Mexico khuasung meileng tutna pawlkhat te pasal pumpi bangdan in kibawl

Mexico khuasung meileng tutna pawlkhat te pasal pumpi bangdan in kibawl

Mexico City khuasung kikawmna meileng tutna pawlkhat ah pasal pumpi “Male Body” bangdanlian in akibawl tutna pawlkhat omhi. Tua tutna tepen pasal zahmawh bangdanmah in akalkawm pen apuaktuam in kibawl a, tutna ii anung kongkhak Window tungah “for men only” ci’n pasal tebek tutheiding ci’n kigelh sawnsawn hi.

Tuaban ah tutuna ii amai sualtung ahzong “it is annoying to travel this way, but not compared to the sexual violence women suffer in their daily commutes” ci’n kigelh sawnsawn hi. Hihbangdan in khualzinpen nopmawh mahmah hi, ahi zongin numei te’n nisim Sexual Violence athuak uhtawh tehkak dingin cihtham nailo hi ci’n kigelh hi.

Hih tutna tepen United Nations leh Mexicoty City Authorities te kipawlkhawm in Campaign bawlna in akoihsak ngiat uh ahihi. Khuasung kikawmna Public Transportation te tungah Sexual Harassment kibawlna omden cihpen mipi theihding lunggulhna tawh abawlngiat uh ahihi.

Hibangdan tutna aomlam pen asawtnailo in Online Video pawlkhat ah hongki thehthangkhia a, Passengers pawlkhat inzong telcian zolo uhhi. Ahi zongin hih Campaign pen numei te’n nisim athuakzia uh khuasung mipi te’n atheihding deihna tawh akibawl ahihi.

Mexico City sung aom numei 10 lakah mi 9 bangin nisim khuasung avakna ah Sexual Violence thuakkhaden uhhi ci’n The Telegraph te’n suahkhiamawk uhhi.

Khuasungmi tampi te’n hih Campaign pen thupisa in phatmahmah uhhi. Pawlkhat leuleu in Mexico City sungah banghangin numei te ki bawlsiatna pianghiam cih abul “Root Causes” zong kankhiatding kisam zawlai hi ci’n genkhia uhhi.

Hih Campaign pen nungkhasung in akipan kici a, UN Women Mexico panin Ana Güezmes kici in agenkhiatna ah “pasal atamzaw in Sexual Harassment pen Violence in ngaihsunlo uhhi” ci’n genkhia hi. Tuabang ngaihsutna te aom nawnloh nading, numei bawlsiatna, ngongtatna te aomloh nading ngimna tawh hih Campaign akibawl ahihi.

Sexual Harassment cihpen:

Nidang hunkhatlai in Yangon khuasung ataikawikawi Bus tungah numei pasal cih kikhen peuhmahlo in kihencip gawp hi. Zumkah leh zumtuah hunte phadiak ah numei leh pasal akigak phitphet in Bus aki tuangkhawm hi a, tuapen pasal pawlkhatin namek bawlthei uhhi. Numei te anunglam panin anawknawk tawh, amailam panin aphuphu tawh omthei hi.

Tuapen Sexual Harassment ahihi. Tuahunlai in Kawlgam ah angeina phialin ki ngaihsun himai phialleh kilawm hi. Hun hongki khelzawkdeuh ciangin NGOs leh kipawlna tuamtuam te’n Sexual Awareness khawng mipi tungah genpih kawikawi uhhi.

More: Mexico vanleng tung khatah gul ahinglai kimu

Kawlgam sungah numei buan athuak, Rape Report akibawl pen Sexual Awareness aki genpih khitciangin tamzaw kici hi. Tuapen Rape Case atamzaw hilo in, Rape athuak te’n kumpi thunei te tungah abeisa hunsangin genkhia ngamzawta cihdan hituak mawk hi. ZD Sawltak #zomidaily