Kiteenna pen nam (3) om hi.
Kiteenna pen nam (3) om hi.Khatna … it le ngaih mi tawh kiteenna. Nihna … it le ngaih mi ii gamtatdan zia le tong tawh kiteenna. Athumna … it le ngaih mi ii gamtatdan le ama ii meltheih sanggam behlephung teng tawh kiteenna ahi hi.
Akhatna kiteenna pen akiteng nupa te ii kiteenna pen akipzo ding ciang ah om hi.
Anihna kiteenna pen akiteng nupa te ii kiteenna pen kipkho zaw kan ding hi.
Athumna kiteenna pen akiteng nupa te ii kiteenna pen akikhen kik nading lampi omlo hi.
Hih leitung ah samkang in hapulh dong akip aki-it nupa te pen abulpi in anuntakna sunguh ah thum vei kiteng uh hi.
Amasa pen in annsai te le biakinn ah innkuampih, lawm legual te le sia te thupha piakna te tawh kiteenna ahi hi.
Anihna pen inn ah kiteenna hi. Ukdan deihdan zia le tong te khat le khat kitheih nading aa khat lekhat ii zia le tong tawh kiteenna ahi hi.
Athumna ah behlephung unau sanggam te tawh kiteenna ahi hi. Khat le khat ii unau sanggam te tawh kilem kithu hual theih nading aa kiteenna ahi hi.
Anihveina le athumveina kiteenna pen akhatveina kiteenna tawh kilam dang kilkel hi. Tua kiteenna te ah mopawi bawl ding kisamlo hi. Lawm le gual sia te thupha piakna kisamlo hi. Hipawi ah akiteng nupa te nih ii kithukimna le kitelsiamna bek kisam hi.
Akiteenna taktak ihcihpen hi anunung nih te tawh kisai zaw hi.
Tuhun mi te ii kiteena pen akiteen zawh kum tawmno sung in akikhenkik tampi om hi. Akikhenna ahang te hoihtak enkik leng akhatveina kiteenna pan anihveina kiteenna atung zawhloh man ahi hi.
Ih theihsa mah bangin tuiso in lungno te asihsak mah bangin degree asangkah mahmah itna in na lawmngaih ii thanemna le akicinlohna te maisak thei hi.
Ngaih laitak, it laitak aa akimu khalo thanemna, kicinlohna te pen kiteenna akici asalo avotlo tuisung ah hong kiatciang tua thanemna le kicinlohna lungno te hong nungta kik hi.
Hibang hunciangin anihveina kiteen ding pen ngaihsut kul ta hi. Ama ii zia le tong tawh kiteng ding, ama ii thanemna le akicinlohna te maisak kul ding hi. Tua bang ahikei leh hih kiteenna pen azung lungnek singkung bangin damdam in hong keu thei ding hi.
Ki-it kingaih mahmah aa kiteng te zong kum tawmno khat sung in akikhen kikna hang pen anihveina kiteenna dong atunzawh loh man mah ahi hi.
Anihveina kiteenna dong atungzo nupa te kikal ah “kikhen ding” cih kammal pen kitam zaklo hi. Amau ii lungsim sung ah khat ii zia le tong le thanemna te akitelsiam sakman uh ahi hi. Khat veivei ciang in hibang aa kicinlohna te pen angaihbanna khat in mu zaw theita hi.
Hibang hunciang in nupa kikal nopci in khat le khat kitelsiamna tawh hong kidim ding hi.
Nupa kikal nopcitna tawh nupa kipkho ding ci in kingaihsun thei nailo hi. Nupa kal kip nading in athumveina kiteenna lam ah kalsuan ding kisam hi. Tua pen khat le khat ii unau sanggau behlephung te tawh kiteenna ahi hi.
Lamkhat pan genleng amah ih itna pen anu apa asanggam a unau behlephung te tung hawm khia ding cihna hi. Hi pen zomi te ngeina khat zong ahi hi.
Ih langkhat pen eibek ii neih hizenzen lo hi. Amah pen anulepa, asanggam behlephung te inzong nei uh hi. Tua khit ciang in amah pen amah mah aa ahi hi. Hibang hunciang in tua nupa te pen kip in akikhen nuam uh zong haksa mahmah ta hi.
Zawlthu ah pasal atamzaw in kiteenna cihpen numei khat teenpihna cih ciang bekin ngaihsun kha uh hi. Tua numei ii utna le ama ii nua lam leh en kik nawnlo thei hi.
Numei atamzaw in zong kiteenna cihpen pasal khat tawh kiteng ding cih ciang bekin ngaihsun in tua pasal ii zia le tong, sanggam le behlephung te tawh zong kiteng ding cih pen telpha lo uh hi.
Hibang aa tellohna te hangin tuhun ciang in nupa kikhenna hong tam semsem hi.
Peter Suumpi
2.9.2014
Laigelh masa – Lu Yanmin
Comment piaknop aomleh...