Kisazaw (Counterfeit) ~ Evan. Suangh Dal

Kisazaw (Counterfeit) ~ Evan. Suangh Dal

Christian te ii gal lian pen in pua lam gal hi loin sung lam gal hizaw hi. Christian te ii gal lian pen khat in Kawng-ta-feih (Counterfeit) ahi hi. Kawlte, Buddhists te, Muslim te, Hindu te pen i gal hi loin i mission field hi. Christian te adingin gal lauhuai pen in Christian min pua mah ahi, tulai minthang thuhilh khial Syate le zuau thei kamsang te ahi hi.

LST tawh hoih tak i sit tel theih kei leh thu hilhkhial Syate ii thuhilhna maan lo pi teng le biakpiak kimakaih zia dik lo pi teng a maan kisazaw thei hi. A maan sa zaw lehang tua in Christian te i upna le i zuihna ah thu gina taktak teng hong buai pih sawm nawn lo sakin banglo teng peuh tawh buaina, ginat lohna, thangpaih ngaihsutna, tua banga thuhilh Sya maan lo tatate khawng idol-a neihna, cihte ah hong tun toto dinga, thudik thumaan a kine thei, a kiduh thei nawn lo semsem dingin hong bawl ding hi.

Mangpau-in Kawng-ta-feih (counterfeit) pen Zopau in kisazaw cih ding hi. Kisazaw cihteh thuhilh Sya maan le thuhilh Sya maan lo om tuak in, tua gel ah thuhilh Sya maan lo pa minthang zaw ahih manin tua pa’ gen bangbang maan ta kei leh ahi peuh kisazaw tawntung thei hi. Biakpiakzia ah Pawlpi ii biakpiak ngeina sangin tulai Priase and Worship zia pen khamitna kisazaw ta hi. Tua pen Kawng-ta-feih kici hi. A maan lo zaw pen a maan zaw sa.

Christian pawlpite in Pawlpi hong piancil tunga kipan a mai-ngat uh gal lian pen khat ahih leh a pua lam gal hi loin a sunglam gal hi den hi. Pawlpi a kimu khial sak, pawlpi a min dai sak, Christian te lam a pial sak, Christian manphatna a kiamsak, bektham loin Christian te buaina a tun den pen sunglam galte hang ahi hi. Sunglam gal i cihte in hiam le gam a tawi hi loin, thuhilhna maan lo, biakpiak kimakaihna maan lo kipattahna maan lo tawh Christian biakna leitung vai a suah gawp nuamte ahi hi.

Tua ahih manin tuhun ah zong Christian te ii gal lian pen in Buddhist te, Muslim te, Hindu te hi loin hih Kawng-ta-feih te ahi hi. Kawng-ta-feih pen Kawlpau in a maan lo, a sit lo, a tuh (အတု) cihna hi. A tuh zaw pen a sit kisazaw. Kawlte paunak khat ah “Thumaan lo kigengen leh, thumaan lo tawh kimakaih kaih leh a sawt teh tua pen a maan kisazaw ta” cih khat nei uhi. (အမှားပြောဖန်များတော့ အမှန်ဖြစ်တတ်။ ci uhi).

Lungdamnathu maan taka hilhna, tangkona hanga thu-um lo mite ii hong bawlsiat, hong langpan, hong deidan bawl, hong ko, hong do, hong el, thu hong bawl, thong hong tut nate pen i gal hi loin i mission field hi. I gal ding pen Christian vai ahi lo Christian vai i sak gawp dinga kikhemna Kawng-ta-feih (counterfeit) pen ahi hi.

Tulai Christian te lak ah Kawng-ta-feih hong lut theihna lianpi khat: Praise & Worship ahi hi. Biakinn ah i kikhop teh a kipat pan a tawp (benediction) dong pen Praise and Worship taktak ahi hi. Tua pen Worship a kisa lo zawsop dingin kikhop kipat ma-a music bucing tawh a kihih gawp teng Worship kisazaw ta hi. Tua pen Kawng-ta-feih ahi hi.

Tua ahih manin Christian te in i gal lian pen ahi hih Kawng-ta-feih namte i do kei leh a dawn lam-a thu nengnengte i do (i ဖြေရှင်း) sawm hangin do zo lo dal zo nawn loin i phunphun ding hi. Christian te adingin i gal lian pen in hih a KISAZAW Kawng-ta-feih (counterfeit) pen ahi hi. KISAZAW. Evan. Suangh Dal