Mission mualsuang ~ Tdkhen

Mission mualsuang ~ Tdkhen

MISSION (Missionary) i cih in biakna thu-a gamkeekte ahi hi.
MUALSUANG i cih in tungtuanna, gualzawhna, gamkip, thukip neihna ahi hi.

Tua ahihmanin MISSION MUALSUANG cih ciangin biakna thu-a gamkeek’ zawhna, biakna thu-a kilat zawhna, biakna thu mi khempeuh zak sak zawhna, Khristian gam phuhna ahi hi.

MISSION (Missionary)te’ gam velna:

1. Ih sep nading gam mite’ dinmun thei ding.

2. Ih sep nading kumpite’ ki ukna a pai pi thei ding.

3. Ih sep nading mite’ ki tangsapna lian pen thei ding.

4. Ih sep nading gam makaite tawh kithei siam ding.

5. Ih sep nading gam-uk kumpite’ thuluanpih nop bang hiam cih thei ding.

6. Ih sep nading mipite leh kumpite kikalah palai sep sak thei ding. Amau teng leh Pasian kikalah palai hi toto ding.

7. Ih sepna gam mite in i muanhuaina, i cihtakna, i kipiak ngamnate hong theih nading.

8. Hongit ding, hong ngai ding, hong muang ding, hong be’el ding, hong thuakpih ngam ding.

9. Thuhoih tuamtuam muhpih ding, kipattahna hoih tuamtuam kisin pih ding. nahoih tuamtuam neihpih ding, a kumpite’ pahtakna ngah ding.

10. Mipite bek hilo-in kumpite in zong i thu hong ngai thei ding, i thusunna pawlpawlte zong kumpite in hong phal thei ding, i si zongin amau’ kiangah i luang phum ngam ding, hongit ngiat ding, hong lunglenpih ngiat ding, nu bang pa bangin hong mu ngiat ding.

MUALSUANG phuh zawh nadingin:

1. Sangsia khat in ama’ pilna(standard)tungsiah lai a hilh theihloh mah bangin, ihihna ciangciang gual bekah i lawhcing thei bek ding hi.

2. Khuata khat sungah mission i sep nopleh, tua khua sungah a omsa pilna ciang tawh i kikim ding ki sam hi.

3. Khuapi sungah mission i sep nopleh, tua khua sunga thuneite tawh a kikim ciang, hihna, theihna ki sam hi.

4. Myonee khat huamin na i sep nopleh, tua gam sunga thuneite gual ihih theih ding ki sam hi.

5. Gamkee khat huam-a na i sep nopleh, a gam thuneite tawh kimaingat ngam ciang hih ding ki sam hi.

6. Gambup khat huam-a na i sep nopleh, a kumpite tawh kithei ngam zah hih ding ki sam hi.

7. Tan 10 ciang pen leitung in, “Sangnaupang khat a hive maw” a ci pan bek hi.

8. B.A ciang pen leitung in, “Pilna nei khat a hive maw” a ci pan bek hi.

9. M.A ciang pen leitung in, “Makai muanhuai hita ei” a cihte ahi hi. M.A ciang in pen gamkee khat sungah sem thei kha ding hi.

10. Pilna namkhat bek ahi lo, buaih tuamtuam a la zote leuleu pen, kumpi gamkhat sungah a sem thei ta ding hi.

Tua ahihmanin thukhat leuleu ah:

(1) Laisinna a sang, a kah zo lo sa limlim ihihleh phamawh lo hi. A kipumpiak ngam ngiatte’ a’dingin, a hualpi nawkna, nalamdang(miracle)tawh, khuapi guah kipeipih dingin Pasian in hong ngak gige hi. Eite in khanlawhna i piang sak dinga, i nungsangah tu-a i gengente in hong dawl’ to ding uh hi.

(2) Pilna a sin zomzom thei, a khuak hoih, laisiam mi na hihleh, ngimna sangpi nei ta in! Kumpi gamkhat sunga nasem dingin kiging pah in! Na pilsin sungin, a mainawt dinga na muh tata, a tam theithei tawh, a kihual mawkmawk hilo-in, kiphawk tawntung nading(memorial)bawl denden in! Amau kumpi na hong sem ding, nang biakna na sem ding, lawmta hi toto ding!

Tua hileh na ma vangin ze-etnate na nawk zo ding hi. Na sikna ciangciang na gam a suak hathat ding hi. Hibang teng pen na pilsin sung mahin geel to gige in! Amaute’ tunga nasem ding na hih lam na ngaihsutna leh na mitkha ah luai den sak in! Na sep nading mun pen maingap pha mahmah in!

(3) Na sinna a paipite ah buaih na la ahizongin, upadi na theih keileh na kipal kha den ding hi. Upadi lam zong na theih a kul ahi hi. Leitung pilna a sangpi na sin mah bangin,

Lai Siangtho zong na leitung pilna tawh a kikhaikim ciang mah sin in! Pilna a zom toto thei ding kim lai, Pasian’ na sem nuama, na ki pumpek malep khakleh, khemna(Satan’ galdaai)lianpi khat hi cih kithei in! Na hih nading ciang hi zo lo dinga hong kipaktawng sak nopna ahi hi.

Makai dinga pilna hong kipia, mipilnu mipilpa aw, nangma’ hangin gamkhat in Khristian gam suahlawh ding ahizongin, nangma’ hang mahin Khristian gam nuam kim lai bawlsiatna thuaklawh thei ahih lam phawk den in! Mi laihawl tunglam Khristian a tam keileh, Khristian hihna bei kha ding hi. Khangno om lohna innkuan pen khangkhat innkuan ahih mah bangin, Khristian khangno om lohna gam zong khangkhat Khristian bek mah hi ding hi.

Thukhupna:

* Thukhunlui-ah Mose in Izipt gam kumpi Faro mai-ah dinga, a mipihte a suahtakpih nadingin, Izipt gam pilna khempeuh a sin hi.

* Thukhunthak-ah Pawl in Khristiante’ Thukhunpi, Lai Siangtho a gelh theih nadingin, pilna tungtuang a sin hi.

* Mualsuang i cih pen a kiphuh ma-in, tua mualsuang kiphuh theih nadingin, hun sawtpi panin thu leh late, mualsuang neite’ neulai thute dong panin a kikaihkhawm toh ciangin mualsuang hong piang thei pan ahi hi. Tua mah bangin MISSION MUALSUANG phuh nadingin zong tulaitak-a pilna sin naupangnonote panin hong kipan ding ahi hi. Tdkhen