Kuala Lumpur khuapisung ah huihpi leh guahsia kithuah, singkung abulpan kilongkhia

Kuala Lumpur khuapisung ah huihpi leh guahsia kithuah, singkung abulpan kilongkhia

Malaysia, Kuala Lumpur khuapisung ah Friday nitaklam in huihpi leh guahsia in nawkgawp ahih manin singkungte kipuk in sikkang te ki leukhiagawp cih Bernama pan kiza hi.

Kuala Lumpur khuapisung aom vengtuamtuam ah singkungte abul panin kilongkhia in, sanginn tungkhuh sikkang zong aki leukhia pawlkhat omhi.

Kuala Lumpur Fire and Rescue Department panin Spokesman khatin agenkhiatna ah huihpi leh guahsia in anawkkhak phadiakna pen Bandar Menjalara, Bukit Kerinchi, Pantai Dalam vengsungteng hiphadiak hi ci’n genkhia hi.

Friday nitaklam 4pm hunpawl akipan huihpi hatmahmah in, kekkia zong puakgamgam hi. Singkung apuksuk pawlkhatin mawtaw zong dengkha kici hi.

Bandar Menjalara, Villa Manja sungahzong pasalkhat ii ahawl Hyundai Veloster mawtawkhat singkung puksuk in dengkha a, ahi zongin kamphatna tawh asi aliam kuamah omlo bilbel hi.

Kampung Kerinchi vengsung aom SMK Seri Pantai kici sanginn khat ii atungkhuh sikkang tezong huihpi hatlua mahmaha hih manin kileukhiagawp hi.

Tuabangin khuasung tuahsiatna khatpeuh aomkhakding ci’n Kuala Lumpur Fire and Rescue Department te’n Officer mi 11 pen Standby in akoihsa ahihi. Khuasung huihpi leh guahsia in anawkgawp hangin lamzikpi tungah Traffic pen awkcipgawplua cih omsamlo hi.

Lembah Pantai Member of Parliament Fahmi Fadzil te’nzong amau Facebook Page tungtawn in kidopding zaksakna neikhia uh a, kozong Kuala Lumpur City Hall (DBKL) te tungah huhna ka ngen uh ci’n gelhkhia uhhi.

More: Myanmar gamsung ah Cyclone huihpi hangin asi mi 5 pha, inn 1400 kisia

Facebook Page tungah agelhkhiatna ah “Kidawm mahmah un. Huihpi hatmahmah in, guahtawh kithuah ahih manin University LRT mailian aom Kerinchi PPR (Block E) leh Taman Bukit Angkasa (Block 19) te ah singkung abul panin kilongkhia in atuksuk omkawikawi hi. SMK Seri Pantai sanginn tungkhuh sikkang zong huihpi in mutkhia hi ci’n gelhkhia uhhi.

Hihbangin huihpi leh guahpi hangin tuahsiatna athuakkha na omkhak uhleh amanlang in DBKL ahih keileh Fire and Rescue Department te zasakpah un, ahuhding hong paisak pahding uhhi. Sawltak #zomidaily