Kiniamkhiatna bangzah takin thupi

Ahad pen, Pasian’ mai-ah amahmah kiniamkhiat ahih manin, Pasian in nang hun sungin siatna ka tungsak kei ding ci hi. (1 Kum 21:29)

Josiah zong, Pasian mai-ah amahmah kiniamkhiat ahih manin, Pasian in lungnuam takin na pate kiang kong zuansak dinga, hih muna tung ding siatna khempeuh na mit in mu lo ding hi, ci hi. (2 Kum 22:19)

• Kiniamkhiatna in Pasian lungkim’sakna hi.

• Kiniamkhiatna in siatna tawh kipelhna hi.

•Kiniamkhiatna in haksatna sung pan suahtakna hi.

• Kiniamkhiatna in pahtawina hong ngahsak hi.

• Kiniamkhiatna in hong gualzosak ding hi.

• Kiniamkhiatna om lo, nuntakna pen gahhoih gah ngeilo hi.

• Kiniamkhiatna pen niamkiatna hi lo a, san’tohna hizaw hi.

• A kiniamkhiatte pen a guallel bang den napi-in, a gualzo dente hi zaw uh hi.

“Topa mai-ah na kiniamkhiat un. Tua bang na hih uh leh amah in note hong pahtawi ding hi.” James 4:10

Thukham tampitak zui zo in, a kidiksak mahmah Farisaipa thungetna Pasian in sang lo a, a mawh/khialhnate kiphawk in kiniamkhiatna tawh thu a ngen siahdongpa thungetna pen, Pasian in sang zaw hi(Luka 18:10-14).

“Tua ahih ciangin a hun cin’ ciangin Pasian in note hong pahtawi nadingin, ama khut vanglian nuai-ah na kiniamsak un.” 1 Pi 5:6

Sim ding Lai Siangtho munte;
Pau 3:34; Mate 23:12; Pau 15:13; Luka 14:11; Pau 22:4; Mikah 6:8; Pau 29:29; Ef 4:2; Mate 18:4; Kol 3:12; Luka 18:14; 1Pi 3:8

Khris sungah,
David Tuang