Kolbulh thuak Palaite leh Kol kibulh zolo ZAM #1

Kolbulh thuak Palaite leh Kol kibulh zolo ZAM #1

Inn pua gamlum dan khat tuamdang piansi ee le, khuadak dih ve vua, cih kammal aki zakzawh phetin, kong hong ki kiu aging kiza aa, aki kiuh dan pen nawh kiuh leh gin ngaih mahmah hi! Ahun 1am pawl, ani March 30, 2008, amun Zomi Innpi; a kitel zaw dingin Zomi Innpi (Malaysia) ahih kei leh ZAM zum.

Nitak lupding teh a zingciang aa sepding teng geel suk le’ng, ei vai ding kihel mahmah lo aa, sepding khempeuh mipihte vai ding vive cihpen, sauveipi a semzo ding haksa mahmah hi. Nasep dang nekding zong kawm cih hilo, hunbit aa kha tampi, kum tampi ki piakhia-in Kipawlna nasep pen a sin kha khempeuh in baih salo hi! Hici ngaihsut le’ng zong baihlo khin hi; Na innkuan sung haksatna, sum le pai kisapna, ahih kei leh na za neihna, ahih kei leh na panmun neihna teng nusia lianin zingciang aa kipan mipih ta ding hunbit kuan khia ding cih ngaihsun lecin, piangthei kei cipah maithei!

Tuadan kawmkal pan ei pelhtheih ahilo, kigin’ kholh theih zong ahilo kuama tuahnop ngei loh tuahsiatna, lungzinna ih tuah teh leitungah lametna acih bang hiam, cih zah dongin lungsim na, pumpi na, si le sa na himai hi. Tuaciang bek hilo-in lungsim sungpan bei theihtuak nawn mello hi!

Kum (5) sinsen hong cingta hi! 2008 kum aa ZAM zumsung buluh gawpin thatang leh thu neihna tawh Zomi hunbit palai sem (13) leh zum vai, zato vai, ciahna ding gamla aa giaktawh vekpi kigawm (18) sinsen, thuneite-in khat khit khat kol bulh ciatciat in, kigual sak diudeu-in, mawtawpi sungah lutsak deudeu uhhi! A lumkhin tawh, zum lai vai bawllai tawh, a tawlnga aa ihmu nailo tawh ki om ngeingai laitak hi-in, atuak ngei zawdeuhte awng khia pah aa, “Lawmte, ih maban ding kithei kei ei; bombi sau leh puan bansau zawdeuh laih samsam un!”

Zoplai ding…
Tg. Kham