu Keng Leng ah ka kum a, ka deih bang ka mu kei hi. MTR tawpna Po Lam Station ka taito a, ka van deihte ka mu tuan kei hi. Kik suk leuleu in, Quarry Bay ah ka kum a, City Plaza kici ah ka lut leuleu hi. Omlo lai…. huh… nungak te hong vaikhak hi kei leh bel, ‘van man tamlua’ cih tawh kitan zo lelding hi veng!! Kitatzawh leh kitatzawh loh hilo a, a van zon kul hi mawk hi.

Causeway Bay ah kumkik in, tua lai ah “Nikon Cameras” kici khat MTR pan paikhiat lian ciangin ka mu a, tua ah ka dot leh HKD 800 hong ci a, “bangzah khiam thei ding na hiam?” ka cih leh, “bangzah hong khiam leng ut ding na hiam?” hong ci a, “na last price hong gen masa ve” ka cih leh vanzuakpa hong heh a, “HKD 500” ci mai ding ka hiam ka ci a (ka lungsim ah, ahi zongin bangmah genlo in ka paikhiat san a), “HKD 650 ci leng zong hun naikei na ci dinga, don’t try to fxxx up okay?” hong ci a, ka paisan a, amaitang san liangin hang nana hi. Sumbuk ngak heh kamuh masak pen hi a, lamdang sa kawm, ka heh suak dektak hi. Kilaipih leng kisikim mahmah dingin ka um hi. Kungfu kei sang a siamzawk kei leh… he he…..

A paam ah ka paiphei leh Wan Chai ka tungphei a, Computer Centre, 2F kici om a, ka lut toh leh electronics van bekbek a kizuakna ka tungto hi. Innpi dim khat mahmah computers van leh electonics van bekbek kizuak in, tua ah ka van deih ka zon pheiphei leh HKD 600 in kizuak a, India mah bangin vandeek theih ahih manin ka dek leh 450 HKD in ka ngah hi. Den in hehlianga 650 HKD a hong zuakpa ka phawk kik a, “God is good all the time, And all the time God is good” ciin ka lungsim ah Topa ka phat hi. Makai Joshua a makaih a, Kumpi David a galte khutsung pan a keempa in kei zong sumduh luate thaang pan in hong suakta sak hi ciin ka ciamteh hi. Lungnuamtak in ka ciah a, Admiralty, Yau Ma Tei, Kowloon Tong, Shatin, etc te tawnto in LTS ka tungto kik hi. Kei bek in HK ka vakpatna hi a, nisuahna lam MTR paina teng a hawl suak dikdek ka suak phot hi.

Kisil in nitak annek hun ciangin annbuk lam ka zuanto a, lawmte in amau dinner songs* te na sa ziahziah ta uh a, kei zong ka lutto a, amau tawh kituak a ka khutbeng in, annek thunget khit ciang ann limtak ka ne ziahziah uh hi. Hostel ah kum 1988-2004 sung ka om a, hih LTS sanginn Hostel ann pen lim kasak penpen hi lai hi. India gama Top Institute kici IIT Kanpur ann sangin limzaw hi. [* dinner songs = annek ding ciangin Hostel khempeuh in anbuk a la gelhsa – english, Cantones, chinese, latin, etc. kikoih 6 khawngte sa in, tuazawh ciang anne pan uh hi].

Sia Pau Lian Mang in “Hong Kong Night View” pai ding a gen pen ah ankham ciangin pai ding ka hih manun, tua ni tak ankuang lui, ankuang seng ding ‘duty’ a nei Sia Dal Khan Mang zong a lawmte tawh na kibelhei in, tua nitak in ka vekun LTS Bus tawh ka tuangsuk uh a, Shatin pan Kowloon Tong ah paisuak in tua ah Sia PL Mang ka ngak uh hi. Ngak cih bel amah a boss ahih cianga VIP Style a minute tawm hong ziakai bek hi, just 3 minutes, tua pen meileeng timing hang ana hi leltak a, amah ka mawhsak kei uh hi.

Pai phei in, Tsim Sha Tsui ka tun uh ciang innkhan sang pipi meivak hoih lua mahmah ahih manin siapa zong hong thalawp pian pah a, a thungpi kuahlai lei lakah khia suk in, a pam ah paiphei a, ‘koi maw, kei hih laiah maan hong zaih vo’ ci ziau lel ahih ciangin ut leh ut loh hinawnlo in a zaih masa ding bang ka kituh liang uh a, ka zaih ziahziah lel uh hi. Ka nung theih kik uh ciang, a lupna gei a a zi maan tawh a suankhop ding a deih hih tuak hi. Khattanga hei ciatciat (tua laitakin) ngaihsut kibang kei mawk ei!

Hih part-4 lai ka atlaitak in, ama email hong tunga, ka simpah buatbuat leh:

“It leh zahtak Lawm Cinpu aw,

Na lai-atte ka simkhak ciangin zingdaitui leh Zolimtui tawh kawtkim bangin thakhatin ka nosuak a, ka tha hong dim pah hi. Singkung lopa, mual le guam leh inn sangpipite lak-a Sen bulomtang a teenna mun, kong omlohna Hong Kong ah lungleen zatam sialin om laitak, na thelnah tongluante ka muhkhak pen kei aadingin nakpi manpha hi. “Zop lai ding” cih laimal ka muhkhak bek zong kei adingin sinlung hong vut, lia vangngaihno’ hong lel aw-khum tawh kibang sa’ng ee. Lailung geel kawmin hai bang na ngak ning maw….. PLMangno”

cih na hi mawk hi. Part I-III sim khinta ahih man hi. Amah Zolai bu pi khat ahih mah bangin, ama’n, zingdaitui leh Zolimtui khawng ci siam se a, kawtkim a nosuak cih khawng zangsiam se in, ngaihno te tawh thu kizakna in thelnah tongluan khak theizel hi cih a kitheihna dingin sinlung hong vut ‘lia vangngaihno’ aw-khum tawh kibang liang khawng ciin a lungsim a zawhdan, a thalawpdan, a nosuah dan gensiang sitset siam se hi. A zolai tongluan nemno tawh nungak ahi lo ei natawm ki tuisuak dekdek liang hi. Bangbang ahi zongin ‘vangngaihno’ cih bangin hunsak kik phot ni in…… zop lai ding….. Dr. Hau Za Cin