Kipulakna ~ Lian Tuang

Kipulakna ~ Lian Tuang

Kawlpi ah mipi lungphona nasia takin i neih pen tu in nipi khat hong cing ta hi. Hih vai ah kithuklut pian ahih manin lungpho kipat ni a kipan thuneite in kep ding mi a gualhna sungah ong hel uh hi. Tua ni a kipan inn ah giak ding lem loin zawhngeu tanei bangin a kitai kawikawi ahi hi.

I theih sa tek mah bangin mipi lungphona vai ding sun le zan cih om loin a kibuai paisuak hi a, naseppihte tampi tak zong inn ciah ding lemlo kitam simsim ta hi.

Gennop bulpi ah Mipi thasanna a taksuak zo takpi ding hiam. I zawh loh ding pi khat a pangpang peuh i hi kha diam. Ei hanciam tawh kilamdanna om zo takpi ding hiam. Dai dide lel ding ahih keileh amau tawh kipawl lel leng mipi ading i lemlawh zaw diam. Kuakua kumpi a kah zongin ei nasep pen kumpite thu man ding hi lel hi, a gualzo ding pen tawh kipawl theih ding kisam hi, cih dan muhna le ngaihsutna tampi om hi. Hihte pen a hi vive mah ahi hi.

Ahi zongin a langkhat ah kei ngaihsutna ah

1- Zo ding lel ding cih sangin sephuai le a kisam bangin gamtatna hi sa ing.

2- Hoih le hoihlo, kilawm le kilawmlo, thuman le thumanlo pen i muhna bangbang i gen a i dinpih ngam ding thupi sa ing.

3- Ei tawh muhna kibanglote langbawl kha het loin amaute ei lam ah i kaih zawh ding i maban hi sa zaw ing.

4- Hih vai ah bangmah thasan se loin i om zenzen leh i biak Pa Pasian kiangah zong thu ibnget ding a kilawm nawn kei diam. Mihing lam pan kalsuanna mapanna bangmah om loin Pasian kiangah i thum i tau tawntung ding pen ahi thei mah ding hiam cih khat in ngaihsun ing.

5- Mipi lam pan lampi man tawh thaneih zahin i hanciam khit nungah a piang bangbang lungkim takin i san zawh ding zong thupi mahmah dingin ngaihsun ing.

Hun lem i ngah leh i gen i sut ding tam mahmah ciat ding ahih manin i maban ciat deihtak in nawkkhawm lai ding hi hang. Eimi sungah CDM hangin dong tuak gawt tuak i om khak zenzen leh zong khatlekhat kiza sak ciat ni. Amaute ading a kisam bangin vaihawm nuam hi hang. Lian Tuang