Kin ngaihsut in ~ Sia Do Khup

Kin ngaihsut in ~ Sia Do Khup

“hunhoih hunsia cih khen tuan loin Pasian’ thu hilh ding na kin ngaihsut nading, …….:..” 2 TIM 4:2‬ ‭TDB‬‬

1997 kum buai madeuhin Lamka ah cialpi bawlin ka om a, nipikal khat khit ciangin cialpi dangkhat om kik ding ahi hi. Lamka ah pulpit a ka zat puan teng nusia-in vai phamawh khat tawh Kalaymyo ka ciah pak hi. Ka pai kik main tualgal hong piang ahih manin Lamka lam cialpi ding teng kipelh mawk hi. Ka puan teng kila thei nawnlo ahih manin Tedim Bethel AG cialpi bangah khuasung vakna a ka zat puan gialbialbual tawh thu ka gen gamhgamh hi. Gal ven ciangin ka puante tawh ka kimu kik thei pan hi. Sep theihloh zan hun hong thei lua hi.

ZOMI EVANGELIST MASATE

Zomi Evangelist masate in lungdamna thu hilh ding kin ngaihsut mahmah uh a, Pianthakna thu hangin Dr. Pum Za Thang, Tonzang thongah kikhum, Dr.JM Ngul Khan Pau Thuklai palik ten man piangthak pawlkhat in honkhia, Dr. Gin Neih Thang, Dr. Suan Khan Thang, Sia Thawng Khen Thang, Sia Thawn Khan Suan cihte India panin gamgi kan tanin mat leh hen lauhuaina lakah na hong sem uh hi. Sia Thawng Khen Thang bang malkual ah sauveipi hong om a, ama hangin dawibia (Lawki) inn tampi Christian hong suak uh hi. Zomi Evangelist lakah lawlki inn tam a phiat pen hikha ding hi. Amah zong simmawh bawlsiat a lim thuak pawl hi. Kawlgam lam panin Dr. Hau Lian Kham leh Dr. Gin Khan Khual zong cialpi tamvei a bawl pawl uh hi a, Gospel hangin thuakna khitui a tam luan pawl uh ahi hi. Khang masa Evangelist pen amau teng bek hilo a dang tampi om lai hi.

EVANGELIST KHANG NIHNATE

Khang masate maban kizom ahih manin khua khatah piangthak nih leh thum na om hamtang a tuate tawh ma kipang khawm thei hi.

1. Khe tawh kipai ciatciat lai.

Tua hun lai-in mawtaw tun lohna khua tam mahmah lai ahih manin khe tawh kipai ciatciat hi. Mawtaw tunnate zong mawtaw neilo saap zolo ihih manin pai mah kul hi.

2. Ei van ciat pua.

Hong kicial hiloin ei veina tawh kikalsuan ahih manin vaidawn cih bang om selo, ei van ciat pua-in kipai phenphen hi.

3. Kipulak tawm.

Kei bang phadiak minthang lo lua, pilna neilo lua kahih manin khatvei pulpit zat khak nading pen Pastorte upate tungah mo dong bang liangin kut ngaungau kul a, ong phal ciangun kinuam pha mahmah hi.

4. Nek ding thalawh, sum kidong.

Phaisat ah an ne a thu ka gen theih nadingin ka zinte inn ka lamsak a, cialpi bei main singkangzawl ciang ka tun man hi. Pangzang ah zong vaimim lak ka huh uh a, tua pan a piangthak Nu Dim Za Niang in tua zawh kum 28 khit ciang, nungdeuh a Sawbua Peniel Baptist cialpi ah an hong huansak a, 1991 Pangzang khanlawhna thu gen belin nei hi. Khitui Gospel kipatcil lai-in cialpi bawlna munah antang man ding ka kidong zel uh hi.

5. Vauna tuamtuam tam.

A dai dide Tuiphum sungah zong Kha Siangtho in na hong sep ciangin Kamtuampauna, lamna dianna, mangmuhna cihte hong omin so vingveng ahih manin a telsiam nailote nak heh pha mahmah uh hi. CID lam pan dan a kigelh vauna lai, India leh Kawlgam kawmin singnuai mite zat nahih manin khual na zin lai leh hong kiman ding cih peuh lai hong tung hi. Ko khua ah nong pai leh na pumpi in thuak ding cih peuh hi.

