Kong a neilo Hong Kong – 1 ~ Hau Za Cin

Kong a neilo Hong Kong – 1 ~ Hau Za Cin

A gam lah neu, a mun lah toi, inn lah sang, kinaih theilua, khuaipheng banga kithuap dimdiam ahih manin innkong ding neilo uh a, tuaman in i thulu zong ‘Kong a neilo Hong Kong’ kong ci mai hi.

Zomi khua ah i zin ciangin khuasung inn kigual dan pen kikongngat, kimai ngat hi a, kongkhak pan dakkhia leng kongmaite kongkhak kimu thei hi. A zingzing in kidawh in gual nih, gual thum cih bangin kigual diudeu hi. Kimaingat a, kong tual, inntual hoihtak nei in, tua inntual ah naupangte in ling kineih, suangpum kineih, kanteh kan cih bangin kimawl uh hi. Zolai sinna ah zong, i = Intual zang, lamsaina, kici a, pupa hun pan inntualzang kinei in, zatna tampi lak ah pawipi neih ciang lamsaina in kizang hi cih kithei thei hi. Hong Kong te in tuabang lamsaina ding, ling kineihna ding, peklum, suangpum etc. kineihna ding inntualzang, ahih kei leh kongtual neilo uh hi. A innte uh kinaih in khuaipheng bangin kimat dektak vive in vanlam ah kitungto zeza hi. Tua ahih manin HK khuasung vak pen innsang pipi kawm ah vak khualkhual hi mai a; mau lak ah zusa gamta bang kihi mai e!

Zomi 4 na om a, Lutheran Theological Seminary ah mi 3: Zomi lasiam Sia Suan Khan Lian (Lianpi, Taang’ Lungtup), Rev. Dal Khan Mang leh Sianu Man Hau Cing te hi. The Chinese University of Hong Kong ah Sia Pau Lian Mang, “Ngiimna Tawsawn Nuntakna” (The Purpose Driven Life by Rick Warren) laibu teipa na om hi. Lungdam maitaia kimuin September 23, 2007 Sunday worship service ah kikhawm in, anne khawm, phawk tawntungna ding ciin maan ka kila khawm uh hi (group foto). Tua zawh khatvei a minthang mahmah HK zan meivak en dingin tuipi gei lamah ka vakkhawm damdam uh hi. Zomi vive ikikholh pen nuam sam ei… Zomi hih mah nuam ngaungau veh aw!

Sia Lianpi leh Rev. Dal Khan Mang tawh amau Hostel ah Table Tennis ka kimawl taktak uh ciang bel, HK te in zo zaw ding maw, Taiwan te in zo zaw ding ciin ka kito uh a, nakpi a ka kimawl zawh uh ciang sangkah cil lai a English a kizang den khat, ‘King Kong go to Hong Kong to play Ping Pong’ cih khawng ka phawk vangvang liang hi, King Kong ka hih loh hang. Hih kammal hong hilh ka siapa uh Pa Thawng Za Thang, a khualui Behiang, Manipur, India pen Roman Catholic pawlpi ah upa/sia (Catechist) sem a, tuin Aizawl ah a zi leh tate tawh om hi.

Pasian huhna tawh khattang heina Taipei panin lungzuan zatam sialpih ding a om hiam cih a zong ding zong hi tuanlo in Zomi te ki itna leh kingaihna a bei ngeilo bangin kikholh, kiholim a, kithuahkhawm ding lunggulh in September 22, 2007 niin Hong Kong vanlengtual ka tungsuk hi.

Taipei – HK pen minute 105 khawng bek leng ahih manin vanleng sunga ‘breakfast’ acihte uh ka nek khit uh ciang ka kamkhuahna apple juice zong ka gilpi tungsuk nailo ding cih bangin tuipi pangah inn khaan sangpipi, pak veva kigalmuh in, tungtun tunga ‘patungtun’ po viatvuat tawh kibang kasa hi. Ka tutna pan ka et hithiat laitak in ka nuai ah tuipi bekbek kiphah diahduah ka mu a, gunkuang hattaka tai in tuipi tung pak zuazua a phulte leh gunkuang neu dang a hatlo a taite kimu thei a, ka tutna tunga meivak hong kisumit in, vanleng sung hong mial a, ‘kawnggak lim’ hong dawk ciangin ‘tighten your seat belt’ cihna hi cih ka thei a, thupulakpa in, ‘we are landing in Hong Kong International airport within 6 minutes from now’ cih khat hong gen a, ka khut zansuk in tuipi kisawkpha ta inteh cih ciang vanleng in tuipi sikkha takpi ta hiam ka cih leh a pei in leilak zutphei hiakhiak a, HK a kitung hitakpi ta hi!

