Kisin ni ~ Tdkhen

Kisin ni ~ Tdkhen

1. Thusia a gen-mi a maitai om ngeilo-a, thuhoih a gen-mi a maigum om ngei lo hi.

2. Ngaihsun cian mellopi-in kipau ngiau thei a, i-pau tawh kizui-in kingaihsun kikin, i-ngaisut bangin i-pumpi kilamdang hi.

3. Thuhoih zakna in lung nuam saka, lungnopna in pumpi cidamna hi. Kamhoih i-pau simin tha-za(Vitamin) a hawmkhia-khia ihi hi.

4. Thusia zakna in guhmuat sak natna hi a, natna lakah a thuak-hak pen, hong tum nganngan natna hi. Kam hoihlo i-pau simin natna khel nono a khahkhia-khia ihi hi.

5. Ih mel a hoih hangin kamsiam kei leng, et kikkik kilawh lo hi. Ih melsiat hangin i-kam siamleh etkik bek hilo-in, ngaihsut kik dong kilawh hi.

6. Mi i-koleh i-kote kisu’n thei, a kici hi. Ih ko-na hang hilo zaw in, i-ko-na kammal i-tung hong tu kik hi zaw hi. Tua mah bangin mite phat leng, i-phatna kammal i-tung hong tu kik ding hi.

7. Thatang tawh lungnopna zon pen muh baih lo-a, kampauna tawh ahihleh olno takin kimu ziau thei hi. Mikhat pahtawi leng, i-pau khit-ma nangawnin i-kilamdang khin hi.

8. Ih lawmte khat gal i-suahsak nopleh muhtangpi mahin gal hi ziau thei a, i-galte zong lawm i-suahsak nopleh muhtangpi mahin lawm hong hi ziau thei hi.

9. Mihoihlo, migilo kigengen taleh, nang a’dingin misia om lo thei lel hi. Misia pen khat zong a hoihna na theihsun tawh pahtawi lecin, mawhneite’ lawm(Jesu bang) na hi ding hi.

10. Khaici i-tuh ciangin, a limcici, a cidamdam i- tuh hi. Na at-kik ding, na zak kik ding, thu limci, thu cidam-mah, na kam, na leii-ah ki-ciing ta hen!

11. Ei a ginalo semsem mite haza lo, dem’bawl’ lo-in, “Nang beek hong tua-ci ou lawm” ci-lehang, i-cih sung nangawnin i-ginat lohnate i-mangngilh man ding hi.

12. Ih Phone-te, mel kimu-lo tong kisanna hitaleh, a thu-te a takin i-kisang thei hi. Ih heh thei-a, i-khasia thei-a, i-lungdam thei hi. Ih thanem thei-a, i-thahat thei hi.

13. Ei gina takei-leng thuhoih suahkhiat ding maizum kei ni! Thuhoih in ei a’ hilo-in Pasian’ a’ hi. Pasian’ van themkhat lawnglawngin, khoihkhoihin, tawitawi leng ei a’ hong hilel ding hi. Amah alam-naihte a’dinga abawl’sak ahi hi.

14. Cina-na, natna gilo khat a vei na hihleh phamawh lo hi. “Kei dam zo, kei hat zo, a khansau dingpa, a khansau ding nu hi’ng” cici-in, awng-awng lel in! Maizum nading om lo hi. Cidamna, khansaunate mihing’a’ hilo-in Pasian’ a’ hi. Na cihcih-a, na ciinciinleh nang a’ hong hilel ding hi. A ciingte a’ding mah-a Pasian in hong koih sak ahi hi.

15. Ih kammalte, i-laigelhte hong en gige, hong tutpih den, i-ziat leh vei-ah a om hi. Thuhoih genin, thuhoih bekbek i-gelhleh, i-veilam-a pa in ciapteh ding neilo-in, i-taklam-a pa a gualzo ding hi. Thuginalo peuh gengenin, i-gelhgelhleh i-taklam-a pa in ciapteh ding neilo-in, i-veilam-a pa a gualzo ding hi.

16. Thuhoih suahkhiat kidem ni! Lawmhoih tam neih kidem ni! Tua hileh thuhoihlo hong bei semsem dinga, lawm hoihlo hong tawm tektek ding hi.

17. Kha thupha (Gupna) ngah nadingin kam tawh pulakna(sanna,pomna)kisam ahihmah bangin, Pumpi thupha(lei nopsakna) ngah nadingin zong kam tawh pulakna(sanna, pomna) kisam ahi hi.

18. Internet pen zat nading a kilawm munmunah i-zattheih nadingin hong ki bawl sak hi.

(1) Mimal kizop nading mun.(kithuhilhna, ki-cianpiakna, kitai’na, thusim kikupna ding mun ahi hi).

(2) Lawmta-teng kizopnading mun.(mipi tawh kisai khollote, thu nengneng, ciamnuih gualnuam, nidanglai neulai thu, holimna tuamtuamte zatthei nading mun ahi hi).

(3) Mi khempeuh in a theih nading mun. (Thuhoih thupha, gambup theih taang ding, zaktaang ding, deidan neilote ahi hi).

19. Mihon namthum om kinken cih i-phawk ding hi.

(1) Makai vaihawm lutangte kihel hi. Ih tungsiah mipil milian mihaute kihel hi. Thukan Media lamte kihel hi.

(2) Ih khangualte, i-lawmluite, utut i-genpihnopte om hi. Tungsiah nuaisiah kuamah a eng’lo mi-laihawl honpi ki om hi.

(3) Lungzuang, khuangai, lamet bei, lungsim neu tampi om hi. A cimawh, a tuahsia tampi om hi.

Tua ahihmanin hih mihing dawlthum teng tawh a kikhawl den ihi hi. Ih zat kawmkawm mahin, i-zatdan ding, i-zatna-mun dingte i-kisin toto ding hi. A diakdiakin kipawlna min tawh hong kikhahkhia-te leh tavuan-nei, nasep bangin a neite, tha pia pha-mahmah ni. A haksa bangmah om lo hi. Thahat nuam tek ihihmanin tha kipia ciat thei leng cihna hi.(Mite tha i-piakleh a zahnih e’n ngah den ding).

20. Khuavak Pasian’ tate ihi hi. Tua ahihmanin:-

• (1) Lungkham taleng, lungdam ding!
• (2) Dam ta-kei leng, a dam bangin om ding!
• (3) Zawng ta-leng ahau banga om ding!
• (4) Sumh ta-leng a meet banga om ding!
• (5) Guallel ta-leng a gualzo banga om ding!
• (6) Lau ta-leng a hangsan bang ding!

(7) Ih tha neem taleh zawhngap lel ding!

(8) Tagah lubawk khat hita-leng, kha sawm-a suak tektek, cilel ding!

(9) Pilna sang, sinna sangte nei zo takei leng, kumpite’ kumpipa nei peuh leng, a neu pen zong kumpi hong suak sak thei, cilel ding!

(10) “Bangbang piang taleh Jesu tawh om peuh leng Hellkhuk sung zong Vangam hi” Billy Graham.

Thukhupna:
“Kam na pau uh ciangin mi’ zaknop, mi’ ngaihnop dingin na pau un. Tua hileh na kihopih uh mite khempeuh a’dingin phattuamna kam a pau na hi ding uh hi” (Kolose 4:6). Tdkhen