6. Sum tawm K.S.T nasepna khauh.

A semte ginat man zong hituan loin Kha Siangtho Zogam leitang ah a buak a kibua ahih manin sermon om seloin zong khanlawhna piang lel hi. Sum tawm bei mahmahin khanlawhna lian mahmah ahih manin a met tam mahmah hi.

7. K.S.T hangin Pawl kideidanna bei.

I gamah Kha Siangtho hong kibuak ciangin i biakpiak zia hong kinaihuai ciat ahih manin kideidanna hong bei a, “Nang bang pawlpi?” cih dotna hong bei hi. Pastorte leh Evangelistte khut kilenin na kisem khawm liai-liai ta hi.

EVANGELIST KHANG THUMNA

Khang masa pen ka theih hangin neulai kahih manin “Hong gum Topa mual hong suak hi en ve un” ci-in amai gual a khut beng keukeu pawl kahi lel hi. Khang nihna leh khang thumna ah Gospel thu tangkoin om kha kahih manin Pasian hehpihna ka phat hi.

1. Pata nasep

Khangno thahat laite leh Kha lam a tate tawh kisem khawm ahih manin pata nasep hi-in nuam mahmah hi.

2. Khe pai tam nawnlo

Khanlawhna thupha hangin i gam hong khangto ahih manin mawtaw leh cycle vive tawh kipai ta hi.

3. Nek ding patau nawn lo.

Khanlawhna hang a i ngah thuphate mit tawh kimu ta ahih manin Khanlawhna deih lo taktak tam nawn sam lo hi. Tua hi a, pawlpi hanciamna leh sumbawlte, gamdang a omte’ sponsor vive ahih manin kitaai mahmah hi.

4. Kigim pha mahmah hi.

Nidangin pawlpi sungah Khanlawhna deih lo tam lua ahih manin cialpi khatvei bawl theih nadingin khitui tampi a luan phot kul, phalna ngah ciangin sum ding omlo khitui luang leuleu, sum om ciangin a gen ding omlo Pasian mizat tawm lua kap leuleu cih bang ahih manin tua pawlpi pen cialpi kibawl main a khanglo khin hi mai hi. Tu hun ciangin intek pawlpite’ khitui tawm lua ta ahih manin a semte kigim mahmah leuleu hi. Taksa taai mahmah kha gim mahmah cih ding hi.

5. Van zat nuam mahmah.

Nidangin meilah kivak, mic loin ki-awng hi. Tu hunin pawlpi kimah sound system, music van hoih ciat, a zangsiam zong tam ta ahih manin nuam pha mahmah ziahziah hi. A poina khatah bel Kha Siangtho neilo music lam pih kitam leuleu hi.

6. Khangno Evangelistte

I minam bup khanlawh nadingin khangno Evangelistte hahkat mahmah uh a, gam sung gam pua zinin tawlnga man lo uh hi. Amau bil ah ka huau sim khiankhian thu khat om a, “Na khangno lai un mun tampi zawh sawm un maw” ci-in ka tuahsa thu tawh ka hanthawn zel hi.

7.Online thu kizaktuahna

Nidangin lai kikhak bek hi a, tu hunin bel tuni a cialpi kibawl pen leitung bup pan ki-en thei ziau hi. Na sermon online pan ka ngai a ka piangthak a ci a om ciangin kinuam mahmah hi. Alangkhat lamah en leng evangelist ten sermon thak sawtvei kinei thei nawnlo suak hi.

THU KHUPNA

Zogam khanlawhna hangin khuapi khuata a, nu leh pa uk zawh loh khangno tampi kikhelin gam sung gam pua ah mipil, mihau, milian suak uh hi. Kamsangpa Joel cih bangin naupangte pan pitek putekte tung dongah Kha Siangtho kibua ahih manin a metna hamphatna thei ciat uh hi. Tua hangin Zomite sungah Mission, Cialpi leh Cimawh huh nading sum kipiak thanuam pen den hi. Tua pen khang kizomin Evangelist nasepna thupha hong pia Topa Pasian hehpihna hang ahi hi. Lungdamna thu sangin a kin huaizaw bangmah omlo takpi hi. Khazih sungah hong it; Langh Do Khup (Khuata mipa)