THIS IS HONG KONG cih ka lungsim ah hong suak a; khua lam ah sangkah laiin Ninoni ciang nu leh pa nasepna lamah Lokuan in kipai zel a, tua tawh ka teh ciang HK pen na siangtho zaw deuh ahih manin (kawlgam english kawmpak leng) a ‘feeling’ hong tuam mahmah hi. Israelte Kumpi David leh Zomi lasiam David Kham te in kituak tak a cih khop siam uh bangin, TOPA HOIH HI!

God is good all the time, and all the time God is good.

HK vanlengtual pen tuipi tungah a kilam na hi leltaka, tua mana tuipi sikkha dek lianga niam ah lengin a tu phei ziau hi. Vanleng sungpan leilak i sikkhak ding lau uh hiam cih bang phial in puanhampi na phah uh a, i sikna peuhmah vuikhu kimu lo hi. Kahleitai ah kituangsuk, kituangto a, a nuailam pekpek ah meileng tomte tawh koi lam hong kipuak ding hiam cih zong theihloh in leihawmsungpi khat ah hong taipih phei uh a, a pam ah khuavak akimuh theih ciang innpi sungpi khat ah hong suahkhia in, a tunglam kahleitai tawh kikahto leuleu a, tua taktak ciang bel WELCOME TO HONG KONG cih na kigelh bialbualta sam a, vanlengtuala DRAGON AIR cih te omna tawh bel kigamla mahmahta hi ding in ka um hi. Immigration ah ka Passport hong ciamteh sak khit uh ciang a pualam ka pusuak a, kongkhak gei a sweets omte ne kawmkawm in ka paina ding lam, hong dawn lawmte omna lam ka manawh phei hi.

Gate B ah ka pusuak leh lawmte ka mu kei a, Gate A lamah ka paikhiat pheiphei leh ka tungphei dektak ciang mikhat in a khut hong vaan ka galmuh a, koilo khat pai ciang cih simsimte i galmuh, i tuakvat, nuam isak, lah i zumsim dan e….. um ngam, um lah pian cih tawh ka naih pheiphei leh kei hong dawn dinga hong pai Zomi lasiam Sia Lianpi (Taang’ Lungtup) na hi nginge hi. Tapa taimang ciahkik lah hisam lo napi kikawi in ka kikhutlet uh a, Zomi te ki itna thukpi hong kilanga Zomi ka piankhak ka angtang semsem hi. Nupi khualzin bangin gen masak ding, pat masak ding theilo in ka ki en uh a, ka kinuihsan lel uh hi. Aman a handphone (US pan hong puak, a thak liklek, US zolia te gim a nam lai phial ahi tam maw, tel kei ing) hong dokkhia a, a bil ah a ngaktoh khit ciang alu sing ngeungeu a, a pam pan Sia Dal Mang hong suakphei pah hi.

Sia Lianpi tawh ka khatvei kimuhna uh hi a, a galpan hong khutvan theih pah mawk pen lamdang asa hi ing.Tun ka nung ngaihsut leh Zomi lasiam Sia TS Khai, Singapore zin a ciahlam a Yangon vanlengtual ah akidawnna, ZOMUS makai Sia Thangboite in a dawnna khawng hong phawksak saan e.

A pualam ka pai phei uh leh Beijing Olympics Countdown kici naipi khat na om a, maan kila in, a ding ka kikhek ziahziah zawh uh ciang Octopus Card kici, meileng, moto tuanna ding leiin, khannih a pha motopi Double-Decker Bus tungah, a tungnung tutna gual khatna ah tu in siate omna Lutheran Theological Seminary, Shatin zuanin ka dingkhia uh hi. Tun ka maan ka etkik leh tua hun, tua laitakin Beijing Olympics 2008, August 8 Openning Ceremony pen 321 days, 2 hours, 47 mins, 51 seconds in gamla lai hi.

Bus tungnungah tuangin Airport kiim ah lampi a kawi dan, Sia Mang in ‘ko zong ka tun zawh uh kha khat a pha nailo hi in, tuni kong paina lampi uh pen moto lampi kawikawi, kawikawi, …. hi’ a cih mah bangin a kawikawi… khit ciang lamzaang tungthei a, tua ah laikigelhte ka sim pheiphei leh; ‘Kowloon’ kici in Shillong hong phawksak hi. Shillong ah, Malki Bus Stop khang, Step by Step School sak ah Kowloon Restaurant kici khat om a, lawmten kuahiam khat banghiam khat a nekpih ngeina na hi cit ciat hi, ‘zanga a hun diam?’ cih hong piankhiatna bel hi kei! …zop lai ding… Dr. Hau Za Cin